បក្សចំនួន១០ប្ដេជ្ញាអនុវត្តគោលនយោបាយគ្រប់គ្រងគ្រឿងស្រវឹងបើសិនជាប់អាសនៈឃុំសង្កាត់
ប្រធានគណបក្សនិងតំណាងគណបក្សចំនួន១០ នៅថ្ងៃទី២៤ឧសភានេះ បានចុះហត្ថលេខារួមគ្នាលើការប្ដេជ្ញាចិត្តរបស់ពួកគេជំរុញឲ្យមានគោលនយោបាយគ្រឿងស្រវឹង នៅពេលដែលជាប់ឆ្នោតក្នុងឃុំ ភូមិ សង្កាត់។ ការប្ដេជ្ញាចិត្តរបស់គណបក្សនយោបាយទាំង១០ ធ្វើឡើងបន្ទាប់ពីមានការស្នើសុំរបស់អង្គការសង្គមស៊ីវិល។ អង្គការមជ្ឈមណ្ឌលភីឌីភីបានកត់សម្គាល់ថា ផលប៉ះពាល់នៃគ្រឿងស្រវឹងមិនត្រូវបានដាក់បញ្ចូលនៅក្នុងគោលនយោបាយរបស់គណបក្សចំនួន១៧ឡើយ ហើយមេឃុំចៅសង្កាត់មានភាពភ័យខ្លាចក្នុងការចេញដីកាទប់ស្កាត់ផលប៉ះពាល់លើគ្រឿងស្រវឹង។
ចុះផ្សាយនៅថ្ងៃ៖
ស្តាប់ - ០២:៣៩
ដីកាបង្កានិងទប់ស្កាត់ផលប៉ះពាល់នៃការប្រើប្រាស់គ្រឿងស្រវឹងនៅថ្នាក់មូលដ្ឋានជារឿងសំខាន់ដើម្បីបង្កាការប្រើប្រាស់ និងហិង្សាបណ្ដាលមកពីគ្រឿងស្រវឹង។ បើតាមភីឌីភី មានតែជាង១៥០ឃុំសង្កាត់ទេ ក្នុងចំណោមឃុំសង្កាត់ជាង១៦០០ចេញដីកាទប់ស្កាត់ការប្រើប្រាស់គ្រឿងស្រវឹងរាប់ចាប់តាំងពីឆ្នាំ២០២១ដល់ឆ្នាំ២០២២នេះ ខណៈការផ្សព្វផ្សាយគ្រឿងស្រវឹងពេញនិយមនៅថ្នាក់ជាតិដែលជំរុញឲ្យមានការប្រើប្រាស់ពីសំណាក់ពលរដ្ឋវ័យក្មេងនៅថា្នក់មូលដ្ឋាន។
ជាក់ស្ដែង ៤២ភាគរយនៃកុមារអាយុចាប់ពី១៥ឆ្នាំនិងមនុស្សពេញវ័យអាយុ១៩ឆ្នាំបានសេពគ្រឿងស្រវឹងយ៉ាងជោគជាំ។ នេះជាបទបង្ហាញរបស់លោក សុង ឌៀរ៉ាក់ មន្ត្រីកម្មវិធីនៃអង្គការCMH នៅចំពោះមុខប្រធានគណបក្សនិងតំណាងគណបក្សនយោបាយទាំង១០នៅថ្ងៃទី២៤ឧសភានេះ។ បើតាមលោកឌៀរ៉ាក់ ហេតុដែលនាំឲ្យកុមារនិងយុវជននាំគ្នាសេពគ្រឿងស្រវឹងទាំងវ័យក្មេងបែបនេះ មកពីឥទ្ធិពលនៃការផ្សព្វផ្សាយពាណិជ្ជកម្មយ៉ាងព្រោងព្រាត ដែលការផ្សព្វផ្សាយនេះត្រូវបានកុមារនិងយុវជនយល់ថា ជា រឿងធម្មតា។
បន្ថែមលើនេះ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព(ភីឌីភី)បានគូសបញ្ជាក់ថា ឥទ្ធិពលគ្រឿងស្រវឹងបានបង្កផលប៉ះពាល់ប្រជាពលរដ្ឋដែលមានប្រាក់ចំណូលទាបបើធៀបនឹងពលរដ្ឋដែលមានប្រាក់ចំណូលខ្ពស់។ នេះក៏ដោយសារតែពលរដ្ឋមានប្រាក់ចំណូលទាបមិនសូវជាយល់ដឹងពីគ្រោះថ្នាក់នៃគ្រឿងស្រវឹង។
បើតាមលោកគិមអេង គ្រឿងស្រវឹងក៏បានប៉ះពាល់ដល់គោលនយោបាយភូមិឃុំមានសុវត្ថិភាព ខណៈគោលនយោបាយចាស់មួយនេះពុំបានសង្កត់ធ្ងន់លើផលប៉ះពាល់ក្នុងសង្គមដែលបណ្ដាលមកពីគ្រឿងស្រវឹងឡើយ។ ម្លោះហើយទើបមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព និងគណបក្សនយោបាយទាំង១០ចុះហត្ថលេខារួមគ្នាលើដីកាកំហិតគ្រឿងស្រវឹងដែលក្នុងនោះរួមមាន៖ ដាក់កម្រិតភាពងាយរកបាននៃគ្រឿងស្រវឹង ហាមឃាត់ការផ្សាយពាណិជ្ជកម្មគ្រឿងស្រវឹង និងកម្រិតអាយុប្រើប្រាស់គ្រឿងស្រវឹង។
ក្រៅពីស្វាគមន៍តំណាងគណបក្សនយោបាយទាំង១០លើកឡើងប្រហាក់ប្រហែលគ្នាថា គេពិបាកក្នុងការទប់ស្កាត់ឬបញ្ឈប់មនុស្សក្នុងសង្គមមិនឲ្យសេពគ្រឿងស្រវឹងខ្លាំងណាស់ ព្រោះទម្លាប់សេពគ្រឿងស្រវឹងបានចាក់គ្រឹះក្នុងសង្គមយូរក្រាសក្រែល ដូច្នេះតែកំណត់បរិមាណលក់ មិនលក់ដោយសេរី លុបបំបាត់ការឈ្នះរង្វាន់ទេ ទើបកាត់បន្ថយការប្រើប្រាស់គ្រឿងស្រវឹងបាន។
ជាការកត់សម្គាល់គណបក្សប្រជាជនកម្ពុជា ដែលកំពុងកាន់អំណាចពុំបានបញ្ចូនតំណាងរបស់ខ្លួនចូលរួមចុះហត្ថលេខាលើការប្ដេជ្ញាចិត្តជំរុញឲ្យមានគោលនយោបាយគ្រឿងស្រវឹងឡើយ។ ជារឿងគួរឲ្យសោកស្ដាយសម្រាប់លោក យង់ គិមអេង ព្រោះវត្តមានគណបក្សកាន់អំណាចជារឿងសំខាន់ដែលអាចឈានទៅសម្រេចបានការកាត់បន្ថយការផ្សព្វផ្សាយពីឥទ្ធិពលនៃគ្រឿងស្រវឹង។
ឆ្នាំ២០២១ គ្រោះថ្នាក់ចរាចរណ៍ដែលបណ្ដាលមកពីការបើកបរក្រោមឥទ្ធិពលនៃគ្រឿងស្រវឹងមានចំនួន៣០០នាក់ក្នុងចំណោមអ្នកស្លាប់ដោយសារគ្រោះថ្នាក់ចរាចរណ៍សរុប១,៤៩៧នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ