លោកនាយករដ្ឋមន្ដ្រី ហ៊ុន សែន ប្រាប់ប្រធានាធិបតីឥណ្ឌូនេស៊ីថា ប្រមុខការទូតម៉ាឡេស៊ីព្រហើន និងមិនយល់ពីសិល្បៈការទូត
នៅក្នុងជំនួបតាមទូរសព្ទជាមួយប្រធានាធិបតីឥណ្ឌូនេស៊ី លោក ចូកូ វីដូដូ នៅថ្ងៃសុក្រទី២១មករានេះ លោកនាយករដ្ឋមន្ដ្រី ហ៊ុន សែន បានប្រតិកម្មខ្លាំងៗចំពោះប្រមុខការទូតម៉ាឡេស៊ី។ ប្រមុខកាទូតម៉ាឡេស៊ី លោក Saifuddin Abdullah ដែលធ្លាប់បានថ្លែងវាយប្រហារដំណើរទស្សនកិច្ចរបស់លោក ហ៊ុន សែន ទៅប្រទេសភូមា ថា ដំណើរទស្សនកិច្ចរបស់លោក ហ៊ុន សែន ទៅកាន់ប្រទេសភូមា ក្នុងពេលដែលកម្ពុជាកាន់តំណែងជាប្រធានប្ដូរវេនអាស៊ាន អាចធ្វើឲ្យមានការបកស្រាយខុសថា អាស៊ានទទួលស្គាល់របបយោធាភូមា ដែលបានធ្វើរដ្ឋប្រហារទម្លាក់រដ្ឋាភិបាលស៊ីវិល។ សម្រាប់លោក ហ៊ុន សែន សម្ដីរបស់ប្រមុខការទូតម៉ាឡេស៊ីដូច្នេះ បង្ហាញពីភាពព្រហើន និងមិនយល់ពីសិល្បៈការទូត។
ចុះផ្សាយនៅថ្ងៃ៖
ស្តាប់ - ០១:៥១
«មិនយល់ពីសិល្បៈការទូត ហើយព្រហើន ហ៊ានប្រើសម្ដីវាយប្រហារលើប្រធានអាស៊ាន»។ នេះគឺជាសារដែលលោក ហ៊ុន សែន នាយករដ្ឋមន្ដ្រីកម្ពុជា និងជាប្រធានអាស៊ានប្ដូរវេនឆ្នាំ២០២២ ផ្ញើទៅកាន់ប្រមុខការទូតម៉ាឡេស៊ី តាមរយៈប្រធានាធិបតីឥណ្ឌូនេស៊ី លោក ចូកូ វីដូដូ។ នេះបើតាមការគូសបញ្ជាក់ឲ្យដឹងពីលោក កៅ គឹមហួន រដ្ឋមន្ដ្រីប្រតិភូអមនាយករដ្ឋមន្ដ្រី នៅក្រោយជំនួបតាមទូរសព្ទរវាងមេដឹកនាំកម្ពុជានិងឥណ្ឌូនេស៊ី នៅព្រឹកថ្ងៃសុក្រទី២១ មករានេះ។
បើតាមលោក កៅ គឹមហួន លោកនាយករដ្ឋមន្ដ្រី ហ៊ុន សែន យល់ថា រដ្ឋមន្ដ្រីការបរទេសម៉ាឡេស៊ី លោក Saifuddin Abdullah ធ្លាប់ធ្វើការងារក្នុងក្របខណ្ឌគណបក្សប្រឆាំងនាពេលកន្លងមក។ ប៉ុន្តែ ក្នុងនាមជារដ្ឋមន្ដ្រីការបរទេស និងជាអ្នកការទូតមួយរូប លោក Saifuddin Abdullah បែរជាហ៊ានប្រើពាក្យសម្ដីព្រហើនជាមួយប្រធានអាស៊ាន ក៏ដូចជាប្រមុខរដ្ឋាភិបាលអាស៊ាន ដែលពុំមានប្រើប្រាស់ភាសាការទូតសោះឡើយ។
សូមជម្រាបជូនថា ប្រមុខការទូតម៉ាឡេស៊ី លោក Saifuddin Abdullah ធ្លាប់បានថ្លែងវាយប្រហារដំណើរទស្សនកិច្ចរបស់លោក ហ៊ុន សែន ទៅប្រទេសភូមា ថា ដំណើរទស្សនកិច្ចរបស់លោក ហ៊ុន សែន ទៅកាន់ប្រទេសភូមា ក្នុងពេលដែលកម្ពុជាកាន់តំណែងជាប្រធានប្ដូរវេនអាស៊ាន អាចធ្វើឲ្យមានការបកស្រាយខុសថា អាស៊ានទទួលស្គាល់របបយោធាភូមា ដែលបានធ្វើរដ្ឋប្រហារទម្លាក់រដ្ឋាភិបាលស៊ីវិល។
យ៉ាងណាក៏ដោយ លោកនាយករដ្ឋមន្ដ្រី ហ៊ុន សែន ថ្លែងពន្យល់ទៅកាន់ប្រធានាធិបតីឥណ្ឌូនេស៊ី លោក ចូកូ វីដូដូ ថា ដំណើរទស្សនកិច្ចរបស់លោក ទៅកាន់ប្រទេសភូមាកាលពីដើមខែមករាកន្លងទៅ គឺដើម្បីដាំដើមឈើ មិនមែនទៅកាប់ឈើទេ។ ហើយការងារដាំដើមឈើនេះទៀតសោត ពុំមែនដាំមួយថ្ងៃ ហើយរំពឹងថាបានផ្លែផ្កាភ្លាមដែរ។ ការងារនេះ ទាមទារពេលវេលា ដំណោះស្រាយនយោបាយដែលមានលក្ខណៈយូរអង្វែង និងការធ្វើការឲ្យបានគ្រប់ជ្រុងជ្រោយ។ នេះបើតាមប្រសាសន៍របស់លោក ហ៊ុន សែន ដែលបានស្រង់បន្តប្រាប់អ្នកសារព័ត៌មាន តាមរយៈលោក កៅ គឹម ហួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ