គណបក្សនយោបាយក្រៅរដ្ឋាភិបាលស្វែងរកអន្តរាគមន៍ពីទូតអឺរ៉ុប ដើម្បីរក្សាទុកស្ថានភាពដើមនៃទម្រង់១១០២
គណបក្សនយោបាយក្រៅរដ្ឋាភិបាលចំនួន៤ កាលពីថ្ងៃពុធម្សិលមិញ បានជួបជាមួយមន្ត្រីការទូតអឺរ៉ុបសំខាន់ៗមួយចំនួនដូចជា មន្ត្រីទូតសហភាពអឺរ៉ុប ទូតបារាំង ទូតអាល្លឺម៉ង់ និងទូតស៊ុយអែត។ ជំនួបរវាងមន្ត្រីគណបក្សនយោបាយជាមួយមន្ត្រីទូតអឺរ៉ុបទាំងអស់នេះ គឺដើម្បីបង្ហាញនូវកង្វល់ និងការទាមទាររបស់ពួកគេឲ្យ គ.ជ.ប រក្សា និងចែកកំណត់ហេតុនៃការរាប់សន្លឹកឆ្នោត(ទម្រង់១១០២) ជូនភ្នាក់ងារគណបក្សនយោបាយ នៅការិយាល័យបោះឆ្នោតដូចការបោះឆ្នោតមុនៗ។
ចុះផ្សាយនៅថ្ងៃ៖
ស្តាប់ - ០២:៤៣
ការបន្តខ្វែងគំនិតគ្នារវាងគណបក្សនយោបាយក្រៅរដ្ឋាភិបាល និងគណកម្មាធិការជាតិរៀបចំការបោះឆ្នោត(គ.ជ.ប) ជុំវិញគំណត់ហេតុរាប់សន្លឹកឆ្នោត ឬទម្រង់១១០២ នៅតែកើតមាន ដោយគណបក្សក្រៅរដ្ឋាភិបាលបន្តស្វែងរកអន្តរាគមន៍ ពីបណ្តាស្ថានទូតអឺរ៉ុបបន្ថែមទៀត ដើម្បីទាមទារឲ្យ គ.ជ.ប រក្សា និងចែកកំណត់ហេតុនៃការរាប់សន្លឹកឆ្នោត(ទម្រង់១១០២) ជូនភ្នាក់ងារគណបក្សនយោបាយ នៅការិយាល័យបោះឆ្នោតដូចការបោះឆ្នោតមុនៗ។ គណបក្សនយោបាយក្រៅរដ្ឋាភិបាលយល់ថា ការរុះរើក្នុងការផ្តល់បែបបទទម្រង់១១០២ គឺជាការបារម្ភមួយ ដែលអាចកើតមានឡើងនូវភាពមិនប្រក្រតី។
លោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជា បានប្រាប់វិទ្យុបារាំង RFI នៅថ្ងៃនេះ ថាមន្ត្រីទូតសហភាពអឺរ៉ុបទាំងអស់បានស្វាគមន៍ និងទទួលយកនូវកង្វល់ទាំងឡាយ ដែលក្រុមគណបក្សនយោបាយក្រៅរដ្ឋាភិបាលបានលើកឡើង។ ទោះយ៉ាងណា លោក អ៊ូ ច័ន្ទរ័ត្ន មិនទាន់ដឹងនៅឡើយទេថា មន្ត្រីទូតអឺរ៉ុបទាំងនោះ នឹងអាចជជែកជាមួយរដ្ឋាភិបាល ឬគ.ជ.ប ឬមួយអាចផ្តល់ជាអនុសាសន៍យ៉ាងណាមួយទៅរដ្ឋាភិបាលកម្ពុជា ឬគ.ជ.ប។
កាលពីពាក់កណ្តាលខែមករាឆ្នាំ ២០២២នេះ អគ្គលេខាធិការ គ.ជ.ប លោក ទេព នីថា បានបញ្ជាក់ប្រាប់គណបក្សនយោបាយដែលតវ៉ាថា កំណត់ហេតុនៃការរាប់សន្លឹកឆ្នោត (ទម្រង់បែបបទ ១១០២) គឺគណបក្សនយោបាយអាចថតនៅមុខការិយាល័យបោះឆ្នោតនៅពេលបិទផ្សាយជាសាធារណៈ ហើយគណបក្សនយោបាយអាចទៅទទួលយកទម្រង់បែបបទ១១០២ ដដែលនេះ ពីគណៈកម្មការឃុំ សង្កាត់រៀបចំការបោះឆ្នោត។ លោកថា ទម្រង់បែបបទ១១០២ នេះ ត្រូវបានគណៈកម្មការឃុំ សង្កាត់រៀបចំការបោះឆ្នោតស្គេន (Scan) ដោយផ្ទាល់ រួចបោះពុម្ពចេញពីកុំព្យូទ័រ ហើយចែកជូនតំណាងគណបក្សនយោបាយ ដែលមានវត្តមាននៅគណៈកម្មការឃុំ សង្កាត់រៀបចំការបោះឆ្នោត។
លោក ទេព នីថា អះអាងថា ការបោះឆ្នោតកន្លងមក មន្ត្រីការិយាល័យបោះឆ្នោតត្រូវចម្លងលទ្ធផលនៃការរាប់សន្លឹកឆ្នោតដោយដៃជាច្រើនច្បាប់ ចែកជូនភ្នាក់ងារគណបក្សនយោបាយដែលមានវត្តមាននៅការិយាល័យបោះឆ្នោត។ លើសពីនេះទៀត ក្នុងថ្ងៃបោះឆ្នោត មន្ត្រីការិយាល័យបោះឆ្នោតធ្វើការលើស១២ម៉ោង ហួសកម្លាំង មន្ត្រីការិយាល័យបោះឆ្នោតអាចនឹងមានការថ្លោះធ្លោយនៅក្នុងការសរសេរចម្លងលទ្ធផលនៃការបោះឆ្នោតដោយដៃ។
សូមបញ្ជាក់ថា«កំណត់ហេតុនៃការរាប់សន្លឹកឆ្នោត»គឺជាទម្រង់បែបបទ១១០២ ដែលត្រូវមានភ្ជាប់បញ្ជីឈ្មោះអ្នកបោះឆ្នោត គល់បញ្ជីសន្លឹកឆ្នោតដែលបានប្រើ ឬមិនបានប្រើ សន្លឹកឆ្នោតបានការ ឬមិនបានការ ឬសន្លឹកឆ្នោតខូច ត្រាសម្ងាត់សម្រាប់ការិយាល័យបោះឆ្នោត ព្រមទាំង បណ្ដឹងជំទាស់ ឬតវ៉ាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ