កម្ពុជា៖ វេទិកាសិទ្ធិមនុស្សអន្តរជាតិលើកនេះ មានលក្ខណៈស្ថាបនា មិនមែនជាវេទិកាបន្ទុះបង្អាប់
រដ្ឋាភិបាលកម្ពុជាចាត់ទុកកិច្ចប្រជុំការពាររបាយការណ៍ជាតិ ពាក់ព័ន្ធនឹងការអនុវត្តន៍កតិកាសញ្ញាអន្តរជាតិ ស្តីពីសិទ្ធិពលរដ្ឋ និសិទ្ធិនយោបាយរយៈពេល៣ថ្ងៃមកនេះថា ជាកិច្ចសន្ទនាមានលក្ខណៈស្ថាបនា ដែលផ្តល់ឱកាសឲ្យកម្ពុជាបង្ហាញនូវសមិទ្ធផលនានាដែលសម្រេចបាន។ បើតាមគណៈកម្មាធិការសិទ្ធិមនុស្សកម្ពុជា គណៈប្រតិភូកម្ពុជាមានពេលគ្រប់គ្រាន់ក្នុងការពន្យល់ បំភ្លឺ និងបកស្រាយ លើបញ្ហាមួយចំនួន ពោលកិច្ចប្រជុំនេះ មិនមែនជាវេទិកាបន្ទុះបង្អាប់ រិះគន់ ឬវាយប្រហារលើផ្នែកសិទ្ធិមនុស្សនោះឡើយ។
ចុះផ្សាយនៅថ្ងៃ៖
ស្តាប់ - ០១:៣៣
ក្នុងសេចក្តីប្រកាសព័ត៌មានថ្ងៃទី១១មីនា បញ្ជាក់ថា គណៈប្រតិភូនៃគណៈកម្មាធិការសិទ្ធិមនុស្សកម្ពុជា ដឹកនាំដោយ លោក ជិន ម៉ាលីន បានចូលរួមប្រជុំតាមអនឡាញជាមួយតំណាងរដ្ឋនៃភាគីកតិកាសញ្ញាអន្តរជាតិ ស្តីពីសិទ្ធិពលរដ្ឋ និសិទ្ធិនយោបាយ ដែលមានរយៈពេល៣ថ្ងៃ ចាប់ពីថ្ងៃទី៩ដល់ថ្ងៃទី១១មីនា២០២២នេះ។
បញ្ហានិទណ្ឌភាព អំពុករលួយ អំពើទារុណកម្ម ច្បាប់ប្រឆាំងកូវីដ១៩ ការដកហូតសេរីភាព ឯករាជ្យភាពតុលាការ ការសម្លាប់មនុស្សក្រៅប្រព័ន្ធ សិទ្ធិនយោបាយ និងការបោះឆ្នោត ការជួញដូរមនុស្ស ជាដើម គឺសុទ្ធសឹងជាប្រធានបទសំខាន់ៗដែលត្រូវបានលើកក្នុងកិច្ចប្រជុំលើកទី១៣៤របស់គណៈកម្មាធិការសិទ្ធិមនុស្សអន្តរជាតិជុំទី៣។
បើតាមគណកម្មាធិការសិទ្ធិមនុស្សកម្ពុជា គឺគណប្រតិភូកម្ពុជាមានឱកាសគ្រប់គ្រាន់ក្នុងការបំភ្លឺ បកស្រាយ និងពន្យល់បន្ថែមលើប្រធានបទទាំងអស់នេះ ហើយទុកវេទិកានេះថា ជាកិច្ចសន្ទនាមានលក្ខណៈស្ថាបនា។
បើតាមតំណាងរដ្ឋាភិបាលកម្ពុជា កិច្ចសន្ទនាបែបស្ថាបនានេះ បានផ្តល់ជាវេទិកាសម្រាប់កម្ពុជាដែលរដ្ឋនៃភាគីICCPR ក្នុងការបង្ហាញនូវសមិទ្ធិផលនានាដែលសម្រេចបាន ដើម្បីពន្យល់បកស្រាយ ចំពោះការចោទប្រកាន់ផ្សេងៗ ពាក់ព័ន្ធនឹងសិទ្ធិពលរដ្ឋ និងសិទ្ធិនយោបាយ។
សូមបញ្ជាក់ថា ក្រោយពីកិច្ចសន្ទនានេះ គណៈកម្មាធិការ សិទ្ធិមនុស្សនៃអង្គការសហប្រជាជាតិនឹងចេញអនុសាសន៍ផ្សេងៗ សម្រាប់ឲ្យរដ្ឋនៃភាគីពិនិត្យ និងពិចារណាក្នុងការអនុវត្តន៍បន្តទៀត ដើម្បីធ្វើឲ្យសិទ្ធិពលរដ្ឋ និងសិទ្ធិនយោបាយកាន់តែប្រសើរថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ