ច្រកទ្វារអីុនធឺណែតជាតិ៖ រដ្ឋាភិបាលកម្ពុជាថាសេចក្តីថ្លែងការណ៍របស់ UN ធ្វើឡើងតាមបែបស្រមើស្រមៃ បង្កការភ័ន្តច្រឡំ
រដ្ឋាភិបាលកម្ពុជាតាមរយៈស្ថានបេសកកម្មអចិន្ត្រៃយ៍នៅទីក្រុងហ្សឺណែវ បានចេញមុខមកប្រតិកម្មទៅនឹងសេចក្តីថ្លែងការណ៍របស់ ក្រុមជំនាញសិទ្ធិមនុស្សនៃអង្គការសហប្រជាជាតិ ជុំវិញការអនុវត្តច្រកទ្វារអីុនធឺណែតជាតិ។ ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ បានថ្លែងការពារជំហរបស់រដ្ឋាភិបាល និងចាត់សេចក្តីថ្លែងការណ៍របស់ក្រុមអ្នកជំនាញ UN ថាធ្វើឡើងតាមបែបស្រមើស្រមៃ និងបង្កការភ័ន្តច្រឡំ។
ចុះផ្សាយនៅថ្ងៃ៖
ស្តាប់ - ០២:០២
ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ នៅក្នុងសេចក្តីថ្លែងការណ៍ព័ត៌មាន នៅថ្ងៃទី០១កុម្ភៈ បានការពារជំហរដ្ឋាភិបាលវិញ ដោយថា ការបង្កើតច្រកទ្វារអីុនធឺណែត គឺជាការគោពតាមគោលការណ៍ច្បាប់ និងមានភាពចាំបាច់ ក្នុងការរួមចំណែកជំរុញកំណើន និងអភិវឌ្ឍវិស័យឌីជីថលនៅកម្ពុជា។ នេះជាប្រតិកម្មតែប៉ុន្មានម៉ោងបុណ្ណោះ បន្ទាប់ពីការទទូចរបស់ក្រុមជំនាញសិទ្ធិមនុស្សនៃអង្គការសហប្រជាជាតិ ដែលស្នើឲ្យផ្អាកការអនុវត្តច្រកទ្វារអីុនធឺណែត ។
ស្ថានបេសកកម្មកម្ពុជា លើកឡើងថា ច្រកទ្វារអីុនធឺណែតជាតិ នេះពុំមែនមិនធ្លាប់មាននៅក្នុងពិភពលោកនោះទេ។ ការបង្កើតច្រកទ្វារអីុនធឺណែត គឺដើម្បីសម្រួលការតភ្ជាប់អីុនធឺណែត ការប្រមូលពន្ធ ពង្រឹងសន្តិសុខជាតិ សណ្តាប់ធ្នាប់សង្គម។ ជាពិសេសសំដៅដល់ការទប់ស្កាត់បទល្មើសនានា ដែលអាចកើតមានតាមប្រព័ន្ធអីុនធឺណែត។
ការចូលជាធរមាននៃអនុក្រឹតច្រកទ្វារអីុនធឺណែត នៅថ្ងៃទី១៦កុម្ភៈខាងមុខ ភាគីអង្គការសង្គមស៊ីវិលសម្តែងកង្វល់ពីការលួច និងឃ្លាំមើលរាល់ទិន្នន័យអ្នកប្រើប្រាស់។ តែសម្រាប់រដ្ឋាភិបាល គឺគ្មានឡើយកថាខណ្ឌកំណត់លើបញ្ហាទាំងនោះ។ បើតាមស្ថានតំណាងកម្ពុជានៅ UN រដ្ឋាភិបាលខ្មែរប្តេជ្ញាការពារឯកជនភាព និងសេរីភាពក្នុងការបញ្ចេញមតិ។ ម៉្លោះហើយ ការចោទប្រកាន់នេះក្រោមស្លាកសេរីភាពបញ្ចេញមតិ គឺគ្មានមូលដ្ឋានទាល់តែសោះ ហើយព្រមទាំងជ្រៀតជ្រែកក្នុងកិច្ចការផ្ទៃក្នុងនៃរដ្ឋអធិបតេយ្យមួយទៀតផង។
កាលពីថ្ងៃ០១កុម្ភៈ ក្រុមមន្ត្រីសិទ្ធិមនុស្សអង្គការអន្តរជាតិ គិតថា ច្រកទ្វារអីុនធឺណែត នឹងផ្តល់អំណាចកាន់តែពេញដៃដល់រដ្ឋាភិបាល ចូលឃ្លាំមើលគេហទំព័រនានាដែលពលរដ្ឋទូទៅបានចូលរួម ហើយព្រមទាំងអាចផ្តល់សិទ្ធិដល់អាជ្ញាធរអាចបិទការចូលទៅអីុនធឺណែត តាមតែអំពើចិត្តទៀតផង។ បញ្ហានេះហើយ ដែល មន្ត្រីសិទ្ធិមនុស្សរបស់ UN ស្នើឲ្យផ្អាកការអនុម័តអនុក្រឹតនេះ ជាមុនសិន រួចចូលជជែកជាមួយអ្នកជំនាញអន្តរជាតិ ដើម្បីធានាថាមិនប៉ះពាល់ដល់សិទ្ធិមនុស្ស។
តែរដ្ឋាភិបាល ក៏បញ្ជាក់វិញដែរថា ច្រកទ្វារអីុនធឺណែត ដែលធ្វើឡើងពេលនេះ បានឆ្លងកាត់ការជជែករួចរាល់ ជាមួយអ្នកជំនាញទូរគមនាគមន៍ ប្រតិបត្តិករ និងស្ថាប័នពាក់ព័ន្ធ យ៉ាងទូលាយនិងបើកចំហរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ