លោកនាយករដ្ឋមន្ត្រីហ៊ុន សែន ដាក់សំណើ៤យ៉ាងទៅមេដឹកនាំយោធាភូមា ក្នុងជំនួបតាមវីដេអូ
ក្នុងជំនួបតាមប្រព័ន្ធវីដេអូ នៅថ្ងៃទី២៦ ខែមករានេះ លោកនាយករដ្ឋមន្ត្រី ហ៊ុន សែន ដែលជាប្រធានអាស៊ានផងនោះ បានដាក់សំណើ ៤ចំណុចថ្មីទៅកាន់មេដឹកនាំយោធាភូមា។ ក្នុងនោះក៏មានការអំពាវនាវឲ្យមេដឹកនាំយោធាភូមាគោរពតាមគោលការណ៍ឯកច្ឆន្ទទាំង ៥របស់អាស៊ាន។ ជំនួបលោកនាយករដ្ឋមន្ត្រី ហ៊ុន សែន និងលោក មីន អ៊ុងឡាំង មេដឹកនាំភូមា ធ្វើឡើងក្រោយពីស្ថានការណ៍មិនមានវឌ្ឍនភាពគួរឲ្យកត់សម្គាល់។
ចុះផ្សាយនៅថ្ងៃ៖
ស្តាប់ - ០២:០៣
ចំណុចទាំង៤ ដែលត្រូវបានលើកឡើងដោយលោកនាយករដ្ឋមន្ត្រីហ៊ុន សែន ទៅកាន់លោកឧត្តមសេនីយ៍ មីន អ៊ុងឡាំង រួមមាន ចំណុចទី១ស្នើឲ្យមេដឹកនាំភូមាបច្ចុប្បន្នខិតខំអនុវត្តកិច្ចព្រមព្រៀង ៥ចំនុចរបស់អាស៊ាន ដែលបានឯកភាពគ្នា កាលពីខែមេសាឆ្នាំ ២០២១។
បើតាមហ្វេសប៊ុកផ្លូវការបស់លោកនាយករដ្ឋមន្ត្រី ហ៊ុន សែន ចំណុចទី២ គឺភូមាត្រូវធ្វើយ៉ាងណាអាចឲ្យប្រេសិតពិសេស របស់ប្រធានអាស៊ាន បានទៅទស្សនកិច្ចនៅប្រទេសភូមា និងចំណុចទី៣ លោកនាយករដ្ឋមន្ត្រីហ៊ុន សែន អំពាវនាវសុំអោយភាគីទាំងអស់ រួមទាំងភាគីរដ្ឋាភិបាលភូមាផង ត្រូវតែបញ្ឈប់អំពើហិង្សា និងឈានឆ្ពោះធ្វើយ៉ាងណាដើម្បីឲ្យមានបទឈប់បាញ់នាពេលខាងមុខនេះ។ ចំណុចចុងក្រោយ លោកនាយករដ្ឋមន្ត្រីហ៊ុន សែន បានស្នើឲ្យលោក មីន អ៊ុងឡាំង ចូលរួមជាមួយបណ្ដាប្រទេសក្នុងតំបន់អាស៊ាន ក្នុងការផ្តល់ជំនួយមនុស្សធម៌ទៅដល់ប្រជាពលរដ្ឋភូមា។
លោកបណ្ឌិត ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី បានបញ្ជាក់ប្រាប់វិទ្យុបារាំងអន្តរជាតិថា កម្ពុជាបានខិតខំខ្លាំងក្នុងការជួយភូមា ដោយបានប្រើប្រាស់គ្រប់មធ្យោបាយ ដើម្បីឲ្យភាគីនានា នៅក្នុងប្រទេសនេះបញ្ឈប់អំពើហិង្សា។
ជុំវិញសំនួរថាតើភូមានឹងទទួលយកការអំពាវនាវរបស់ប្រធានអាស៊ាននាពេលនេះទេ? លោកបណ្ឌិត លោកបណ្ឌិត ឈាង វណ្ណារិទ្ធបានលើកឡើងថាគេត្រូវរងចាំមើលសិន ប៉ុន្តែរយៈពេល២សប្តាហ៍ក្រោយពីជំនួបផ្ទាល់រវាងលោកនាយករដ្ឋមន្ត្រី ហ៊ុន សែន និងលោក មីន អ៊ុងឡាំង កាលពីដើមខែមករា ពុំទាន់មានការអនុវត្តអ្វីជាក់ស្តែងនៅឡើយទេ។
សូមជម្រាបជូនថា កាលពីថ្ងៃទី២៥ ខែមករា លោកនាយករដ្ឋមន្ត្រីហ៊ុន សែន បានលើកឡើងថាលោកនឹងអញ្ជើញមេដឹកនាំយោធាភូមាចូលរួមកិច្ចប្រជុំអាស៊ាន បើមានវឌ្ឍនភាពរីកចម្រើននៅក្នុងការអនុវត្តចំណុចទាំង៥ នៃកិច្ចព្រមព្រៀងជាឯកច្ឆន្ទរបស់អាស៊ាន។ ប៉ុន្តែប្រសិនបើមិនមានទេ មេដឹកនាំយោធាភូមាក៏ត្រូវតែត្រៀមក្នុងការបញ្ជូនតំណាងមិនមែនជាថ្នាក់នយោបាយចូលរួមក្នុងកិច្ចប្រជុំអាស៊ាននេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ