សហមេធាវី៖ លោក កឹម សុខា មិនអាចចូលរួមតាមប្រព័ន្ធអនឡាញជាមួយក្រុមប្រទេសG20 និង G7បានទេ
ក្រុមសហមេធាវីការពារសិទ្ធិលោក កឹម សុខា នៅព្រឹកថ្ងៃទី២៨ មីនានេះបានអះអាងថា លោក កឹម សុខា មិនអាចធ្វើបាឋកថាតាមប្រព័ន្ធអនឡាញ ក្នុងសន្និសីទស្តីពីដំណោះស្រាយសាកលដែលមានការចូលរួមពីបណ្តាប្រទេសរីកចម្រើនខាងសេដ្ឋកិច្ច G7 និងG20 ដែលធ្វើឡើងក្នុង ប្រទេសអាល្លឺម៉ង់បាននោះទេ។ ហេតុផលដែលមិនអាចថ្លែងសារតាមប្រព័ន្ធអនឡាញបាន បន្ទាប់ពីអ្នករៀបចំកម្មវិធីបញ្ជាក់ថា នេះមិនមែនជាគោលបំណងរបស់កម្មវិធី ខណៈកិច្ចប្រជុំបានកំណត់ហើយថា លោកកឹម សុខា នឹងត្រូវថ្លែងសារដោយមានវត្តមានផ្ទាល់។
ចុះផ្សាយនៅថ្ងៃ៖
ស្តាប់ - ០២:២១
ក្រោមហេតុផលថា ផ្ទុយពីគោលបំណងកម្មវិធីបានកំណត់ លោក កឹម សុខា ប្រធានអតីតគណបក្សសង្គ្រោះជាតិមិនអាចធ្វើបាឋកថាតាមប្រព័ន្ធអនឡាញជាមួយសន្និសីទស្តីពីដំណោះស្រាយសកលនៅប្រទេសអាល្លឺម៉ង់បាននោះទេ ដោយសារកម្មវិធីមិនមានការរៀបចំតាមប្រព័ន្ធអនឡាញ។ ហើយមែនទៅ អ្នករៀបចំកម្មវិធីក៏បានអញ្ចើញលោក កឹម សុខាឱ្យចូលរួមជាវាគ្មិនដោយផ្ទាល់ ដើម្បីធ្វើបទអន្តរាគមន៍លើប្រធានបទសំខាន់មួយស្តីពី ការត្រឡប់មកវិញនៃភូមិសាស្ត្រនយោបាយ និង ផលប៉ះពាល់របស់វាចំពោះភាពល្អប្រសើរជាសកល ជាមួយមេដឹកនាំG20 និងG7។
ការខកខានវត្តមានរបស់លោក កឹម សុខា ធ្វើឡើងបន្ទាប់ពី តុលាការកម្ពុជាបានបដិសេធសំណើរបស់សហមេធាវីការពារសិទ្ធិ ដោយមិនអនុញ្ញាតឱ្យលោកកឹម សុខា ទៅចូលរួមដោយផ្ទាល់នៅប្រទេសអាល្លឺម៉ង់នោះទេ។ ប៉ុន្តែ លោក កឹម សុខា ត្រូវបានតុលាការអនុញ្ញាតឱ្យចូលរួមតាមប្រព័ន្ធអនឡាញជំនួសវិញ។
ក្រោយការអ៊ាក់ខានចូលរួមទាំងដោយផ្ទាល់ និងតាមប្រព័ន្ធអនឡាញ លោក ចាន់ ចេន សហមេធាវីមួយរូបក្នុងចំណោមមេធាវី៤រូបការពារសិទ្ធិឱ្យលោកកឹម សុខា បានសម្តែងការសោកស្តាយចំពោះការអវត្តមានរបស់កូនក្តីខ្លួន ។ ខណៈលោកថា កម្មវិធីនេះមានសារៈសំខាន់ណាស់ចំពោះផលប្រយោជន៍ពិភពលោក ជាពិសេសប្រទេសកម្ពុជា។ លោក ចាន់ ចេនបញ្ជាក់ថា ផលប្រយោជន៍ដែលកម្ពុជាអាចនឹងទទួលបាន នោះគឺ វិស័យសេដ្ឋកិច្ច និងនយោបាយ។
ទន្ទឹមនឹងការលើកឡើងរបស់សហមេធាវីរូបនេះ លោក កឹម សុខា ប្រធានអតីតគណបក្សសង្គ្រោះជាតិក៏បានលើកឡើងតាមបណ្តាញសង្គមនាព្រឹកថ្ងៃទី២៨ មីនាថា លោកមានការសោកស្តាយ ដែលមិនអាចធ្វើដំណើរទៅចូលរួមវេទិកាពិភពលោកដ៏មានសារសំខាន់តាមកម្មវិធីដែលបានគ្រោងទុកនេះ ដោយសារតែសិទ្ធិសេរីភាពរបស់លោក ត្រូវបានហាមឃាត់។ លោក កឹម សុខា បន្តថា តាមការរំពឹងទុក អ្នករៀបចំកម្មវិធីនេះ សង្ឃឹមថាការចូលរួមរបស់លោក នឹងអាចផ្តល់ផលប្រយោជន៍ដល់ពិភពលោក និងជាកេរ្តិ៍ឈ្មោះកិត្តិយសរបស់កម្ពុជាផងដែរ។
សូមជម្រាបថា សន្និសីទកំពូលស្តីពីដំណោះស្រាយសកលនៃវេទិកាគោលនយោបាយពិភពលោក (World Policy Forum)នៅទីក្រុងប៊ែរឡាំងនៃប្រទេសអាល្លឺម៉ង់ ត្រូវប្រព្រឹត្តឡើងចាប់ពីថ្ងៃទី២៨ ដល់ថ្ងៃទី២៩ មីនា ឆ្នាំ២០២២។ ។ សន្និសីទនេះបានរៀបចំឡើងដោយរដ្ឋាភិបាលសហព័ន្ធអាល្លឺម៉ង់ និងវេទិកាគោលនយោបាយពិភពលោក ជាពិសេសមានការចូលរួមពីមេដឹកនាំនៃបណ្តាប្រទេសឧស្សហកម្មជឿនលឿន ដែលហៅកាត់ថា G20 និង G7ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ