នរវិទូ អាំង ជូលាន៖ គ្រឿងឥស្សរិយយសពីជប៉ុនជាការទទួលស្គាល់ចំពោះការងាររបស់លោកនាពេលកន្លងមក
នរវិទូខ្មែរ លោកបណ្ឌិត អាំង ជូលាន មានសេចក្ដីរំភើបរីករាយនៅពេលលោកទទួលដំណឹងថា រដ្ឋាភិបាលជប៉ុន សម្រេចផ្ដល់ជូនលោក នូវគ្រឿងឥស្សរិយយសសម្រាប់និទាឃរដូវឆ្នាំ២០២២។ លោកបណ្ឌិត អាំង ជូលាន ថ្លែងប្រាប់វិទ្យុបារាំងអន្ដរជាតិ RFI ថា គ្រឿងឥស្សរិយយសដែលលោកទទួលបាននាពេលនេះ គឺជាការលើកទឹកចិត្តមួយសម្រាប់រូបលោក។ និងថា ដរាបណាសុខភាពលោកនៅតែអំណោយផល លោកនឹងបន្តធ្វើការក្នុងវិស័យបុរាណវិទ្យា និងនរវិទ្យា ដែលលោកស្រឡាញ់ពេញចិត្តជាបន្តទៀត ដើម្បីបន្សល់ទុកឲ្យកូនខ្មែរជំនាន់ក្រោយបានសិក្សាស្វែងយល់ ដោយពុំចាំបាច់ពឹងពាក់ទាំងស្រុងតែទៅលើឯកសារបរទេស។
ចុះផ្សាយនៅថ្ងៃ៖
គ្រឿងឥស្សរិយយសសម្រាប់និទាឃរដូវឆ្នាំ២០២២ ពីរដ្ឋាភិបាលជប៉ុន គឺជាដំណឹងដ៏គួរឲ្យភ្ញាក់ផ្អើលសម្រាប់លោកបណ្ឌិត អាំង ជូលាន ដែលពេលនេះកំពុងតែស្នាក់នៅប្រទេសបារាំងដើម្បីព្យាបាលជំងឺ។ ថ្លែងប្រាប់វិទ្យុបារាំងអន្ដរជាតិ RFI តាមខ្សែទូរសព្ទ នរវិទូរូបនេះមានប្រសាសន៍ថា លោករំភើបផង សប្បាយចិត្តផង ដែលជប៉ុនផ្ដល់គ្រឿងឥស្សរិយយសដល់រូបលោក ជាការទទួលស្គាល់ចំពោះការងារដែលលោកបានធ្វើនាពេលកន្លងមក ទាំងក្នុងវិស័យបុរាណវិទ្យា និងនរវិទ្យា។
គួរជ្រាបថា គ្រឿងឥស្សរិយយសសម្រាប់និទាឃរដូវឆ្នាំ២០២២ ដែលរដ្ឋាភិបាលជប៉ុនផ្ដល់ជូនលោកបណ្ឌិត អាំង ជូលាន មានឈ្មោះជាផ្លូវការថា The Order of the Rising Sun, Gold Rays with Neck Ribbon។ ជប៉ុនបង្កើតគ្រឿងឥស្សរិយយសនេះឡើងនៅឆ្នាំ១៨៧៥ ដើម្បីប្រគល់ជូនបុគ្គលឆ្នើមទាំងឡាយណា ដែលបានរួមចំណែកលើកកម្ពស់ទំនាក់ទំនងជាមួយប្រទេសជប៉ុន លើគ្រប់វិស័យ រាប់ចាប់តាំងពីវិស័យទំនាក់ទំនងអន្ដរជាតិ វប្បធម៌ ការអភិវឌ្ឍសុខុមាលភាព និងការអភិរក្សបរិស្ថានជាដើម។
នៅក្នុងសេចក្ដីប្រកាសព័ត៌មានចុះថ្ងៃទី២៩ខែមេសាឆ្នាំ២០២២ ស្ថានទូតជប៉ុនបញ្ជាក់ថា ការផ្ដល់គ្រឿងឥស្សរិយយសដល់លោកបណ្ឌិត អាំង ជូលាន គឺជាការទទួលស្គាល់ចំពោះការចូលរួមវិភាគទានរបស់លោក ក្នុងកិច្ចការជំរុញការផ្លាស់ប្ដូរផ្នែកសិក្សាស្រាវជ្រាវ និងការយល់ដឹងពីគ្នាទៅវិញទៅមក រវាងប្រទេសជប៉ុននិងកម្ពុជា ក៏ដូចជាសមិទ្ធិផលដ៏លេចធ្លោរបស់លោក ក្នុងកិច្ចការស្រាវជ្រាវ ព្រមទាំងវិស័យអភិរក្ស និងជួសជុលទីតាំងបុរាណវិទ្យានានា។
សូមជម្រាបថា នរវិទូខ្មែរ លោកបណ្ឌិត អាំង ជូលាន កើតនៅថ្ងៃទី០១ ខែធ្នូ ឆ្នាំ១៩៤៩ ជាអ្នកស្រុកកំពង់ឃ្លាំង ខេត្តសៀមរាប។ លោកបានបញ្ចប់ការសិក្សាថ្នាក់បណ្ឌិតផ្នែកនរវិទ្យាពីប្រទេសបារាំង នៅឆ្នាំ១៩៨២។ លោកធ្លាប់បម្រើការងារជាអតីតប្រធាននាយកដ្ឋានវប្បធម៌នៃអាជ្ញាធរជាតិអប្សរា ហើយបច្ចុប្បន្ន លោកជាសាស្ត្រាចារ្យ បង្រៀននៅមហាវិទ្យាល័យបុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ។ ក្រៅពីការងារទាំងនេះ លោកបណ្ឌិត អាំង ជូលាន ជាអ្នកស្រាវជ្រាវដ៏សកម្មមួយរូប ដែលបានបោះពុម្ពផ្សាយស្នាដៃជាច្រើន ក្នុងផ្នែកនរវិទ្យា និងបុរាណវិទ្យា។
លោកបណ្ឌិត អាំង ជូលាន អះអាងប្រាប់វិទ្យុបារាំងអន្ដរជាតិ RFI ថាដរាបណាសុខភាពលោកនៅតែអំណោយផល លោកនឹងបន្តធ្វើការក្នុងវិស័យបុរាណវិទ្យា និងនរវិទ្យា ដែលលោកស្រឡាញ់ពេញចិត្តជាបន្តទៀត។ លោកមានបំណងបញ្ចប់ការសរសេរសៀវភៅសិក្សាអំពីប្រវត្តិសាស្ត្រប្រទេសកម្ពុជា ជាភាសាខ្មែរ ដើម្បីឲ្យកូនខ្មែរជំនាន់ក្រោយបានសិក្សាស្វែងយល់ ដោយពុំចាំបាច់ពឹងពាក់ទាំងស្រុងតែទៅលើឯកសារបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ