អ្នកឃ្លាំមើល៖ គួរតែដាក់ពិន័យលើមន្ត្រីរាជការដែលទៅបម្រើបក្សក្នុងម៉ោងរដ្ឋ
អ្នកឃ្លាំមើលខាងប្រជាធិបតេយ្យបានស្វាគមន៍ ការដែលរដ្ឋមន្រ្តីក្រសួងមហាផ្ទៃ លោក ស ខេង បានណែនាំទៅមន្រ្តីរាជការស៊ីវិលកុំឲ្យយកម៉ោងបម្រើការងាររដ្ឋ ទៅបម្រើឲ្យសកម្មភាពគណបក្សណាមួយ។ ប៉ុន្តែសម្រាប់អ្នកឃ្លាំមើល ដើម្បីឲ្យសេចក្តីណែនាំនេះ មានប្រសិទ្ធភាព គឺគួរតែដាក់ពិន័យលើមន្ត្រីរាជការណាដែលទៅបម្រើបក្សក្នុងម៉ោងរដ្ឋ ខណៈក្នុងច្បាប់ស្តីពីសហលក្ខខន្តិកៈមន្ត្រីរាជការក៏បានហាមប្រាមផងដែរ។
ចុះផ្សាយនៅថ្ងៃ៖
ស្តាប់ - ០២:២២
ប្រធានវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ច័ន្ទរឿន ប្រាប់វិទ្យុបារាំងអន្តរជាតិRFIនៅថ្ងៃសុក្រនេះថា នៅក្នុងច្បាប់ស្តីពីសហលក្ខខន្តិកៈមន្ត្រីរាជការគឺបានចែងមិនឲ្យមន្ត្រីរាជការស៊ីវិលយកម៉ោងរដ្ឋ សំភារៈរបស់រដ្ឋទៅបម្រើឲ្យការងារបុគ្គល ឬការងារគណបក្សណាមួយនោះឡើយ។ ការហាមប្រាមយ៉ាងដូច្នេះគឺដើម្បីជៀសវាងកុំឲ្យកើតទំនាស់ផលប្រយោជន៍ និងធ្វើឲ្យមានអំពើអយុត្តិធម៌ ទោះបីជាពលរដ្ឋម្នាក់ៗមានសិទ្ធិជ្រើសរើសឬគាំទ្រគណបក្សនយោបាយណាមួយក៏ដោយ។
ដើម្បីឲ្យសេចក្តីណែនាំមានប្រសិទ្ធភាព លោកបណ្ឌិត ប៉ា ច័ន្ទរឿន លើកឡើងថា ក្រសួងមហាផ្ទៃត្រូវមានយន្តការតាមដានការអនុវត្តន៍ជាក់ស្តែង ហើយប្រសិនបើមានករណីមន្ត្រីណាមួយបំពាបំពាននឹងបំរាមនេះ គួរតែធ្វើការដាក់ពិន័យ។
សូមបញ្ជាក់ថា កាលពីថ្ងៃទី២២ ខែកុម្ភៈ លោក ស ខេង រដ្ឋមន្រ្តីមហាផ្ទៃ បានចេញលិខិតមួយណែនាំទៅមន្រ្តីរាជការស៊ីវិល កុំឲ្យយកម៉ោងបម្រើការងាររដ្ឋ ទៅបម្រើឲ្យសកម្មភាពគណបក្សណាមួយ។ ការណែនាំនេះ ធ្វើឡើង នៅខណៈដែលមន្ត្រីរាជការមួយចំនួន បានសុំច្បាប់ឈប់សម្រាករបស់មន្រ្តីរាជការស៊ីវិល និងការសុំច្បាប់ឈប់ពិសេសរបស់មន្រ្តីរាជការស៊ីវិល ដើម្បីបានឈរឈ្មោះជាបេក្ខជនបោះឆ្នោតជ្រើសរើសក្រុមប្រឹក្សាឃុំ-សង្កាត់។
ក្រៅពីមិនឲ្យទៅបម្រើការងារឲ្យគណបក្សនយោបាយនៅក្នុងម៉ោងធ្វើការងាររដ្ឋ លោក ស ខេង ក៏បានហាមប្រាមផងដែរ មិនឲ្យប្រើប្រាស់ថវិកា សម្ភារៈ ទីកន្លែង និង មធ្យោយដឹកជញ្ជូនរបស់រដ្ឋ ដើម្បីធ្វើសកម្មភាពឃោសនាបោះឆ្នោតឲ្យគណបក្សនយោបាយណាមួយឡើយ។
លោករដ្ឋមន្ត្រីមហាផ្ទៃ ក៏បានដាស់តឿន មន្រ្តីរាជការស៊ីវិលទាំងអស់ ឲ្យមានអព្យាក្រឹតក្នុងសកម្មភាពការងារស្របតាមច្បាប់ស្តីពីការលក្ខន្តិកៈមន្រ្តីរាជការស៊ីវិល ហើយនៅក្នុងរយៈពេលឃោសនាបោះឆ្នោត មន្រ្តីរាជការស៊ីវិល និងអាជ្ញាធរដែនដីគ្រប់លំដាប់ថ្នាក់ ត្រូវអនុវត្តឲ្យបានម៉ឺងម៉ាត់តាមច្បាប់ បទបញ្ជា និង នីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់។
ចំពោះមន្រ្តីរាជការ ដែលមានបំណងឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ មន្រ្តីរាជការនោះ ត្រូវដាក់ពាក្យសុំឈប់ពិសេស ឲ្យបានយ៉ាងតិចមុន៧ថ្ងៃ នៃការមកដល់ថ្ងៃបើកយុទ្ធនាការឃោសនា ខណៈ ការបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលមានរយៈពេល១៤ថ្ងៃ នឹងចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ