ករណីបោកគ្រប់បែក២៥ឆ្នាំមុន៖តុលាការបារាំងចេញដីកាកោះហៅមេទាហានកម្ពុជា២រូបឲ្យចូលសវនាការ
សំណុំរឿងគប់គ្រាប់បែកដៃទៅលើក្រុមបាតុករនៅជិតរដ្ឋសភាចាស់ កាលពី២៥ឆ្នាំមុន បានចាប់ផ្ដើមកក្រើកឡើងវិញ បន្ទាប់ពីតុលាការបារាំងបានចេញដីកាចាប់ខ្លួន ឧត្តមសេនីយ៍យោធាជាន់ខ្ពស់ពីររូបរបស់កម្ពុជាដែលជាប់ចោទថា ជាអ្នករៀបចំគម្រោងបោកគ្រាប់បែកដែលបានសម្លាប់មនុស្ស ១៦ នាក់ និងជាង ១០០ នាក់រងរបួស។ តាមគម្រោងតុលាការបារាំងនឹងបើកសវនាការកាត់ទោសនៅឆ្នាំក្រោយ ទោះជាមាន ឬគ្មានវត្តមានជនជាប់ចោទក៏ដោយ ប៉ុន្តែមិនទាន់កំណត់កាលបរិច្ឆេទច្បាស់លាស់នៅឡើយទេ។
ចុះផ្សាយនៅថ្ងៃ៖
ស្តាប់ - ០១:៥៥
ថ្មីៗនេះ តុលាការប្រទេសបារាំង បានចេញដីកា ចាប់ខ្លួន លោក ហ៊ុយ ពិសិដ្ឋ និងលោក ហ៊ីង ប៊ុនហៀង ដែលជាមេទាហានជាន់ខ្ពស់នៅក្នុងក្រសួងការពារជាតិកម្ពុជា ពាក់ព័ន្ធនឹងការវាយប្រហារដោយគ្រាប់បែក នៅទីក្រុងភ្នំពេញ កាលពីថ្ងៃ ៣០ មីនា ១៩៩៧។ តុលាការបារាំងបានចេញបញ្ជាឱ្យចាប់ខ្លួនមន្ត្រីយោធាកម្ពុជាពីររូបនេះដែលស្មោះស្ម័គ្រនឹងលោកនាយករដ្ឋមន្ត្រី ហ៊ុន សែន នៅក្រោមបទចោទ «ប៉ុនប៉ងសម្លាប់មនុស្ស»។ ដីកានោះបានចេញតាំងពីថ្ងៃទី១៩ ខែមីនា ឆ្នាំ២០២០ តែតុលាការបារាំងទើបដាក់ឱ្យអនុវត្ត ចាប់ពីថ្ងៃទី៣០ ខែធ្នូ ឆ្នាំ២០២១កន្លងមក។
ដើមបណ្តឹងនៃសំណុំរឿងបោកគ្រាប់បែកនេះ គឺលោក សម រង្ស៊ី និងភរិយា ដែលជាអ្នកតំណាងជនរងគ្រោះ និងជាភាគីដើមបណ្ដឹងក្នុងសំណុំរឿងនេះ។ ក្រៅពីនេះ ក៏មានសក្ខីកម្មរបស់នាយកអង្គការឃ្លាំមើលសិទ្ធិមនុស្ស (Human Rights Watch) គឺ លោក ប្រ៊ែដ អាដាមស៍ គឺជាសាក្សីដ៏សំខាន់ម្នាក់ ដែលបានរៀបរាប់យ៉ាងក្បោះក្បាយអំពីការជាប់ពាក់ព័ន្ធរបស់លោក ហ៊ីង ប៊ុនហៀង និងលោក ហ៊ុយ ពិសិដ្ឋ ក្នុងហេតុការណ៍គប់គ្រាប់បែកនោះ។ តុលាការបារាំងក៏បានសម្អាងលើរបាយការណ៍ស៊ើបអង្កេតនានា ដូចជារបាយការណ៍របស់ការិយាល័យស៊ើបអង្កេតសហព័ន្ធ ហៅកាត់ថា អេហ្វប៊ីអាយ (FBI) របស់សហរដ្ឋអាមេរិក របាយការណ៍ស៊ើបអង្កេតរបស់ការិយាល័យសិទ្ធិមនុស្សអង្គការសហប្រជាជាតិជាដើម ។
ជនជាចោទក្នុងសំណុំរឿងនេះ គឺលោក ហ៊ីង ប៊ុនហៀង មេបញ្ជាការកងអង្គរក្ស និង ជាអគ្គមេបញ្ជាការងកងយុទ្ធពលខេមរភូមិន្ទ និងលោក ហ៊ុយ ពិសិដ្ឋ អតីតមេបញ្ជាការរងកងអង្គរក្ស និងបច្ចុប្បន្នជារដ្ឋលេខាធិការក្រសួងការពារជាតិ។ ទោះជាយ៉ាងណា លោក ហ៊ីង ប៊ុនហៀង បានអះអាងថាប្រាប់សារព័ត៌មានមួយចំនួនថាលោកមិនពាក់ព័ន្ធនឹងករណីបោកគ្រាប់បែកដៃនោះទេ។
សម្រាប់លោក សម រង្ស៊ី ជាម្ចាស់បណ្តឹងលើសំណុំរឿងនេះ បានសំដែងក្តីរំពឹងថា នេះជាពន្លឺយុត្តិធម៌មួយសម្រាប់ជនរងគ្រោះខ្មែរ ដែលទន្ទឹងរងចាំ២៥ឆ្នាំកន្លងទៅ តាមរយៈតុលាការឯករាជ្យនៅស្រុកបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ