ប្រសិតពិសេសអាស៊ាន៖ «យើងមានសុទិដ្ឋិនិយមលើអនាគតអាស៊ាន ទោះបីកំពុងប្រឈមនឹងបញ្ហាមួយចំនួន»
លោកប្រាក់ សុខុន ក្នុងនាមជាប្រសិតពិសេសអាស៊ានឆ្នាំ២០២២នេះ បានគូសបញ្ជាក់ថា លោកនិងអគ្គលេខាធិការអាស៊ាន បន្តមានសុទិដ្ឋិនិយមលើអនាគតរបស់អាស៊ាន បើទោះបីជាពេលនេះកំពុងប្រឈមនឹងបញ្ហាមួយចំនួនក្តី។ ការគូសបញ្ជាក់នេះ ធ្វើឡើងនៅក្នុងជំនួបរវាងលោក ប្រាក់ សុខុន និងលោក លឹម ចុកហ៊ុយ អគ្គលេខាធិការអាស៊ាន កាលពីថ្ងៃចន្ទទី១៧មករាម្សិលមិញ នៅខណៈដែលមតិជាតិនិងអន្តរជាតិមួយចំនួន លើកឡើងថា អាស៊ានកំពុងឈានទៅរកភាពបែកបាក់ បន្ទាប់ពីលោកនាយករដ្ឋមន្ត្រី ហ៊ុន សែន ធ្វើដំណើរទៅភូមា។
ចុះផ្សាយនៅថ្ងៃ៖
ស្តាប់ - ០២:២២
នៅក្នុងជំនួបទ្វេភាគីជាមួយអគ្គលេខាធិការអាស៊ាន លោកប្រាក់ សុខុន ប្រមុខការទូតកម្ពុជា បានលើកឡើងថា លោក លឹម ចុក ហ៊ុយ បានគាំទ្រកម្ពុជាយ៉ាងពេញទំហឹងចំពោះអាទិភាព និងគម្រោងសំខាន់ៗររបស់អាស៊ាន ដែលកម្ពុជាធ្វើជាម្ចាស់ផ្ទះប្តូរវេននៅឆ្នាំនេះ។ បើតាមប្រមុខការទូតកម្ពុជា ជំនួបទ្វេភាគីនេះ បានពិភាក្សាលើបញ្ហាមួយចំនួន ខណៈដែលកម្ពុជាកំពុងរៀបចំកិច្ចប្រជុំអាស៊ានធំៗនាពេលខាងមុខ។
ទោះជាយ៉ាងណា ភាគីទាំងពីរក៏បានទទួលស្គាល់ដែរ ចំពោះបញ្ហាមួយចំនួនដែលអាស៊ានកំពុងជួបប្រទះ។ បញ្ហាមួយចម្បងដែលកំពុងចម្រូងចម្រាស់នោះគឺ ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសភូមា កាលពីថ្ងៃទី០៧មករា។ ដំណើរទស្សនកិច្ចរបស់លោក ត្រូវបានប្រទេសក្នុងតំបន់មួយចំនួនរិះគន់ ដ្បិតលោកបានក្លាយជាប្រធានប្តូរវេនរបស់អាស៊ាន។ លើសពីនេះ មតិអន្តរជាតិមួយចំនួនក៏បានលើកឡើងដែរ អំពីការលើកពេលកិច្ចប្រជុំរដ្ឋមន្ត្រីការបរទេសអាស៊ាននៅពេលនេះ ថាដោយសារតែភាពខ្វែងគំនិតគ្នា។
យ៉ាងណាក៏ដោយ នៅក្នុងជំនួបលោកប្រាក់ សុខុន និងអគ្គលេខាធិការអាស៊ាន លោកបានអះអាងថា កម្ពុជាបន្តមានភាពវិជ្ជមានលើអនាគតរបស់អាស៊ាន ទោះបីជាកំពុងប្រឈមនឹងបញ្ហាមួយចំនួនក្តី។ បើតាមប្រេសិតពិសេសអាស៊ានរូបនេះ កម្ពុជាដឹងច្បាស់ថាស្មារតីសាមគ្គីភាព និងការរួបរួមគ្នារបស់អាស៊ាន នឹងយកឈ្នះរាល់គ្រប់ឧបសគ្គ។
កាសែតបាងកកប៉ុស្តិ៍នៅថ្ងៃនេះ បានចេញផ្សាយនូវអត្ថបទមួយ ដោយនិយាយអំពីតួនាទីជាប្រធានអាស៊ានរបស់កម្ពុជា។ កាសែតបាងកកប៉ុស្តិ៍ បានចុះផ្សាយថា ជោគជ័យនៃប្រធានអាស៊ានរបស់លោក ហ៊ុន សែន នឹងត្រូវ កំណត់ដោយបញ្ហាធំៗចំនួនបី គឺវឌ្ឍនភាពនៃវិបត្តិភូមា និងការចរចាអំពីក្រមសីលធម៌នៅសមុទ្រចិនខាងត្បូង និងប្រតិបត្តិការទស្សនវិស័យអាស៊ានសម្រាប់ឥណ្ឌូប៉ាស៊ីហ្វិក។
ជុំវិញបញ្ហាវិវត្តរបស់ភូមា ប្រសិតពិសេសអាស៊ាន លោកប្រាក់ សុខុន ក៏បានជួបពិភាក្សាជាមួយរដ្ឋមន្ត្រីការបរទេសសិង្ហបុរី លោក វីវៀន បាឡាក់គ្រីស្ទ្សណាន់ កាលពីថ្ងៃទី១៣មករាកន្លងទៅដែរ។ តាមសេចក្តីប្រកាសព័ត៌មានរបស់ក្រសួងការបរទេសកម្ពុជា ភាគីទាំងពីរបានជជែកពីការវិវត្តនៅក្នុងប្រទេសភូមា។ ហើយសម្រាប់រដ្ឋមន្ត្រីការបរទេសសិង្ហបុរី សម្តែងការព្រួយបារម្ភពីការវិវត្តចុងក្រោយរបស់ភូមា ធ្វើឲ្យការខិតខំទាំងប៉ុន្មានកន្លងមកនេះ ក្លាយជាអាសាបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ