លោក ជិន ម៉ាលីន៖ បើរដ្ឋបរទេសមិនសុខចិត្ត អាចតវ៉ានឹងលោក កឹម សុខា ករណីភ្ជាប់ឈ្មោះប្រទេសទាំងនោះ
អ្នកនាំពាក្យក្រសួងយុត្តិធម៌ បានចេញបកស្រាយជាថ្មីទៀត លើសំណុំរឿងលោក កឹម សុខា ដែលជាប់ចោទពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជា។ ការបកស្រាយនេះ គឺដោយសារតែនៅពេលថ្មីៗនេះ សហមេធាវីការពារក្តីបានទទួចឲ្យតុលាការកោះហៅតំណាងប្រទេសទាំងនោះចូលសវនាការ។ បើតាម លោក ជិន ម៉ាលីន ការធ្វើដូច្នេះ គឺជាល្បិចរបស់ភាគីជនជាប់ចោទ ដើម្បីរុញឱ្យរដ្ឋបរទេស ចូលក្នុងសំណុំរឿងជាមួយគាត់ ហើយប្រើប្រាស់បរទេសឱ្យជួយគាត់ឱ្យរួចចេញពីសំណុំរឿងព្រហ្មទណ្ឌនេះ តាមរយៈការដាក់សម្ពាធលើកម្ពុជា។
ចុះផ្សាយនៅថ្ងៃ៖
ស្តាប់ - ០២:១១
«បើរដ្ឋបរទេសណាមិនសុខចិត្តនឹងការលើកឡើងរបស់លោក កឹម សុខា ដែលភ្ជាប់ឈ្មោះប្រទេសរបស់ខ្លួនទៅក្នុងសំណុំរឿងនេះ គឺត្រូវធ្វើការតវ៉ាជាមួយលោក កឹម សុខា ផ្ទាល់ ចំពោះអ្វីដែលអ្នកនយោបាយរូបនេះបាននិយាយនៅក្នុងវីដេឃ្លីប ដោយភ្ជាប់ឈ្មោះប្រទេសរបស់ខ្លួនទៅក្នុងផែនការឃុបឃិតគ្នារៀបចំធ្វើបដិវត្តពណ៌ផ្តួលរំលំរដ្ឋាភិបាលស្របច្បាប់ ដោយយកគំរូតាមយូហ្គូស្លាវី-ស៊ែរប៊ី»។ នេះជាលើកឡើងរបស់លោក ជិន ម៉ាលីន អ្នកនាំពាក្យក្រសួងយុត្តិធម៌ បន្ទាប់ពីមានការបកស្រាយជាថ្មីទៀតពាក់ព័ន្ធនឹងសំណុំរឿងលោក កឹម សុខា ខណៈលោក ហ៊ុន សែន បានប្រាប់ពលរដ្ឋនៅអាមេរិកថារដ្ឋាភិបាលរបស់លោកមិនបានចោទសហរដ្ឋអាមេរិកឃុបឃិតជាមួយលោក កឹម សុខា ទេ គឺលោក កឹម សុខា និយាយដោយខ្លួនឯង។
សម្រាប់ លោក ជិន ម៉ាលីន ក្រុមមេធាវីរបស់ជនជាប់ចោទ និងជនជាប់ចោទទៅវិញទេ ដែលតែងតែបានស្នើឲ្យតុលាការកោះហៅទូតបរទេសចូលសវនាការ ហើយខាងមេធាវីរដ្ឋាភិបាល និងសាធារណជនបានដឹងច្បាស់ថា ការធ្វើដូច្នេះ គឺជាល្បិចរបស់ភាគីជនជាប់ចោទ ដើម្បីរុញឱ្យរដ្ឋបរទេស ចូលក្នុងសំណុំរឿងជាមួយគាត់ ហើយប្រើប្រាស់បរទេសឱ្យជួយគាត់ឱ្យរួចចេញពីសំណុំរឿងព្រហ្មទណ្ឌនេះតាមរយៈការដាក់សម្ពាធលើកម្ពុជា។
បើតាមអ្នកនាំពាក្យរូបនេះ ការប្រើយុទ្ធសាស្ត្របែបនេះគឺមិនទទួលបានជោគជ័យឡើយ ដោយសារកត្តាសំខាន់ៗយ៉ាងតិចចំនួនពីរគឺទី១ កម្ពុជាជារដ្ឋអធិបតេយ្យ និងមានច្បាប់របស់ខ្លួន ដែលត្រូវអនុវត្តយ៉ាងម៉ឺងម៉ាត់ ដោយអំណាចតុលាការ និងទី២ យោងតាមអនុសញ្ញាទីក្រុងវីយ៉ែនស្តីពីទំនាក់ទំនងការទូតរវាងរដ្ឋ និង រដ្ឋ ទូតបរទេសតែងមានអភ័យឯកសិទ្ធិ ហើយមិនចំណុះទៅនឹងអំណាចតុលាការនៃរដ្ឋម្ចាស់ផ្ទះទេ ហើយតុលាការនៃរដ្ឋម្ចាស់ផ្ទះ ក៏ពុំមានសិទ្ធិអំណាចអ្វីដើម្បីចាត់នីតិវិធីទៅលើទូតបរទេសនោះដែរ។
បើផ្អែកតាមការវិភាគផ្លូវច្បាប់ លោក ជិន ម៉ាលីន លើកឡើងថា សំណុំរឿង លោក កឹម សុខា អាចដោះបន្ទុកបានលុះត្រាតែមេធាវីរកភស្តុតាងមកបញ្ជាក់ថា វីដេអូដែលលោក កឹម សុខា បាននិយាយគឺជាវីដេអូមិនពិត ឬសំដីដែលបាននិយាយនៅក្នុងវីដេអូនោះ មិនមែនជាសំដីរបស់លោក កឹម សុខា ទើបអាចរកវិធីដោះបន្ទុកក្នុងរឿងនេះ។ ប៉ុន្តែ លោក ជិន ម៉ាលីន អះអាងថា វីដេអូទាំងពីរនោះ គឺដូចគ្នា ដែល លោក កឹម សុខា ពិតជាបាននិយាយហើយត្រូវបានតុលាការប្រើប្រាស់ជាមូលដ្ឋាននៃការចោទប្រកាន់នៅក្នុងសំណុំរឿងនេះ ដោយគួបផ្សំនឹងភស្តុតាងស៊ីសង្វាក់គ្នាជាច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ