រដ្ឋាភិបាលជប៉ុន គាំទ្រការអភិវឌ្ឍកំពងផែខេត្តព្រះសីហនុ ឱ្យក្លាយជាកំពង់ផែចម្បង ក្នុងតំបន់ និងពិភពលោក
រដ្ឋាភិបាលជប៉ុនបានអះអាងថា ជប៉ុននឹងសហការ គាំទ្រដល់ការអភិវឌ្ឍន៍កំពង់ផែទឹកជ្រៅក្រុងព្រះសីហនុរបស់កម្ពុជា ឱ្យក្លាយជាកំពង់ផែដ៏មានសារៈសំខាន់មួយសម្រាប់ខេត្តព្រះសីហនុ។ ការអះអាងរបស់ជប៉ុននាពេលនេះ ធ្វើឡើងនៅក្នុងសន្និសីទកាសែតរួមគ្នារវាងនាយករដ្ឋមន្ត្រីកម្ពុជា ជប៉ុនកាលពីយប់ថ្ងៃទី២០ មីនា ឆ្នាំ២០២២។ បើតាម រដ្ឋាភិបាលជប៉ុន ការគាំទ្រដល់ការអភិវឌ្ឍកំពង់ផែខេត្តព្រះសីហនុនេះ គឺដើម្បីបង្កើតកិច្ចសហប្រតិបត្តិការសេដ្ឋកិច្ច និងបម្រើដល់ការធ្វើពាណិជ្ជកម្មសម្រាប់តំបន់មេគង្គ និងពិភពលោក។
ចុះផ្សាយនៅថ្ងៃ៖
ស្តាប់ - ០២:៥៩
ក្នុងទិសដៅពង្រឹងកិច្ចសហប្រតិបត្តិសេដ្ឋកិច្ច និងបន្តគាំទ្រដល់គម្រោងអភិវឌ្ឍន៍មួយចំនួនក្នុងប្រទេសកម្ពុជា រដ្ឋាភិបាលជប៉ុនបានសម្រេចជួយសហការ និងអភិវឌ្ឍន៍កំពង់ផែខេត្តព្រះសីហនុឱ្យក្លាយជាកំពង់ផែចម្បងមួយ ដែលមិនមែនតែសម្រាប់កម្ពុជាប៉ុណ្ណោះនោះទេ។ ត្រង់ចំណុចនេះ ភាគីជប៉ុនចង់សំដៅថា កំពង់ផែខេត្តព្រះសីហនុ និងមានសមត្ថភាពដល់ការធ្វើពាណិជ្ជកម្ម បម្រើដល់វិស័យទេសចរណ៍ដល់ប្រទេសក្នុងតំបន់ ប្រទេសស្ថិតក្នុងតំបន់មេគង្គ និងពិភពលោកផងដែរ។
ក្នុងសន្និសីទការសែតរួមគ្នារវាងលោកនាយករដ្ឋមន្ត្រីហ៊ុន សែន និងលោកនាយករដ្ឋមន្ត្រីជប៉ុន គីស៊ីដា ហ្វូមីអូ ភាគីជប៉ុនក៏នឹងបន្តសហការគាំទ្រដល់ការអភិវឌ្ឍន៍ហេដ្ឋារចនាសម្ព័ន្ធសំខាន់មួយចំនួនដូចជា៖ ស្ពានអាកាស ស្ពានឆ្លងទន្លេ ផ្លូវថ្នល់ ការផ្គត់ផ្គង់អគ្គិសនី និងប្រព័ន្ធទឹកស្អាតជាដើម ដោយធ្វើយ៉ាងណា លើកកម្ពស់សេដ្ឋកិច្ច កិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ។
ពាក់ព័ន្ធនឹងគម្រោងគាំទ្ររបស់ជប៉ុននេះ លោកបណ្ឌិត ឆេង គឹមឡុង នាយកនៃមជ្ឈមណ្ឌលនវានុវត្តន៍ផ្នែកអភិបាលកិច្ច និងប្រជាធិបតេយ្យនៃវិទ្យាស្ថានចក្ខុវិស័យអាស៊ីបានយល់ឃើញថា ខេត្តព្រះសីហនុ គឺជាប៉ូលសេដ្ឋកិច្ចពិសេស និងជាគោលដៅច្រកចេញចូលរបស់កម្ពុជានាពេលអនាគតដ៏មានសក្តានុពល។ រដ្ឋាភិបាល ត្រូវតែអភិវឌ្ឍន៍ទីក្រុងមួយនេះឲ្យទំនើបជាងទីក្រុងភ្នំពេញ ជាពិសេសការពង្រើកតំបន់សេដ្ឋកិច្ចពិសេស និងកំពង់ផែទឹកជ្រៅ។
លោកបណ្ឌិតបន្តថា ការគាំទ្ររបស់ភាគីជប៉ុននាពេលនេះ គឺជាសញ្ញាល្អ មួយសម្រាប់ជំរុញកំណើនសេដ្ឋកិច្ចកម្ពុជា ហើយកម្ពុជាសង្ឃឹមថាកំពង់ផែខ្នាតអន្តរជាតិរបស់កម្ពុជា នឹងចាប់ផ្ដើមរីកចម្រើនកាន់តែខ្ពស់បន្ថែមទៀត ខណៈកម្ពុជា ក៏មានកិច្ចព្រមព្រៀងពាណិជ្ជកម្មសេរីជាមួយចិន កិច្ចព្រមព្រៀងពាណិជ្ជកម្មសេរីជាមួយនឹងកូរ៉េខាងត្បូង និង កិច្ចព្រមព្រៀងពាណិជ្ជកម្មសេរីសហភាពសេដ្ឋកិច្ចអឺរ៉ាស៊ា (EAEU) បូករួមជាមួយការអនុគ្រោះពន្ធការនាំចេញរបស់កម្ពុជាពីសហរដ្ឋអាមេរិក ចក្រភពអង់គ្លេស និង EBA របស់សហគមន៍អឺរ៉ុបផង នោះចរាចរណ៍ទំនិញ និងការដឹកជញ្ចូនក៏កាន់តែច្រើន។
គួរជម្រាបថា បច្ចុប្បន្នក្រសួងសាធារណការ និងដឹកជញ្ជូនកំពុងបន្តពង្រីក កំពង់ផែ និងបង្កើតប្រព័ន្ធកំពង់ផែ EDI (Electronic Data Intercharge) ដែលនឹងអាចជួយសម្រួលដល់នីតិវិធីផ្លូវការ នៃនាវាចេញចូលកំពង់ផែកម្ពុជា។ ការបង្កើតប្រព័ន្ធនេះ ក៏ដើម្បីពន្លឿននីតិវិធីចេញចូលរបស់នាវា ការកាត់បន្ថយថ្លៃដើមដឹកជញ្ជូនទំនិញតាមផ្លូវសមុទ្រ ការស្តុកទំនិញ ក៏ដូចជាដើម្បីឆ្លើយតបទៅនឹងកំណើនវិនិយោគពីបរទេស ជាពិសេសសំដៅធ្វើឱ្យកម្ពុជាក្លាយជាទីតាំងយុទ្ធសាស្ត្រមួយប្រកបដោយការប្រកួតប្រជែងនៅតំបន់អាស៊ី ទាក់ទងនឹងវិស័យភស្តុភារកម្ម និងការដឹកជញ្ជូន។
បើតាមក្រសួងសាធារណការ កម្ពុជាក៏កំពុងពង្រីកសមត្ថភាពកំពង់ផែស្វយ័តក្រុងព្រះសីហនុបន្ថែមទៀត តាមរយៈការកសាងចំណតផែកុងតឺន័រថ្មីមួយ ជម្រៅទឹក១៤.៥ម៉ែត្រ ប្រវែង៣៥០ម៉ែត្រ ដែលនឹងធានាដល់ការចូលចតនាវាកុងតឺន័រខ្នាតធំៗ មានចំណុះរហូតដល់ទៅ៦ម៉ឺនតោន ឬស្មើនឹង៩៣% នៃចំនួននាវាប្រចាំតំបន់អាស៊ី-ប៉ាស៊ីហ្វិកនៅដើមឆ្នាំ២០២៣ ដើម្បីឆ្លើយតបទៅនឹងការកើនឡើងនៃបរិមាណកុងតឺន័រឆ្លងកាត់កំពង់ផែមួយនេះ ក្នុងពេលបច្ចុប្បន្ន និងនាពេលអនាគត ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ