មេធាវីការពាររដ្ឋាភិបាល៖ការដែលថាតុលាការមិនមានភស្តុតាងករណី លោក កឹម សុខា គឺជាការបំភ័ន្តមតិ
ក្រុមមេធាវីការពារក្តីឲ្យរដ្ឋាភិបាលកម្ពុជា កាលពីល្ងាចម្សិលមិញនេះ បានចេញសេចក្តីបំភ្លឺ លើសំណុំរឿងលោក កឹម សុខា ដែលត្រូវបានជាប់ចោទពីបទ «សន្ទិដ្ឋិភាពជាមួយបរទេស»។ ប្រតិកម្មតបពីសំណាក់ក្រុមមេធាវីការពារក្តីឲ្យរដ្ឋាភិបាល គឺធ្វើឡើងបន្ទាប់ពីលោក កឹម សុខា បានប្រាប់ក្រុមអ្នកសារព័ត៌មាននៅមុនទៅចូលរួមសវនាការនៅថ្ងៃទី២មីនាថា តុលាការនៅមិនមានភស្តុតាងដាក់បន្ទុកលើការចោទប្រកាន់លោកនៅឡើយ ខណៈឈ្មោះប្រទេសដែលចោទថាជាប់ពាក់ព័ន្ធនោះ គឺមិនត្រូវបានបញ្ចេញ។
ចុះផ្សាយនៅថ្ងៃ៖
ស្តាប់ - ០២:២៤
នាំមុខដោយមេធាវី គី តិច ក្រុមសហមេធាវីការពារក្តីឲ្យរដ្ឋាភិបាលកម្ពុជាចំនួន៤រូប បានកត់សំគាល់ថា រយៈពេលថ្មីៗនេះ ជាពិសេសក្រោយពេលសវនាការកាល ពីថ្ងៃទី២៣ ខែកុម្ភៈ និង ថ្ងៃទី២ ខែមីនា ឆ្នាំ២០២២ សហមេធាវីការពារក្តីលោក កឹម សុខា បានព្យាយាមបំភ្លៃការពិតថា តុលាការពុំមានភស្តុតាងគ្រប់គ្រាន់ដើម្បីចោទប្រកាន់ ក្នុងបទសន្ទិដ្ឋិភាពជាមួយបរទេស តាមបញ្ញត្តិមាត្រា៤៤៣ នៃក្រមព្រហ្មទណ្ឌឡើយ។
បើតាមមេធាវីដើមបណ្តឹង តាមគោលការណ៍នីតិវិធីព្រហ្មទណ្ឌកម្ពុជា គ្រប់ភាគីទាំងអស់ក្នុងសំណុំរឿងអាចដាក់បញ្ចូលភស្តុតាងដោយសេរីជូនតុលាការពិនិត្យ និងពិភាក្សាដេញដោល ដើម្បីធ្វើជាមូលដ្ឋាន ក្នុងការដាក់បន្ទុក ឬដោះបន្ទុក និងសន្និដ្ឋាន។ ជាក់ស្តែងនីតិវិធីដែលបានអនុវត្តក្នុងរយៈពេលបីសប្តាហ៍កន្លងមកនេះ គឺស្ថិតក្នុងដំណាក់កាល ពិនិត្យលើភស្តុតាង ដែលបានដាក់ចូលតុលាការដោយជនជាប់ចោទ និងសហមេធាវីការពារក្តីលោក កឹម សុខា ហេតុដូច្នេះពុំមានភាពចម្លែកទេ ដែលជនជាប់ចោទកំពុងប្រឹងប្រែងធ្វើការដោះបន្ទុកពីការចោទប្រកាន់ និងការដាក់បន្ទុកដែលមានភាពរឹងមាំពីតំណាងអយ្យការ។
ក្រុមមេធាវីការពាររដ្ឋាភិបាល បានហៅ ការព្យាយាមផ្សព្វផ្សាយរបស់សហមេធាវីការពារក្តីឱ្យលោក កឹម សុខា គឺគ្រាន់តែជាចេតនាបំភ្លៃ និងបំភ័ន្តមតិសាធារណៈជាតិ និងអន្តរជាតិតែប៉ុណ្ណោះ។
ប្រាប់វិទ្យុបារាំងអន្តរជាតិRFIនៅថ្ងៃទី៤មីនា លោកស្រី ម៉េង សុភារី សហមេធាវីការពារក្តីលោក កឹម សុខា ថ្លែងថា រហូតមកដល់ពេលនេះគឺនៅមិនមានភស្តុតាងគ្រប់គ្រាន់ចោទប្រកាន់កូនក្តីរបស់លោកស្រីនៅឡើយគឺមានតែវីដេអូខ្លីៗដែលគេកាត់ត។ លោកស្រីអះអាងថាលោក កឹម សុខា មិនបានឃុបឃិតនឹងបរទេសណាដើម្បីបំផ្លាញប្រទេសកម្ពុជាឡើយ។
សូមបញ្ជាក់ថា នៅមុនទៅចូលរួមសវនាការនៅថ្ងៃទី២មីនា២០២២ លោក កឹម សុខា បានប្រាប់ក្រុមអ្នកសារព័ត៌មានជាតិ និងអន្តរជាតិដែលទៅរង់ចាំមុខផ្ទះរបស់លោកថា តុលាការនៅមិនមានភស្តុតាងដាក់បន្ទុកលើការចោទប្រកាន់លោកនៅឡើយ ខណៈឈ្មោះប្រទេសដែលចោទថាជាប់ពាក់ព័ន្ធនោះ គឺមិនត្រូវបានបញ្ចេញ។ ដោយប្រកាសគាំទ្រចំពោះអ្វីដែលោក ហ៊ុន សែន អំពាវនាវឲ្យមានការចរចាគ្នារកដំណោះស្រាយនៃជម្លោះផ្ទៃក្នុងភូមា និងជម្លោះផ្ទៃក្នុងអាហ្គានីស្ថាន លោកកឹម សុខា ជឿថា ករណីរបស់លោកគឺមានតែការចរចាទេ ទើបតុលាការអាចរកយុត្តិធម៌ជូនលោកពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ