សកម្មជនបរិស្ថាន លោក ថុន រដ្ឋា ផ្សាយវីដេអូដំបូងក្រោយចេញពីពន្ធនាគារ
លោក ថុន រដ្ឋា សកម្មជនបរិស្ថាន ដែលទើបតែចេញពីពន្ធនាគារនៅខែវិច្ឆិកាឆ្នាំ២០២១ បានចេញផ្សាយវីដេអូដំបូងរបស់ខ្លួនស្ដីពីបញ្ហាបរិស្ថាន។ នៅក្នុងវីដេអូរយៈពេល២នាទីនិង៤០វិនាទី លោក ថុន រដ្ឋា បានលើកឡើងពីក្ដីព្រួយបារម្ភរបស់លោក ចំពោះការបង្ហូរទឹកកខ្វក់ទៅក្នុងស្ទឹងសៀមរាប ខណៈអាងប្រព្រឹត្តកម្មទឹកកខ្វក់ប្រចាំខេត្តសៀមរាប ប្រែក្លាយជាអាងចិញ្ចឹមត្រីទៅវិញ។
ចុះផ្សាយនៅថ្ងៃ៖
ស្តាប់ - ០៣:០៤
«អាងចម្រោះទឹកកខ្វក់ ឬ អាងចឹញ្ចឹមត្រី?» នេះគឺជាចំណងជើងឃ្លីបវីដេអូខ្លីរបស់សកម្មជនបរិស្ថាន លោក ថុន រដ្ឋា ដែលបានបង្ហោះលើទំព៍រហ្វេសប៊ុករបស់លោក នៅល្ងាចថ្ងៃសុក្រទី១១ខែកុម្ភៈ ម្សិលមិញ។ ខុសពីវីដេអូមុនៗដែលលើកឡើងពីបញ្ហាបរិស្ថានធំៗនិងរសើបខ្លាំងមកវាយប្រហាររដ្ឋាភិបាល វីដេអូរបស់លោក ថុន រដ្ឋា ពេលនេះ លើកយកបញ្ហាបរិស្ថានដែលមានទ្រង់ទ្រាយតូចជាងមុនមកបរិយាយ។ នោះគឺក្ដីព្រួយបារម្ភរបស់លោក ចំពោះការបង្ហូរទឹកកខ្វក់ដែលមានក្លិនស្អុយ ចូលទៅក្នុងស្ទឹងសៀមរាប ខណៈអាងប្រព្រឹត្តកម្មទឹកកខ្វក់ប្រចាំខេត្តសៀមរាប ប្រែក្លាយជាអាងចិញ្ចឹមត្រីទៅវិញ។
បើទោះបីជាសំណុំរឿងនេះ មិនសូវមានលក្ខណៈវាយប្រហារខ្លាំងក៏ពិតមែន ប៉ុន្តែវាបានបង្ហាញពីផ្នែកមួយនៃបញ្ហាបរិស្ថាននៅក្នុងខេត្តសៀមរាប ដែលជាខេត្តទេសចរណ៍ដ៏ពេញនិយមសម្រាប់ភ្ញៀវបរទេស។ ប្រសិនបើបញ្ហានេះមិនត្រូវបានដោះស្រាយទេ លោក ថុន រដ្ឋា បារម្ភថា វាអាចប៉ះពាល់ដល់មុខមាត់របស់កម្ពុជា ក្នុងក្រសែភ្នែកភ្ញៀវទេសចរ។
ម្យ៉ាងវិញទៀត ការបង្ហូរទឹកកខ្វក់ដែលសង្ស័យថាមិនទាន់បានឆ្លងកាត់ការចម្រោះត្រឹមត្រូវ ទៅក្នុងស្ទឹងសៀមរាប ចាក់បន្តចូលទៅក្នុងបឹងទន្លេសាប វានឹងបំផ្លាញជីវចម្រុះនៅក្នុងទឹក។ បន្ថែមពីលើនេះ វាក៏នឹងផ្ដល់ផលប៉ះពាល់ធ្ងន់ធ្ងរដល់សុខភាពប្រជាជន ដែលប្រើប្រាស់ទឹកបឹងទន្លេសាប សម្រាប់ចិញ្ចឹមត្រី ស្រោចបន្លែ និងប្រើប្រាស់ប្រចាំថ្ងៃជាដើម។ នេះបើតាមលោក ថុន រដ្ឋា។ លោក ថុន រដ្ឋា ដែលអះអាងថា ខ្លួនស្រឡាញ់សន្តិភាព ចង់ឃើញទឹកស្ទឹងសៀមរាប ជាស្ទឹងដែលមានទឹកថ្លា ទាក់ទាញភ្ញៀវទេសចរឲ្យមកកម្សាន្តម្ដងហើយម្ដងទៀត មិនមែនជាស្ទឹងទឹកលូនោះទេ។
សូមរំឭកជូនថា លោក ថុន រដ្ឋា ដែលជាអតីតសកម្មជនចលនាមាតាធម្មជាតិ ត្រូវបានសាលាដំបូងរាជធានីភ្នំពេញ កាត់ទោសឱ្យជាប់ពន្ធនាគារជាង១ឆ្នាំ ក្រោមការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» បន្ទាប់ពីលោកធ្វើយុទ្ធនាការដើរថ្មើជើងពីវត្តភ្នំទៅកាន់ផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីសុំអន្តរាគមន៍ឱ្យបញ្ឈប់ការលុបបឹងតាមោក។
លោក ថុន រដ្ឋា ត្រូវបានតុលាការដោះលែងពីពន្ធនាគារ កាលពីថ្ងៃទី១២ ខែវិច្ឆិកា ឆ្នាំ២០២១ បន្ទាប់អនុវត្តទោសចប់។ ប៉ុន្តែចៅក្រមសាលាដំបូងរាជធានីភ្នំពេញ បានចោទប្រកាន់លោកក្នុងសំណុំរឿង «រួមគំនិតក្បត់» មួយទៀត។ នៅចុងខែវិច្ឆិកាឆ្នាំ២០២១ លោក ថុន រដ្ឋា និងសកម្មជនបរិស្ថានវ័យក្មេងនៅកម្ពុជាសរុបចំនួន៦នាក់ ត្រូវបានអង្គការ Frontline Defenders ផ្តល់ជ័យលាភីពានរង្វាន់អ្នកការពារឈានមុខ ដែលការផ្ដល់ពានរង្វាន់នេះ ផ្ដោតលើភាពក្លាហាននិងការហ៊ានប្រថុយគ្រោះថ្នាក់ ដើម្បីការពារបរិស្ថាននិងធនធានធម្មជាតិនៅប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ