ករណីរុស្ស៊ី-អ៊ុយក្រែន៖ លោក ហ៊ុន សែន ជំទាស់នឹងការប្រើប្រាស់កម្លាំង និងការគម្រាមប្រើប្រាស់កម្លាំងប្រឆាំងភាគី១ទៀត
ដោយសំដៅទៅលើសង្គ្រាមរវាងរុស្ស៊ី និងអ៊ុយក្រែន លោកនាយករដ្ឋមន្ត្រី ហ៊ុន សែន ជាថ្មីម្តងទៀតបានលើកឡើងថាលោកមិនគាំទ្រការប្រើប្រាស់កម្លាំង ឬការគម្រាមកំហែងប្រើប្រាស់កម្លាំងពីភាគីមួយប្រឆាំងភាគីមួយទៀត និងមិនលើកទឹកចិត្តឲ្យមានការផ្តល់ជំនួយយោធាទៅកាន់ភាគីណាមួយឡើយ។ ជំហរផ្លូវការរបស់លោកនាយករដ្ឋមន្ត្រី ក្នុងនាមប្រទេសកម្ពុជាដូច្នេះ ធ្វើឡើងខណៈពេលដែលលោកធ្វើជាអធិបតីនៃពិធីសម្ពោធដាក់ឲ្យប្រើប្រាស់ផ្លូវជាតិលេខ៣ ភ្នំពេញ-កំពត នាព្រឹកថ្ងៃពុធ ទី២ខែមីនានេះ។
ចុះផ្សាយនៅថ្ងៃ៖
ស្តាប់ - ០២:០៥
ដូចដែលលោកធ្លាប់លើកឡើងកន្លងមកនៅឯអង្គការសហប្រជាជាតិ នៅឯចលនាមិនចូលបក្សសម្ព័ន្ធ និងនៅវេទិកាត្បូង ត្បូង លោកនាយករដ្ឋមន្ត្រី ហ៊ុន សែន បានថ្លែងថាលោកមិនលើកទឹកចិត្ត និងជំទាស់ចំពោះការប្រើប្រាស់កម្លាំង ឬការគម្រាមកំហែងប្រើប្រាស់កម្លាំងប្រឆាំងនឹងភាគីមួយទៀត។
លោកនាយករដ្ឋមន្ត្រីកត់សម្គាល់ថា ការវាយប្រហារពីសំណាក់រុស្ស៊ីលើអ៊ុយក្រែន ពេលនេះកំពុងក្លាយជា អឺរ៉ុបនីយកម្មសង្គ្រាមជាមួយរុស្ស៊ី ដោយសារតែលោកទទួលស្គាល់ថាពីដំបូងគឺជារូបភាពនៃការវាយប្រហារពីរុស្ស៊ីលើអ៊ុយក្រែនពិតប្រាកដ។ ក៏ប៉ុន្តែពេលនេះ មិនដូច្នោះទេ តាមលោក ហ៊ុន សែន ប្រទេសនានានៅអឺរ៉ុបបាននាំគ្នាលើកទឹកចិត្តប្រគល់ទាំងមនុស្សឲ្យទៅជួយច្បាំងនៅអ៊ុយក្រែន ផ្តល់ជំនួយយោធាទាំងអាវុធ និងយន្តហោះចម្បាំង រួមទាំងអ្នកបើកបរយន្តហោះប្រយុទ្ធថែមទៀត។ ទិដ្ឋភាពបែបនេះ លោកថា មិនមែនជាសង្គ្រាមរុស្ស៊ី-អ៊ុយក្រែនទៀតទេ គឺវាជាសង្គ្រាមរវាងរុស្ស៊ី និងអឺរ៉ុប។
លោកនាយករដ្ឋមន្ត្រី ហ៊ុន សែន នៅតែបញ្ជាក់ថា«គេមិនអាចយកសង្គ្រាមទៅបញ្ជប់សង្គ្រាមបានទេ» ហើយភាគីទាំង២ មិនអាចផ្តួលរំលំ និងកំទេចកម្លាំងយោធាគ្នាទៅវិញទៅមកបានទេ ដោយលោកលើកបទពិសោធន៍ថាអ៊ុយក្រែនកំពុងប្រើយុទ្ធវិធីសង្គ្រាមឈ្លប ដោយវាយកាត់ផ្តាច់ក្បួនទ័ពរុស្ស៊ីជាកង់ៗ។
ជាមួយគ្នានេះ ប្រមុខរដ្ឋាភិបាលកម្ពុជាទទួលស្គាល់ថាលោកពិបាកនឹងប្រកាន់ជំហរឥរិយាបទរបស់កម្ពុជា ដោយសារនេះជាអន្តរជាតូបនីយកម្មសង្គ្រាម។ លោកសង្ឃឹមថាភាគីទាំងសង្ខាង ដែលជាមិត្តភក្តិ នឹងយោគយល់ដល់ជំហរកម្ពុជា ដែលត្រូវប្រកាន់យកនៅតាមវេទិកាអន្តរជាតិនានា ដោយមិនគួរចាប់បង្ខំកម្ពុជាឲ្យទៅគាំទ្រភាគីម្ខាងៗនោះទេ។
ទោះយ៉ាងណា លោក ហ៊ុន សែន នៅតែលើកទឹកចិត្ត និងមានការជឿជាក់លើការចរចាដូចជាការអំពាវនាវរបស់អាស៊ានកាលពីពេលថ្មីៗនេះដែរ បើទោះណាជាការចរចារបស់ប្រតិភូទីក្រុងគៀវ និងម៉ូស្គូជុំទី១មិនមានលទ្ធផលក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ