កម្ពុជានឹងរៀបចំច្បាប់ចរាចរណ៍ផ្លូវគោកថ្មី បន្ទាប់ពីករណីគ្រោះថ្នាក់មាននិន្នាការកើនឡើងវិញ
ក្រសួងមហាផ្ទៃកម្ពុជានឹងរៀបចំសេចក្ដីព្រាងច្បាប់ស្ដីពីចរាចរណ៍ផ្លូវគោកថ្មី ដែលមានលក្ខណៈតឹងរឹងជាងមុន ដោយមិនបន្តធ្វើវិសោធនកម្មច្បាប់ចាស់នោះទេ។ នេះបើតាមរដ្ឋមន្ត្រីក្រសួងមហាផ្ទៃ កាលពីថ្ងៃអង្គារ ទី២៥ ខែមករា បន្ទាប់ពីករណីគ្រោះថ្នាក់ចរាចរណ៍នៅកម្ពុជាមានកំណើនឡើងវិញ នាដើមឆ្នាំ២០២២នេះ។ អ្នកឃ្លាំមើលបានលើកឡើងថា បង្ហាញការគាំទ្រចំពោះការកែប្រែច្បាប់ ប៉ុន្តែថាចំណុចគន្លឹះគឺស្ថិតលើការអនុវត្ត។
ចុះផ្សាយនៅថ្ងៃ៖
ស្តាប់ - ០២:១៧
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៥ ខែមករា បានលើកឡើងថា នៅដើមឆ្នាំ២០២២នេះករណីគ្រោះថ្នាក់ចរាចរណ៍មាននិន្ននាការកើនឡើង ដែលបណ្តាលឲ្យមនុស្សស្លាប់មួយថ្ងៃ១០នាក់ ឬថ្ងៃខ្លះរហូតដល់១៥នាក់។ កំណើននេះ គឺបន្ទាប់ពីការបើកប្រទេសឡើងវិញ ពីជំងឺកូវីដ១៩ កាលពីចុងឆ្នាំ២០២១កន្លងទៅ។
ក្នុងពិធីប្រគល់រថយន្តជូនវរសេនាតូចនគរបាលការពារព្រំដែនប្រចាំទិសភូមិភាគទី១ ភូមិភាគទី២ និងភូមិភាគទី៣ នៅអគ្គស្នងការដ្ឋាននគរបាលជាតិ នាដើមសប្តាហ៍នេះ លោក ស ខេង ក្នុងនាមប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកនឹងដឹកនាំរៀបចំច្បាប់ចរាចរណ៍ផ្លូវគោកថ្មី ដែលមានលក្ខណៈតឹងតែងជាងច្បាប់ចាស់។ ការរៀបចំសេចក្តីព្រាងច្បាប់ថ្មី ក៏ព្រោះតែច្បាប់ចរាចរណ៍ផ្លូវគោកចាស់ បានធ្វើវិសោធនកម្មច្រើនដង ដែលធ្វើឲ្យពីបាកក្នុងការកែសម្រួលថ្មី។
លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងប្រាប់វិទ្យុបារាំងអន្តរជាតិនៅថ្ងៃទី២៧ ខែមករានេះថា សេចក្តីព្រាងច្បាប់នេះកំពុងតែស្ថិតនៅក្នុងដំណាក់កាលប្រមូលធាតុចូលពីស្ថាប័នពាក់ព័ន្ធ។ បើតាមលោកស្រី មឹន មាណវី សេចក្តីព្រាងច្បាប់ចរាចរណ៍ផ្លូវគោកថ្មីនេះ អាចនឹងចប់រួចរាល់នៅក្នុងអំឡុងឆមាសទី១ ឆ្នាំ២០២២នេះ។
លោក គឹម បញ្ញា នាយកប្រចាំប្រទេសនៃអង្គការមូលនិធិបង្ការរបួសអាស៊ី (AIP Foundation) បានបញ្ជាក់ប្រាប់វិទ្យុបារាំងអន្តរជាតិថា ការកែប្រែច្បាប់ចរាចរណ៍របស់កម្ពុជានាពេលនេះ គឺក្នុងន័យទប់ស្កាត់កុំឲ្យមានគ្រោះថ្នាក់ចរាចរណ៍។ លោកបន្ថែមថានៅពេលអនុវត្តច្បាប់តែងតែរកឃើញចំណុចខ្វះចន្លោះ ដែលទាមទារឲ្យមានការកែសម្រួល ប៉ុន្តែចំណុចគន្លឹះគឺការអនុវត្តច្បាប់ឲ្យមានលក្ខណៈទូលំទូលាយ ម៉ឺងម៉ាត់ ប្រកបដោយតម្លាភាព និងស្មើភាព។
កាលពីឆ្នាំ២០២១កន្លងទៅ មានគ្រោះថ្នាក់ចរាចរណ៍ចំនួន ២ ៦៧០លើកបើប្រៀបធៀបនឹងឆ្នាំ២០២០ មានចំនួន ៣ ១៧៦លើក ថយចុះ១៦ភាគរយ ។ រីឯចំនួនអ្នកស្លាប់បាត់បង់ជីវិតមានចំនួន ១ ៤៩៧នាក់ បើប្រៀបធៀបនឹងឆ្នាំ២០២០ បានថយចំនួន១៤៩នាក់ស្មើនឹង៩ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ