សវនាការលោកកឹម សុខា បន្តជំនុំជម្រះ ដោយមេធាវីអះអាងថា មេបក្សប្រឆាំងរូបនេះ គ្មានប្រព្រឹត្តអ្វីខុស ដូចការចោទប្រកាន់
សវនាការលោក កឹម សុខា បានបន្តធ្វើឡើងនៅថ្ងៃពុធ ទី១៦កុម្ភៈ ក្រោយអាក់ខានកាលពីសប្តាហ៍កន្លងទៅ ដោយមូលហេតុមេធាវីដើមបណ្តឹងវិជ្ជមានកូវីដ១៩។ សវនាការនៅថ្ងៃពុធនេះ សំណុំរឿងលោកកឹម សុខា បានលើកមកជជែកវែកញែកលើភស្តុតាងជាវីដេអូមួយចំនួន ដើម្បីដោះបន្ទុកនៃបទចោទរបស់តុលាការ។ នេះបើតាមក្រុមសហមេធាវី លោក កឹម សុខា ថ្លែងប្រាប់អ្នកសារព័ត៌មាន ក្រោយអង្គជំនុំជម្រះ។ ជាលទ្ធផល ក៏មានអ្វីជាដុំកំភួនដែរ ដោយសវនាការនេះ នឹងធ្វើឡើងនៅថ្ងៃទី២៣កុម្ភៈជាបន្តទៀត។
ចុះផ្សាយនៅថ្ងៃ៖
ស្តាប់ - ០២:៣៤
ថ្លែងប្រាប់អ្នកសារព័ត៌មាន ពីមុខសាលាដំបូងរាជធានីភ្នំពេញ លោក ផែង ហេង មេធាវីការពារក្តីមួយរូបរបស់លោកកឹម សុខា បានបញ្ជាក់ថា សវនាការនៅថ្ងៃនេះ ក្រុមមេធាវីការពារក្តីលោកកឹម សុខា បានដាក់បង្ហាញវីដេអូខ្លីប ទី៧ដល់ទី១៥ ដើម្បីដោះបន្ទុកទៅនឹងបទចោទប្រកាន់របស់តុលាការក្រុងភ្នំពេញ។ ជាវីដេអូដែលបង្ហាញពីសមាជសង្រ្គោះជាតិ ដែលតែងតាំងលោក កឹម សុខា ជាប្រធានគណបក្ស និងការតាក់តែងគោលនយោបាយរបស់អតីតគណបក្សសង្រ្គោះជាតិ ដើម្បីឈានទៅរកការបោះឆ្នោត។ នេះបើតាមលោកមេធាវី ផែង ហេង។
ចំណែកឯ លោក ចាន់ ចេន មេធាវីការពារក្តីមួយរូបទៀត ក៏បានថ្លែងការពារកូនក្តីរបស់ខ្លួន លោក កឹម សុខា ថា ប្រធានអតីតគណបក្សសង្រ្គោះជាតិរូបនេះ មិនបានប្រព្រឹត្តអ្វីខុស ដូចទៅនឹងការចោទប្រកាន់របស់តុលាការនោះទេ។ លោក ចាន់ ចេន អះអាងថា ពាក្យពេចន៍របស់លោក កឹម សុខា បានសង្កត់ធ្ងន់ទៅលើដំណើររបស់អតីតបក្សសង្រ្គោះជាតិ សម្រាប់ការឈានទៅការបោះឆ្នោតប៉ុណ្ណោះ។
ទោះយ៉ាងណា សវនាការលើកទី៤នេះ បានភាពរកាំរកូសខ្លះរវាងក្រុមមេធាវីលោក កឹម សុខា និងអយ្យការអមតុលាការ។ លោក ផែង ហេង បានបញ្ជាក់ថា បញ្ហារកាំរកូសទាក់ទងទៅនឹងកាលបរិច្ឆេទច្បាស់លាស់នៃវីដេអូខ្លីប និងបញ្ហាបច្ចេកទេសមួយចំនួននៃឯកសារភស្តុតាង តែយ៉ាងណាក៏ត្រូវបានសម្របសម្រួលដោយតុលាការវិញ។
ជាការកត់សម្គាល់ នៅមុនមួយថ្ងៃនៃសវនាការលើកទី៤ ក្រោយផ្អឹកទុកអស់ពេលជាង២ឆ្នាំដោយសារកូវីដ១៩នេះ លោក កឹម សុខា នៅថ្ងៃទីអង្គារ ទី១៥កុម្ភៈ បានជួបលោកស្រី Sibille de Cartier ឯកអគ្គរដ្ឋទូតថ្មីនៃប្រទេសប៊ែលហ្ស៊ិកប្រចាំកម្ពុជា។
នៅក្នុងជំនួបនោះ លោកស្រី Sibille de Cartier បានគូសបញ្ជាក់ពីជំហប៊ែលហ្ស៊ិក ដែលនឹងតាមដានមើលសវនាការលោក កឹម សុខា ជាបន្តទៀត។ សម្រាប់អគ្គរដ្ឋទូតប៊ែលហ្ស៊ិកជានារីរូបនេះ ក៏មិនខុសពីបណ្តាអគ្គរដ្ឋទូតប្រទេសមួយចំនួនទៀតដែរ សុទ្ធតែប្រាថ្នាចង់ឃើញ លោក កឹម សុខា មានសិទ្ធិសេរីភាព នយោបាយពេញលេញ ដែលអាចឲ្យប្រធានអតីតគណបក្សប្រឆាំងមួយនេះ ចូលរួមការបោះឆ្នោត។
យ៉ាងណាមិញ ការពន្លឿននីតិវិធីជំនុំជម្រះនៅតែជាបញ្ហាចោទមួយ។ លោក ផែង ហេង ថ្លែងបន្ថែមថា ក្រុមសហមេធាវីនៅតែទទូចឲ្យតុលាការពន្លឿនសវនាការឲ្យឆាប់រហ័ស។ បើតាមមេធាវីរូបនេះ ការពន្យាពេលបន្តទៀត មានន័យថា មិនផ្តល់យុត្តិធម៌ឲ្យលោក កឹម សុខា និងរារាំងជីវិតនយោបាយរបស់លោក សម្រាប់ការបោះឆ្នោតពេលខាងមុខ។
គួរជម្រាបថា សវនាការលោក កឹម សុខា នឹងបន្តធ្វើឡើងនៅថ្ងៃពុធទី២៣កុម្ភៈ សប្តាហ៍ក្រោយ ខណៈក្រុមមេធាវីអះអាងថា នឹងចាក់បង្ហាញវីដេអូចំនួន២ និងឯកសារមួយចំនួនជាបន្តទៀត ដើម្បីដោះបន្ទុកបទចោទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ