លោក ហ៊ុន សែន ជំរុញឲ្យអ្នកប្រឆាំងធ្វើបាតុកម្មពេលលោកទៅអាមេរិក
ប្រមុខរដ្ឋាភិបាលកម្ពុជាបានជំរុញឲ្យក្រុមអ្នកប្រឆាំងចេញមកធ្វើបាតុកម្មនៅពេលលោកទៅចូលរួមកិច្ចប្រជុំកំពូលអាស៊ាន-អាមេរិកនៅក្នុងខែឧសភានេះ។ ប៉ុន្តែជាមួយគ្នានេះលោក ហ៊ុន សែន អះអាងថា នឹងមានអ្នកមកគាំទ្រលោកច្រើនជាងអ្នកមកធ្វើបាតុកម្មដែរ តែមិនលើកទឹកចិត្តឲ្យពួកគេធ្វើបាតុកម្មប្រឆាំងវិញឡើយ។ សម្រាប់លោកនាយករដ្ឋមន្ត្រី ការធ្វើបាតុកម្មរបស់ពលរដ្ឋខ្មែរនៅសហរដ្ឋអាមេរិក គឺប្រៀបបាននឹងការធ្វើបាតុកម្មប្រឆាំងប្រធានាធិបតីអាមេរិកដូចគ្នាដែរ។
ចុះផ្សាយនៅថ្ងៃ៖
ស្តាប់ - ០១:៥៥
នៅក្នុងពិធីសំណេះសំណាលជាមួយសិស្សនិទ្ទេសA នៅព្រឹកថ្ងៃអង្គារ លោកនាយករដ្ឋមន្ត្រី ហ៊ុន សែន ប្រកាសថា លោកនឹងទៅចូលរួមកិច្ចប្រជុំកំពូលពិសេស អាស៊ាន-អាមេរិក នៅក្នុងខែឧសភាខាងមុខនេះ តាមការអញ្ជើញរបស់លោកប្រធានាធិបតីសហរដ្ឋអាមេរិកលោក ចូ បៃដិន។
នៅពេលនេះលោក ហ៊ុន សែន ថ្លែងថា លោកកំពុងរងចាំមើលថាតើនឹងមានមនុស្សប៉ុន្មាននាក់ ចេញធ្វើបាតុកម្មប្រឆាំងវត្តមានរបស់លោកនៅលើទឹកដីអាមេរិកនៅសប្តាហ៍ក្រោយនេះ ខណៈលោកក៏ប្រកាសថាលោកនឹងទៅប្រជុំនៅអឺរ៉ុបនៅថ្ងៃទី២១ខែឧសភា។
បើតាម លោក ហ៊ុន សែន ចំនួនអ្នកចេញមុខធ្វើបាតុកម្មប្រឆាំងលោកនៅក្រៅប្រទេសនឹងតិចជាងចំនួនអ្នកមកគាំទ្រលោកដែលមានប្រមាណ១ពាន់នាក់។
ការដែលលោក ហ៊ុន សែន ពន្យុះឲ្យអ្នកនៅក្រៅប្រទេសធ្វើបាតុកម្មប្រឆាំងលោកបែបនេះ គឺនៅក្រោយពេលអ្នកគាំទ្រគណបក្សប្រឆាំងបានប្រកាសថា ពួកគេនឹងហែក្បួនបាតុកម្មចម្រុះជាតិសាសន៍ប្រឆាំងនឹងវត្តមាន លោក ហ៊ុន សែន នៅរដ្ឋធានីវ៉ាស៊ីនតោននៅថ្ងៃទី១២ ឧសភា គឺចំថ្ងៃទី១នៃកិច្ចប្រជុំកំពូលពិសេសអាស៊ាន-អាមេរិក។
តាមរយៈហ្វេសប៊ុករបស់នៅថ្ងៃទី២ឧសភា អគ្គលេខាធិការអតីតគណបក្សសង្គ្រោះជាតិ ប្រចាំសហរដ្ឋអាមេរិក លោក រី គា អះអាងថា នឹងមានពលរដ្ឋខ្មែរ និងពលរដ្ឋក្នុងប្រទេសអាស៊ានរាប់ពាន់នាក់ ដូចជា ភូមា ថៃ ឡាវ ហ្វីលីពីន ត្រៀមធ្វើមហាបាតុកម្មចម្រុះជាតិសាសន៍នៅទីក្រុងវ៉ាស៊ីនតោនប្រឆាំងនឹងមេដឹកនាំនៃប្រទេសនីមួយៗ។
អ្នកគាំទ្របក្សប្រឆាំងរូបនេះថែមទាំងបរិហារ្តិ៍ទៀតថា រដ្ឋាភិបាលកម្ពុជាបានចំណាយលុយជាតិទៅទិញទឹកចិត្តអ្នកនៅក្រៅប្រទេសឲ្យមកគាំទ្រ លោក ហ៊ុន សែន នៅគ្រាដែលពលរដ្ឋខ្មែរក្នុងប្រទេសកំពុងជួបវិបត្តិសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ