អ្នកនាំពាក្យហ្វ៊ុនស៊ិនប៉ិចថា បក្សមិនចាប់អារម្មណ៍នឹងការកៀងគរហៅមន្ត្រីខ្លួនចុះចូលបក្សខ្មែររួបរួមជាតិទេ
អ្នកនាំពាក្យគណបក្សហ្វ៊ុនស៊ិនប៉ិច នៅថ្ងៃព្រហស្បតិ៍ទី៣មីនានេះ បានបង្ហាញជំហរមិនចាប់អារម្មណ៍នឹងការប្រកាសកៀងគរ មន្ត្រីរបស់ខ្លួនចុះចូលជាមួយគណបក្សខ្មែររួបរួមជាតិនោះទេ។ មិនត្រឹមតែមិនចាប់អារម្មណ៍ អ្នកនាំពាក្យដដែលអះអាងថា គណបក្សហ្វ៊ុនស៊ិនប៉ិច កំពុងតែមមាញឹករៀបចំរចនាសម្ព័ន្ធត្រៀមខ្លួនចូលរួមការបោះឆ្នោតក្រុមប្រឹក្សាឃុំ-សង្កាត់ នៅថ្ងៃទី៥មិថុនាឆ្នាំ២០២២ខាងមុខ ដោយដាក់បេក្ខភាពមន្ត្រីឃុំសង្កាត់ប្រមាណ៧០ភាគរយក្នុងចំណោមសមាជិកគាំទ្រជាង៤០ម៉ឺននាក់។
ចុះផ្សាយនៅថ្ងៃ៖
ស្តាប់ - ០២:១០
ជំហររបស់គណបក្សហ្វ៊ុនស៊ិនប៉ិចបែបនេះ ធ្វើឡើងមួយថ្ងៃបន្ទាប់ពី ក្រុមអតីតមន្ត្រីជាន់ខ្ពស់នៃគណបក្សហ៊្វុនស៊ិនប៉ិច ដែលត្រូវបានសម្តេចក្រុមព្រះបណ្តេញចេញបានធ្វើសន្និសីទសារព័ត៌មាន ដោយបរិហារជម្លោះផ្ទៃក្នុងគណបក្សហ្វុនស៊ិនប៉ិច កាលពីរសៀលថ្ងៃពុធទី២មីនាម្សិលមិញ។ លោក ញ៉េប ប៊ុនជិន ជាអតីតសមាជិកគណៈកម្មាធិការនាយកគណបក្សរាជានិយមហ៊្វុនស៊ិនប៉ិច បានគូសបញ្ជាក់នៅក្នុងសន្និសិទសារព័ត៌មាននោះថា គណបក្សរាជានិយមមួយនេះ បានចុះខ្សោយយ៉ាងខ្លាំងព្រោះតែគ្មានការបង្រួបង្រួមគ្នា បន្ទាប់ពីសម្តេចក្រុមព្រះនរោត្តមរណឬទ្ធិសោយទីវង្គត។
ក្រោយបរិហា លោក ញ៉េប ប៊ុនជិន ក៏បានប្រកាសពីចូលរួមធ្វើនយោបាយជាមួយគណបក្សខ្មែររួបរួមជាតិ។ គណបក្សខ្មែររួបរួមជាតិដឹកនាំដោយ លោក ញឹក ប៊ុនឆៃ ត្រូវបានក្រុមមន្ត្រីបក្សហ្វ៊ុនស៊ិនប៉ិចថា មានគោលការណ៍គាំទ្ររបបរាជានិយម និងថា ការចូលរួមធ្វើនយោបាយជាមួយគណបក្សខ្មែររួបរួមជាតិនេះ គឺដើម្បីផ្តុំកម្លាំង សម្រាប់ការបោះឆ្នោតនាពេលខាងមុខ។ បន្ថែមលើលោក ញ៉េប ប៊ុនជិន និងមន្ត្រីឯទៀតក៏បានប្រកាសកៀងគរ មន្ត្រីជាន់ខ្ពស់ជាច្រើន រួមទាំងអតីតសមាជិកគាំទ្របក្សដទៃទៀត ប្រមាណ៤០ម៉ឺននាក់ ចូលរួមជីវភាពនយោបាយជាមួយគណបក្សខ្មែររួបរួមជាតិទៀតផង។
ថ្លែងប្រាប់វិទ្យុបារាំងអន្តរជាតិនៅថ្ងៃព្រហស្បត្តិ៍ទី៣មីនានេះលោក ញឿន រ៉ាដែន មិនភ្ញាក់ផ្អើនឹងការប្រកាសចុះចូលជាមួយគណបក្សខ្មែររួបរួមជាតិពីសំណាក់ក្រុមមន្ត្រីអតីតគណបក្សហ្វ៊ុនស៊ិនប៉ិច ដែលនាំដឹកនាំដោយលោក ញ៉េប ប៊ុនជិន នោះទេ។ មិនចាប់អារម្មណ៍ក៏ព្រោះតែពួកគេត្រូវបានគណបក្សបញ្ចប់សមាជិកភាពរួចទៅហើយ។ ហើយដោយឡែកសម្រាប់ផ្ទៃក្នុងគណបក្សទាំងមូលក៏មិនមានរកាំរកូសអ្វីដែលក្រោយការបណ្ដេញមន្ត្រីមួយក្រុមនេះចេញ។ នេះបើតាមលោករ៉ាដែន។
ជាការកត់សម្គាល់ ការប្រកាសចូលគណបក្សខ្មែររួមរួបជាតិរបស់អតីតក្រុមមន្ត្រីគណបក្សហ្វ៊ុនស៊ិនប៉ិចនេះ ធ្វើឡើងបន្ទាប់ពីគណបក្សហ្វុនស៊ិនប៉ិចបានបោះឆ្នោតជ្រើសរើស ព្រះអង្គម្ចាស់ ចក្រាវុធ បុត្ររបស់សម្តេចក្រុមព្រះ ជាព្រះប្រធានគណបក្សហ៊្វុនស៊ិនប៉ិច នៅថ្ងៃទី៩កុម្ភៈ។ បើនិយាយដល់ការបែកបាក់ផ្ទៃក្នុងគណបក្សហ្វ៊ុនស៊ិនប៉ិច សឹងតែលែងក្លាយជាប្រធានបទគួរឲ្យចាប់អារម្មណ៍តាមដានសម្រាប់អ្នកវិភាគនយោបាយនៅកម្ពុជាទៀតហើយ។ ជាគណបក្សដែលធ្លាប់ទទួលបានការគាំទ្រដោយសំឡេងច្រើនលើសលប់នៅក្នុងការបោះឆ្នោតកាលពីឆ្នាំ១៩៩៣ ក្នុងអាសនៈចំនួន៥៨នៃអាសនៈសរុបចំនួន១២០ ប្រែជាធ្លាក់ដល់សូន្យគ្មានអាសនៈនៅក្នុងការបោះឆ្នោតនាឆ្នាំ២០១៣ និងការបោះឆ្នោតឆ្នាំ២០១៨ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ