ឯកអគ្គរដ្ឋទូតអូស្ត្រាលីចង់ឃើញលោក កឹម សុខា បានចូលរួមការបោះឆ្នោតពេលខាងមុខ
ឯកអគ្គរដ្ឋទូតអូស្រា្តលីប្រចាំកម្ពុជា លោក ប៉ាប្លូ កាំង បញ្ជាក់ជំហរថាអូស្ត្រាលី ចង់ឃើញក្តីក្តាំរបស់លោក កឹម សុខា ត្រូវបានបន្តធ្វើឡើងដោយតម្លាភាព យុត្តិធម៌ និងមានដំណោះស្រាយមួយឆាប់រហ័ស សម្រាប់មេបក្សប្រឆាំងរូបនេះបានចូលរួមការបោះឆ្នោតខាងមុខ។ ការបញ្ជាក់នេះ ធ្វើឡើងនៅក្នុងជំនួប រវាង លោក ប៉ាប្លូ កាំង និងលោក កឹម សុខា នៅថ្ងៃព្រហស្បតិ៍ ម្សិលមិញ។ ជាមួយគ្នានេះ លោក កឹម សុខា បានលើកឡើងថា ដំណើរទៅរកយុត្តិធម៌របស់លោកពិតជាពិបាក តែហោចណាស់មានសហគមន៍ជាតិ និងអន្តរជាតិទទួលស្គាល់ មានន័យថា លោកជាមនុស្សស្អាតស្អំ។
ចុះផ្សាយនៅថ្ងៃ៖
ស្តាប់ - ០១:៤៨
នៅក្នុងជំនួបទ្វេភាគី នៅឯគេហដ្ឋានលោកកឹម សុខា លោកប៉ាប្លូ កាំង ឯកអគ្គរដ្ឋទូតអូស្ត្រាលីប្រចាំកម្ពុជា បានបញ្ជាក់ថា លោកបានជជែកអំពីក្តីក្តាំលោកកឹម សុខា ដែលកំពុងបន្តនៅសវនាការ ចំនួន៣លើក ក្រោយពីបានផ្អឹបទុករយៈពេលជាង២ឆ្នាំ ក្រោមហេតុផលកូវីដ១៩។
សម្រាប់ការបន្តសវនាការជាថ្មីម្តងទៀតនេះ លោក ប៉ាប្លូ កាំង អំពាវនាវឲ្យមានដំណោះស្រាយមួយដោយមានតម្លាភាព និងយុត្តិធម៌ ហើយមិនអូសបន្លាយពេលវេលា។ ក្នុងន័យនេះ ឯកអគ្គរដ្ឋទូតអូស្ត្រាលី ចង់សំដៅដល់ដំណើរជីវិតនយោបាយរបស់លោក កឹម សុខា ដែលជាប្រធាននៃអតីតគណបក្សសង្រ្គោះជាតិ ខណៈដែលការបោះឆ្នោតឃុំ-សង្កាត់ អណត្តិទី៥ ឆ្នាំ២០២២ កាន់តែខិតជិតមកដល់។
ចំណែកឯ លោក កឹម សុខា វិញ បានអរគុណចំពោះអូស្ត្រាលីដែលតែងតែយកចិត្តទុកដាក់លើសេរីភាព និងយុត្តិធម៌ផ្ទាល់ខ្លួនរបស់លោក។ នៅលើបណ្តាញសង្គមហ្វេសប៊ុក លោក កឹម សុខា បានព្រលយពាក្យពេចន៍នយោបាយរបស់ខ្លួនថា ដំណើរទៅរកយុត្តិធម៌របស់លោកពិតជាពិបាករក តែហោចណាស់មានសហគមន៍ជាតិនិងអន្តរជាតិទទួលស្គាល់ មានន័យថា លោកជាមនុស្សស្អាតស្អំ។ ត្រង់ចំណុចនេះ លោកកឹម សុខា អាចចង់សំដៅទៅលើសហគមន៍អន្តរជាតិនានា ដែលបានចូលជួបលោកជាប្រចាំ ទោះបីលោកកំពុងស្ថិតនៅក្នុងការចោទប្រកាន់ពីបទឃុបឃិតជាមួយបរទេសក៏ដោយនោះ។
គួររំលឹកឡើងវិញថា សវនាការលោក កឹម សុខា ក្នុងសំណុំរឿងសន្ទិដ្ឋិភាពជាមួយបរទេស ក្នុងចេតនាផ្តួលរលំរដ្ឋាភិបាល បានបន្តឡើងវិញនៅថ្ងៃទី១៩មករា កន្លងមកនេះ។ មកដល់ថ្ងៃទី០៤កុម្ភៈ សំណុំរឿងរបស់លោក បានលើកមកជំនុំជម្រះចំនួន៣លើក។ តែពីក្រុមអ្នកឃ្លាំមើលសង្គម យល់ថា ការជំនុំជម្រះក្តីតែមួយដងក្នុងមួយសប្តាហ៍នេះ ជាការបន្តអូសបន្លាយក្តីក្តាំលោកកឹម សុខា បន្តទៅទៀត នឹងធ្វើឲ្យប៉ះពាល់ដល់ដំណើរចូលរួមបោះឆ្នោតឃុំ សង្កាត់ ដែលធ្វើឡើងនៅខែមិថុនា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ