លោកឃឹម ហ្វីណង់៖ លោកនឹងចុះពីតំណែងជាអភិបាលស្រុកបន្ទាយស្រី ប្រសិនបើលោកពិតជារំលោភដីឯកជនមែន
អភិបាលស្រុកបន្ទាយស្រី លោកឃឹម ហ្វីណង់ នៅព្រឹកថ្ងៃចន្ទ ទី២១ កុម្ភៈបានអះអាងថា លោកនឹងចុះចេញពីតំណែងជាអភិបាលស្រុកបន្ទាយស្រី និងត្រៀមប្រឈមមុខផ្លូវច្បាប់ ប្រសិនបើតុលាការរកឃើញថា លោកពិតជាបានញុះញង់ រំលោភយកដីកម្មសិទ្ធឯកជន និងបទចោទ មិនគោរពសេចក្តីសម្រេចរបស់តុលាការជាដើម។ ការបញ្ជាក់បែបធ្វើឡើង បន្ទាប់ពីអភិបាលស្រុករូបនេះ ត្រូវបានលោកស្រី លី អ៊ុំអេង ជាប្រជាពលរដ្ឋបានដាក់ពាក្យបណ្តឹងថា លោកបានចុះវាស់វែងដីកម្មសិទ្ធរបស់ខ្លួនជាង១៤៩ហិកតា ដោយមិនបានជូនដំណឹង និងមិនមានឯកសារត្រឹមត្រូវតាមផ្លូវច្បាប់។ បើតាម លោក ឃឹម ហ្វីណង់ ដីដែលភាគីដើមបណ្តឹងបានប្តឹងមកលោកនាពេលនេះ គឺជាដីកម្មសិទ្ធរបស់រដ្ឋសុទ្ធសាធ ដោយមិនមែនជារបស់ឯកជននោះឡើយ។ ហើយលោកស្នើឱ្យមានការចុះស៊ើបអង្កេត ឱ្យបានលម្អិតអំពីករណីនេះ ដើម្បីការពារភាពស្អាតស្អំរបស់មន្ត្រីរាជការក្នុងស្រុកបន្ទាយស្រីទាំងមូល។
ចុះផ្សាយនៅថ្ងៃ៖
យើងសូមការលើកឡើងរបស់លោក ឃឹម ហ្វីណង់ អភិបាលស្រុកបន្ទាយស្រី៖
សូមជម្រាបថា កាលពីថ្ងៃទី១៤ កុម្ភៈកន្លងទៅ លោកស្រី លី អ៊ុំអេង ជាប្រជាពលរដ្ឋរស់នៅក្នុងសង្កាត់ខ្នារ ក្រុងសៀមរាប ខេត្តសៀមរាប បានដាក់ពាក្យបណ្តឹងទៅកាន់ លោក ឃឹម ហ្វីណង់ អភិបាលស្រុកបន្ទាយស្រី ពីបទ ញុះញ៉ង់ រំលោភដីកម្មសិទ្ធឯកជន និងបទ មិនគោរពសេចក្តីសម្រេចរបស់តុលាការ។ ក្នុងពាក្យបណ្តឹងនោះ លោកស្រី លី អ៊ុំអេងបានអះអាងថា ខ្លួនបានទិញដីសរុបចំនួន២០០ហិកតា ក្នុងភូមិវៀងតាទុំ និងភូមិរំចេក ឃុំរំចេក ស្រុកបន្ទាយស្រី ខេត្តសៀមរាប ពីបុគ្គលចំនួន៤នាក់ ក្នុងទំហំដី៥ម៉ឺនម៉ែត្រការ៉េស្នើគ្នាចាប់តាំពីឆ្នាំ២០០៣។ និងថា ដីនោះបានចុះហត្ថលេខាទទួលស្គាល់ដោយមេភូមិ មេឃុំ និងលោក អ៊ង់ វង្ស អតីតអភិបាលស្រុកបន្ទាយស្រីថែមទៀតផង។ ក្នុងពាក្យបណ្តឹងនោះលោកស្រីបន្តថា នៅថ្ងៃទី២១ មករា លោកអភិបាលស្រុកថ្មីបានចុះវាស់វែងដីរបស់លោកស្រីទៅវិញ និងបានរំលោភលើសេចក្តីសម្រេចរបស់តុលាការថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ