តំណាងUNប្រចាំនៅកម្ពុជាបារម្ភពីភាពខ្វះចន្លោះនៃការអនុវត្តច្បាប់ស្តីពីយុត្តិធ៌មអនីតិជន
តំណាងការិយាល័យសិទ្ធិមនុស្សអង្គការសហប្រជាជាតិ និងតំណាងអង្គការយូនីសេហ្វប្រចាំកម្ពុជាបានធ្វើទស្សនកិច្ចរួមគ្នាទៅកាន់មជ្ឈមណ្ឌលស្តារនីតិសម្បទាយុវជនដែលស្ថិតក្នុង ស្រុកកណ្តាលស្ទឹង ខេត្តកណ្តាល នៅថ្ងៃទី២២មេសាម្សិលមិញ។ ក្រៅពីស្ដាប់ និងទទួលយកអំពីភាពប្រសើរឡើង ក្នុងការផ្ទេរអនីតិជនមកកាន់មជ្ឈមណ្ឌលស្តារនីតិសម្បទាថ្មី តំណាងការិយាល័យសិទ្ធិមនុស្សអង្គការសហប្រជាជាតិបានបង្ហាញក្ដីព្រួយបារម្ភពីភាពខ្វះចន្លោះនៃការអនុវត្តច្បាប់ស្តីពីយុត្តិធ៌មអនីតិជនរបស់ប្រទេសកម្ពុជា។ ភាពខ្វះចន្លោះដែលដាក់អនីតិជនឃុំខ្លួនជាមួយនីតិជន ដែលបន្ថែមភាពចង្អៀតណែនក្នុងពន្ធនាគារ។
ចុះផ្សាយនៅថ្ងៃ៖
ស្តាប់ - ០២:៤៣
ច្បាប់ស្តីពីយុត្តិធ៌មអនីតិជនរបស់ប្រទេសកម្ពុជា អនុញ្ញាតឱ្យមានវិធានការបង្វែរអនីតិជនដែលប្រព្រឹត្តបទល្មើសចេញពីប្រព័ន្ធយុត្តិធម៌ព្រហ្មទណ្ឌ និងជាពិសេសចេញពន្ធនាគារ ប៉ុន្តែលទ្ធភាពនេះមិនត្រូវបានប្រើប្រាស់ជាប្រចាំឡើយ។ នេះជាការកត់សម្គាល់របស់លោកស្រី ខ្លៅឌៀ ដឺឡាហ្វ័នតេ (Claudia De La Fuente) តំណាងស្តីទីនៃការិយាល័យសិទ្ធិមនុស្សអង្គការសហប្រជាជាតិប្រចាំកម្ពុជា នៅចំពោះមុខមន្ត្រីកម្ពុជា។ លោកស្រីបន្ថែមថា ការណ៍ដែលគ្មានវិធានការបង្វែរអនីតិជនប្រព្រឹត្តបទល្មើសចេញពីប្រព័ន្ធយុត្តិធម៌ព្រហ្មទណ្ឌ និងជាពិសេសចេញពន្ធនាគារ វាបានបន្ថែមការដាក់បន្ទុកលើពន្ធនាគារកម្ពុជាដែលធ្វើឲ្យបរិមាណអ្នកទោសកាន់តែកើនឡើង និងជះឥទ្ធិពលអវិជ្ជមានដល់ជីវិតរបស់កុមារដែលមានទំនាស់ជាមួយច្បាប់។
បើតាមលោកស្រី ខ្លៅឌៀ ក្នុងចំណោមអនីតិជនសរុបដែលកំពុងជាប់ពន្ធនាគារនៅក្នុងប្រទេសកម្ពុជាសរុប១៣៥៦នាក់ មានជាងពាក់កណ្តាលកំពុងស្ថិតនៅក្នុងការឃុំខ្លួនបណ្តោះអាសន្ន ដែលមានន័យថា ពួកគេនឹងត្រូវសន្មតជាមុនថា គ្មានទោស។ លោកស្រីសង្ឃឹមថា តាមរយៈវត្តមានមជ្ឈមណ្ឌលស្តារនីតិសម្បទាយុវជនថ្មីនេះ នឹងផ្តល់នូវជម្រើសដែលល្អប្រសើរជាងពន្ធនាគារ សម្រាប់កុមារដែលមានទំនាស់ជាមួយច្បាប់។
សូមជម្រាបជូនថា ច្បាប់ស្ដីពីយុត្តិធម៌អនីតិជន ត្រូវបានដាក់ឲ្យប្រើប្រាស់នៅក្នុងឆ្នាំ២០១៦។ ច្បាប់នេះមានគោលបំណងធានាការពារសិទ្ធិ និងឧត្តមប្រយោជន៍របស់អនីតិជនដែលប្រព្រឹត្តបទល្មើស និងគាំទ្រដល់ការស្ដានីតិសម្បទា និងការធ្វើសមាហរណកម្មអនីតិជនទៅក្នុងសង្គម និងសហគមន៍។ ក្នុងនោះវត្តមានមជ្ឈមណ្ឌលយុវនីតិសម្បទាជារឿងសំខាន់សម្រាប់ផ្ដល់សេវាការពារ ថែទាំ អប់រំ ស្ដារនីតិសម្បទា និងសមាហរណកម្មដល់អនីតិជន។
ហេតុដូចនេះ ទើបរដ្ឋាភិបាលកម្ពុជាសម្ពោធមជ្ឈមណ្ឌលស្តារនីតិសម្បទាយុវជនថ្មីមួយនៅខេត្តកណ្តាលកាលពីចុងឆ្នាំ២០២១នេះ ដើម្បីធ្វើឱ្យឃើញលក្ខខណ្ឌមានភាពប្រសើរឡើងដល់អនីតិជនចំនួន ១៣៥៦នាក់ ដែលកំពុងស្ថិតក្នុងការឃុំឃាំង ដែលភាគច្រើនកំពុងស្ថិតក្នុងពន្ធនាគារមានភាពចង្អៀតណែន។
លោក ឌិន បូរី ប្រធាននាយកដ្ឋានស្តារនីតិសម្បទាយុវជននៃក្រសួងសង្គមកិច្ច អតីតយុទ្ធជន និងយុវនីតិសម្បទាថ្លែងនៅក្នុងដំណើរទស្សនកិច្ចររបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាថា មជ្ឈមណ្ឌលថ្មីនេះទទួលក្មេងប្រុសឲ្យស្នាក់នៅចំនួន៣២នាក់សិន ដើម្បីសាកល្បង ប៉ុន្តែមជ្ឈមណ្ឌលនោះមានសមត្ថភាពទទួលកុមារឲ្យស្នាក់នៅបានដល់ចំនួនក្រោម ១០០០នាក់។ ហើយក៏មិនមានពេលវេលាជាក់លាក់ណាមួយក្នុងការផ្ទេរអនីតិជនបន្ថែមទៀតនៅឡើយដែរ ដោយជំហានដំបូងគឺត្រូវកសាងសមត្ថភាពបុគ្គលិក ដើម្បីធានាថា អនីតិជនទទួលបានការថែទាំ និងគាំទ្រ អនុលោមតាមគោលការណ៍សិទ្ធិមនុស្ស ហើយមិនឲ្យស្ថានភាពពួកគេដូចនៅក្នុងពន្ធនាគារឡើយ។ នេះបើតាមលោកឌិន បូរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ