CKFTA កំពុងបញ្ជូនទៅសភាកូរ៉េដើម្បីសុំសច្ចាប័ន ខណៈកម្ពុជាស្នើសុំពន្លឿន
លោកនាយករដ្ឋមន្រ្តី ហ៊ុន សែន បានស្នើទៅកាន់ លោក មូន ចេអ៊ីន ប្រធានាធិបតីកូរ៉េខាងត្បូង ជំរុញពន្លឿនដល់ការធ្វើសច្ចាប័ន ដើម្បីឱ្យកិច្ចព្រមព្រៀងពាណិជ្ជកម្មសេរីរវាងកម្ពុជា និងសាធារណរដ្ឋកូរ៉េ ចូលជាធរមាន។ សំណើររបស់លោក ហ៊ុន សែន ដូច្នេះ ធ្វើឡើងអំឡុងពេលជួបពិភាក្សាគ្នាទ្វេភាគីជាមួយប្រធានាធិបតីកូរ៉េ អំឡុងពេលទស្សនកិច្ចនៅកូរ៉េចាប់ពីថ្ងៃទី១១ ដល់ទី១៣ ខែកុម្ភៈ។
ចុះផ្សាយនៅថ្ងៃ៖
នៅក្នុងជំនួបជាមួយប្រធានាធិបតីកូរ៉ូខាងត្បូង លោក មូន ចេអ៊ីន កាលពីថ្ងៃទី១១ ខែកុម្ភៈ លោកនាយករដ្ឋមន្ត្រី ហ៊ុន សែន បានស្នើទៅលោក មូន ចេអ៊ីន ឲ្យជួយជំរុញពន្លឿនដល់ការធ្វើសច្ចាប័ន ដើម្បីឱ្យកិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េ(CKFTA) ចូលជាធរមាន។ កិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េ ត្រូវបានចុះហត្ថលេខារួចរាល់ហើយ កាលពីឆ្នាំទៅ បន្ទាប់ពីភាគីទាំងពីរបានឆ្លងកាត់ការចរចាគ្នាអស់ជាច្រើនជុំ និងបានបញ្ចប់នីតិវិធីផ្ទៃក្នុង។ នេះបើតាមលោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី ថ្លែងប្រាក់កាសែត។
នៅក្នុងឱកាសនោះដែរ លោកប្រធានាធិបតីកូរ៉េ មូន ចេអ៊ីន បានបញ្ជាក់ថាពាក់ព័ន្ធនឹងកិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េ ភាគីកូរ៉េបានបញ្ចប់នីតិវិធីហើយ ហើយកំពុងបញ្ជូនទៅសភាជាតិរបស់កូរ៉េ ដើម្បីផ្តល់សច្ចាប័ន ដែលសង្ឃឹមថានឹងបញ្ចប់នៅពេលខាងមុខនេះ។
ជាមួយគ្នានេះ លោកនាយករដ្ឋមន្ត្រី ហ៊ុន សែន ក៏បានស្នើឱ្យលោកប្រធានាធិបតី មូន ចេអ៊ីន ជួយគាំទ្រឧស្សាហកម្ម ប្រទេសកម្ពុជាជាពិសេសពាក់ព័ន្ធនឹងការកែច្នៃមួយចំនួន ដោយលោក ហ៊ុន សែន បញ្ជាក់ថាច្បាប់វិនិយោគថ្មីរបស់កម្ពុជា បានផ្តល់ការលើកទឹកចិត្តដល់អ្នកវិនិយោគបរទេស។
តាមរយៈកិច្ចព្រមព្រៀងពាណិជ្ជកម្មសេរី(CKFTA)នេះ ក្រសួងពាណិជ្ជកម្មកម្ពុជារំពឹងថា នឹងជួយឲ្យប្រទេសនេះ អាចនាំចេញទំនិញសំខាន់ៗទៅកាន់ទីផ្សារកូរ៉េខាងត្បូងស្រដៀងគ្នា ទៅនឹងកិច្ចព្រមព្រៀងពាណិជ្ជកម្ម ដែលកម្ពុជាធ្លាប់សម្រេចបានជាមួយភាគីចិនដែរ។ សម្រាប់ទីផ្សារកូរ៉េខាងត្បូង កម្ពុជានឹងអាចនាំចេញទំនិញសំខាន់របស់ខ្លួន មានជាអាទិ៍ ផលិតផលកសិផល ផលិតផលបច្ចេកវិទ្យា ផលិតផលឧស្សាហកម្មខ្នាតតូច និងមធ្យម និងផលិតផលវាយនភណ្ឌ ដោយពុំជាប់របាំងពន្ធគយ ខណៈដែលបន្ទាត់ពន្ធនាំចូលពីកូរ៉េមកកម្ពុជាមានចំនួនតិចជាង។
ជាការពិត កិច្ចព្រមព្រៀង CKFTAនេះ ត្រូវគេមើលឃើញថានឹងជំរុញកំណើននៃការនាំចេញ កំណើនផលទុនសរុបក្នុងស្រុក និងកំណើនឱកាសការងារ ព្រមទាំងជួយស្តារឡើងវិញនូវសេដ្ឋកិច្ច របស់ប្រទេសកម្ពុជាបានឆាប់រហ័ស ក្រោយពីទទួលរងផលប៉ះពាល់ជំងឺកូវីដ-១៩។ ក្រៅពីលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ កម្ពុជាក៏នឹងមានបន្ថែមទៀតនូវកិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ