សំណុំរឿងព្រលានយន្តហោះភ្នំពេញថ្មី៖ ពលរដ្ឋ៥៥គ្រួសារ បន្តដាក់ញត្តិសុំអន្តរាគមន៍ទៅកាន់ក្រសួងទំនាក់ទំនងរដ្ឋសភា និងព្រឹទ្ធសភា
ប្រជាពលរដ្ឋរងផលប៉ះពាល់ពីគម្រោងសាងសង់ព្រលានយន្តហោះអន្តរជាតិភ្នំពេញថ្មីក្នុងខេត្តកណ្តាលចំនួន៥៥គ្រួសារនៅព្រឹកថ្ងៃទី០៩កុម្ភៈនេះ បានបន្តដាក់ញត្តិទៅកាន់ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ដើម្បីជួយស្វែងរកកិច្ចអន្តរាគមន៍ដោះស្រាយបញ្ហាវិវាទដីធ្លីជាមួយក្រុមហ៊ុនOCIC។ វិវាទដីធ្លីដែលបន្តអូសបន្លាយអស់រយៈពេលជាង៣ឆ្នាំ និងគ្មានផលសំណងសមរម្យដែលប្រជាពលរដ្ឋចង់បាន។
ចុះផ្សាយនៅថ្ងៃ៖
ស្តាប់ - ០២:៣៥
នេះគឺជាញត្តិទី៥ហើយដែលប្រជាពលរដ្ឋចំនួន៥៥គ្រួសារបានដាក់ទៅកាន់ស្ថាប័នរដ្ឋ ដើម្បីស្វែងរកកិច្ចអន្តរាគមន៍ជុំវិញវិវាទដីធ្លីជាមួយគម្រោងសាងសង់ព្រលានយន្តហោះអន្តរជាតិភ្នំពេញថ្មីក្នុងខេត្តកណ្តាល។ ញត្តិទី៥នេះ ប្រជាពលរដ្ឋរងផលប៉ះពាល់បានអះអាងថា បានដាក់ទៅកាន់ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ដើម្បីជួយពិនិត្យផលដីដែលប៉ះពាល់ចំនួន៣៨ហិកតា និងភាគច្រើន ស្ថិតនៅក្នុងភូមិកំពង់តាឡុងដែលមានទំនាស់ជាមួយក្រុមហ៊ុន OCIC។
ប្រជាពលរដ្ឋមួយរូបសុំមិនបញ្ចេញឈ្មោះបានបញ្ជាក់ប្រាប់វិទ្យុបារាំងអន្តរជាតិថា ពលរដ្ឋរងផលប៉ះពាល់ទាំងអស់ នឹងបន្តដាក់ញត្តិទៅកាន់ក្រសួង ស្ថាប័នពាក់ព័ន្ធដទៃទៀត ដរាបណាពួកគេទទួលបានការដោះស្រាយសមស្របពាក់ព័ន្ធនឹងការផ្តល់សំណង រឺការផ្លាស់ប្តូរដីជាដើម។ បើតាមពលរដ្ឋខាងដើម ញត្តិដែលពួកគេបានដាក់រួចរាល់នោះរួមមាន៖ ក្រសួងរៀបចំដែនដី នគរូបនីយកម្ម និងសំណង់ ក្រសួងយុត្តិធម៌ ក្រសួងមហាផ្ទៃ និងរដ្ឋសភា។ ពលរដ្ឋរូបនេះបន្តថា អស់រយៈពេលជាង៣ឆ្នាំមកហើយ ដែលបញ្ហាវិវាទដីធ្លីនេះ មិនទាន់មានការដោះស្រាយឱ្យសមស្របពីសំណាកអាជ្ញាធរ។
ចំណែក លោកស្រី វណ្ណា ប្រជាពលរដ្ឋរស់នៅក្នុងភូមិកំពង់តាឡុងក៏បានឱ្យដឹងដែរថា ប្រជាពលរដ្ឋទាំងអស់បានសម្រេចបញ្ឈប់ការតវ៉ាជាមួយអាជ្ញាធរអស់រយៈពេលជិត៥ខែមកហើយ ដោយងាកមកស្វែងរកកិច្ចអន្តរាគមន៍ពីសំណាកក្រសួងពាក់ព័ន្ធ តាមរយៈការដាក់ញត្តិនេះវិញ។ ប៉ុន្តែតាមរយៈការដាក់ញត្តិនេះ លោកស្រីថា ប្រៀបដូចការបង់អំបិលក្នុងទន្លេអញ្ចឹង ពោលគឺគ្មានពន្លឺនៃដំណោះស្រាយណាមួយកើតឡើងនោះទេ។ ខណៈអាជ្ញាធរនៅព្រឹកថ្ងៃទី០៩ កុម្ភៈនេះ បានដាក់ពង្រាយកងកម្លាំងជាច្រើន ដើម្បីការពារគ្រឿងចក្រដែលកំពុងឈូសឆាយដីស្រែរបស់ពលរដ្ឋដែលមិនទាន់មានដំណោះស្រាយនៅឡើយ។
ទាក់ទិននឹងបញ្ហានេះ វិទ្យុបារាំងអន្តរជាតិមិនទាន់អាចសុំការបញ្ជាក់ពីលោកគង់ សោភ័ណ្ឌ អភិបាលខេត្តកណ្តាលបាននៅឡើយទេ។ តែយ៉ាងណា បើតាមលោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូវិញ លោកយល់ឃើញថា បញ្ហាជម្លោះវិវាទដីធ្លីដែលបន្តអូសបន្លាយនេះ កើតចេញពីដើមចមមួយចំនួនដូចជា អាជ្ញាធរមិនព្រមដោះស្រាយតាមសន្តិវិធី ការផ្តល់សំណង់ត្រឹមតែ៨ដុល្លារក្នុងមួយម៉ែត្រការ៉េ និងការហាមមិនឱ្យពលរដ្ឋចូលពិនិត្យដីស្រែ ដែលក្រុមហ៊ុនកំពុងឈូសឆាយ។
សូមរំឭកថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី បានធ្វើឱ្យប៉ះពាល់ដល់ពលរដ្ឋចំនួន ៣៣០គ្រួសារមកពីឃុំចំនួន៤ ក្នុងខេត្តកណ្ដាល និងខេត្តតាកែវ។ ឃុំទាំងនោះមានដូចជា ឃុំបឹងខ្យាង ឃុំអំពៅព្រៃ ឃុំព្រែកស្លែង នៅស្រុកកណ្ដាលស្ទឹង ខេត្តកណ្ដាល និងនៅឃុំពត់សរ ស្រុកបាទី ខេត្តតាកែវ ដែលមានក្បាលដីជាង ១លានម៉ែត្រការ៉េ។
ដោយឡែក កាលពីថ្ងៃទី១២ខែកញ្ញាឆ្នាំ២០២១កន្លងមក ពលរដ្ឋចំនួន៩នាក់ត្រូវអាជ្ញាធរចាប់ខ្លួន និងបាន បញ្ជូនទៅកាន់ពន្ធនាគារ ក្រោមបទចោទប្រើប្រាស់អំពើហឹង្សាដោយចេតនាមានស្ថានទម្ងន់ទោស និងញុះញង់ឱ្យប្រព្រឹទ្ធបទល្មើសជាអាទិ៍។ មួយសប្ដាហ៍បន្ទាប់ពីការប៉ះទង្គិចគ្នានេះ ការប្រមូលផ្ដុំគ្នាតវ៉ារបស់ប្រជាពលរដ្ឋត្រូវបានផ្អាក ហើយអាជ្ញាធរក៏សម្រេចដោះលែងពលរដ្ឋទាំង៩នាក់នោះ ដោយតម្រូវឲ្យពួកគេធ្វើកិច្ចសន្យាបញ្ឈប់រាល់សកម្មភាពប្រមូលផ្តុំតវ៉ានានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ