ក្នុងជំនួបជាមួយប្រមុខការទូតកម្ពុជា សមភាគីបារាំងសម្ដែងក្ដីបារម្ភចំពោះស្ថានការណ៍ដុបដាបនៅភូមា
នៅល្ងាចថ្ងៃទី២៧មករា លោក ប្រាក់ សុខុន រដ្ឋមន្ដ្រីការបរទេសកម្ពុជា បានជួបពិភាក្សាការងារតាមទូរសព្ទជាមួយសមភាគីបារាំង គឺលោក ហ្សង់-អ៊ីវ ឡឺ ឌ្រីយ៉ង់។ នៅក្នុងជំនួបនេះ កម្ពុជាក្នុងនាមជាប្រធានអាស៊ាន និងបារាំងក្នុងនាមជាប្រធានក្រុមប្រឹក្សាសហភាពអឺរ៉ុប បានជជែកគ្នាអំពីរបៀបវារៈជាច្រើន ដើម្បីចូលរួមលើកកម្ពស់សន្តិភាព ស្ថិរភាព និងវិបុលភាពនៅក្នុងតំបន់ឥណ្ឌូប៉ាស៊ីហ្វិក។ វិបត្តិនៅភូមា ក៏ជាប្រធានរឿងមួយនៅក្នុងចំណោមនោះដែរ ដែលភាគីបារាំងបានសម្ដែងក្ដីបារម្ភយ៉ាងខ្លាំង។
ចុះផ្សាយនៅថ្ងៃ៖
ប្រមុខការទូតបារាំង លោក ហ្សង់-អ៊ីវ ឡឺ ឌ្រីយ៉ង់ (Jean-Yves Le Drian) សម្តែងក្តីព្រួយបារម្ភជាខ្លាំងចំពោះស្ថានការកាន់តែដុបដាបនៅភូមា ពិសេសនៅក្នុងរដ្ឋ Kayah។ ប្រទេសបារាំងគាំទ្រសកម្មភាពរបស់អាស៊ានក្នុងការរកដោះស្រាយបញ្ហា។ តែការឈានចេញពីវិបត្តិនេះ ត្រូវគោរពគោលការណ៍ព្រមព្រៀងជាឯកច្ឆ័ន៥ចំណុចរបស់អាស៊ាន ហើយនិងកិច្ចសន្ទនានយោបាយ គឺត្រូវប្រកបដោយបរិយាប័ន្ន ដែលមានការចូលពីគ្រប់ភាគី។
ខណៈពេលដែលរដ្ឋាភិបាលភូមាដឹកនាំដោយរបបសឹក បានបង្កើនការលំបាកជាឧបសគ្គផ្សេងៗរាំងស្ទះដល់ការបញ្ជូនជំនួយមនុស្សធម៌, រដ្ឋមន្ត្រីការបរទេសបារាំង អំពាវនាវបន្ថែមទៀត ឲ្យមានការសម្របសម្រួលដើម្បីធានាថា ការផ្តល់ជំនួយអាចប្រព្រឹត្តទៅបានដោយគ្មានឧបសគ្គ។ បារាំងគាំទ្រយ៉ាងពេញទំហឹងសកម្មភាពរបស់ «ប្រេសិតពិសេសនៃប្រធានអាស៊ាន» (លោក ប្រាក់ សុខុន) និងប្រេសិតរបស់អគ្គលេខាធិការអង្គការសហប្រជាជាតិដើម្បីដោះស្រាយវិបត្តិភូមា។
រដ្ឋមន្ត្រីការបរទេសបារាំង ក៏បានលើកឡើងពីស្ថានការណ៍សមុទ្រចិនខាងត្បូង ដោយបញ្ជាក់ថាបារាំងគោរពច្បាប់អន្តរជាតិ និងបានរម្លឹកជាពិសេស ពីអនុសញ្ញាស្តីពីច្បាប់សមុត្រឆ្នាំ១៩៨២របស់អង្គការសហប្រជាជាតិ។ បារាំងបញ្ជាក់ដែរ ថា ខ្លួនបានដាក់ពង្រាយនាវានៅក្នុងតំបន់នេះ គឺបង្ហាញពីជំហរឃ្លាំមើលនិងរក្សាសន្តិសុខនិងស្ថិរភាពនៅក្នុងតំបន់ ដោយផ្អែកទៅលើគោលការណ៍សេរីភាពនាវាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ