ចិនគោរពតាមការសម្រេចចិត្តរបស់កម្ពុជានៅក្នុងសំណុំរឿងសង្គ្រាមរវាងរុស្ស៊ីនិងអ៊ុយក្រែន
លោកនាយករដ្ឋមន្ត្រី ហ៊ុន សែន បានជួបសន្ទនាតាមខ្សែទូរសព្ទជាមួយលោកប្រធានាធិបតីចិន ស៊ី ជិនពីង នៅថ្ងៃទី១៨មីនាម្សិលមិញ។ ជំហររបស់កម្ពុជាគាំទ្រអ៊ុយក្រែនប្រឆាំងរុស្ស៊ី នៅក្នុងកិច្ចប្រជុំ ពិសេសបន្ទាន់មួយរបស់អង្គការសហប្រជាជាតិកាលខែមីនា ក៏ត្រូវបានលើកឡើងនៅក្នុងជំនួបតាមខ្សែទូរសព្ទនោះដែរ។ លោកស៊ី ជីនពីន អះអាងប្រាប់លោកប្រមុខរដ្ឋាភិបាលកម្ពុជាថា ប្រទេសចិនគោរពសិទ្ធិសម្រេចចិត្តនិងជំហររបស់កម្ពុជាសំណុំរឿងសង្គ្រាមរវាងរុស្ស៊ីនិងអ៊ុយក្រែន។ នេះបើយោងតាមការចុះផ្សាយរបស់កាសែត CHINA DAILY។
ចុះផ្សាយនៅថ្ងៃ៖
ស្តាប់ - ០២:០៨
មិនមែនតែកម្ពុជាទេ នៅក្នុងសំណុំរឿងសង្គ្រាមរវាងរុស្ស៊ីនិងអ៊ុយក្រែន លោក ស៊ី ជីនពីន ក៏បានជួបសន្ទនាជាមួយមេដឹកនាំប្រទេសអាហ្វ្រិកខាងត្បូងដែរ។ នៅក្នុងជំនួបដោយឡែកពីគ្នាតែក្នុងគោលដៅរួមមួយ មេដឹកនាំចិនលោក ស៊ី ជីនពីន បានបង្ហាញពីការគោរពសិទ្ធិសម្រេចចិត្តនិងជំហររបស់ប្រទេសនីមួយៗ ទាំងកម្ពុជានិងអាហ្វ្រិកខាងត្បូង នៅក្នុងសំណុំរឿងសង្គ្រាមរវាងរុស្ស៊ីនិងអ៊ុយក្រែន។
សម្រាប់ប្រទេសកម្ពុជា យោងតាមការចុះផ្សាយរបស់កាសែត CHINA DAILY លោក ស៊ី ជីនពីង បានចាត់ទុកជំហរកម្ពុជាដែលបានបោះឆ្នោតគាំទ្រអធិបតេយ្យភាព និងបូរណភាពទឹកដីអ៊ុយក្រែន និងទាមទារឲ្យរុស្ស៊ីដកកងទ័ពចេញពីអ៊ុយក្រែន ជាការសម្រេចចិត្តដោយឈរលើជំហរឯករាជ្យ និងថា វាជាសិទ្ធិផ្ដាច់មុខរបស់កម្ពុជាក្នុងការសម្រេចចិត្តបែបនេះ។
សូមជម្រាបជូនថា ក្រៅពីសម្រេចបោះឆ្នោតគាំទ្រអធិបតេយ្យ និងបូរណភាពទឹកដីរបស់អ៊ុយក្រែន ហើយទាមទារឲ្យរុស្ស៊ីដកកងទ័ពចេញពីអ៊ុយក្រែនជាបន្ទាន់ និងដោយគ្មានលក្ខខណ្ឌ ប្រទេសកម្ពុជា ក៏បានចូលរួមជា Co-Sponsor គឺជាប្រទេសចូលរួមផ្តួចផ្តើម ឬយល់ព្រមឲ្យគេកត់ត្រាថា ជាប្រទេសចូលរួមផ្តួចផ្តើមសេចក្តីព្រាងនៃសេចក្តីសម្រេចចិត្តរបស់អង្គការសហប្រជាជាតិ។
លោក គិន ភា នាយកវិទ្យាស្ថានទំនាក់ទំនងអន្តរជាតិនៃរាជ្យបណ្ឌិតសភាកម្ពុជាមើលឃើញថា នៅក្នុងជំហរគាំទ្រអ៊ុយក្រែនប្រឆាំងរុស្ស៊ីនេះ កម្ពុជាបានប្រើប្រាស់សិទ្ធិអធិបតេយ្យរបស់ខ្លួនផ្អែកលើមូលដ្ឋានសំខាន់បីៈ រដ្ឋធម្មនុញ្ញកម្ពុជា ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។ នៅក្នុងបរិបទអាស៊ានសំឡេងកម្ពុជាមានសារៈសំខាន់តំណាងឲ្យអាស៊ានទាំងមូលបង្ហាញពីជំហរគាំទ្រអ៊ុយក្រែន ក្នុងនាមជាប្រធានអាស៊ាននៅឆ្នាំ២០២២នេះ។
ក្រៅពីបញ្ហាក្នុងតំបន់និងពិភពលោក លោក ហ៊ុន សែន និងលោក ស៊ី ជីនពីន ក៏បានលើកឡើងពីទំនាក់ទំនងទ្វេភាគីរវាងកម្ពុជានិងចិនដែរ។
តាមរយៈកិច្ចសន្ទនាតាមទូរសព្ទដដែល ចិនសន្យាផ្ដល់វ៉ាក់សាំង២០លានដូសទៀតដល់កម្ពុជា និងបានប្រកាសធ្វើការរួមគ្នាក្នុងការបង្កើតរោងចក្រផលិតវ៉ាក់សាំងកូវីដ១៩ នៅកម្ពុជាផងដែរ។ បន្ថែមលើនេះមេដឹកនាំចិនក៏បានលើកឡើងពីសារៈប្រយោជន៍ដែលកម្ពុជាទទួលបានពីកិច្ចព្រមព្រៀងសេរីកម្ពុជា ចិន ដែលបានបើកផ្លូវឲ្យកម្ពុជានាំអង្ករទៅចិនឲ្យបានកាន់តែច្រើនជាងមុន ព្រមទាំងផលិតផលកសិកម្មមួយចំនួនទៀត ដូចជាផ្លែ ចេក ស្វាយ និងផ្លែមៀនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ