ប្រឡងបាក់ឌុប៖ ក្តីបារម្ភពីសិស្សពពាក់ពពូន ពេលមើលឈ្មោះ និងថ្ងៃប្រឡង
ថ្ងៃអាទិត្យ ទី២៦ ខែធ្នូ បេក្ខជនត្រូវប្រឡងបាក់ឌុប នឹងត្រូវពិនិត្យមើលឈ្មោះប្រឡង ដើម្បីត្រៀមខ្លួនជាចុងក្រោយ មុនចូលសមរភូមិផ្តាច់ព្រ័ត្រថ្នាក់ទី១២ នៅថ្ងៃច័ន្ទ ទី២៧ធ្នូ។ នៅក្នុងបរិបទកូវីដ១៩ អ្នកធ្វើការវិស័យអប់រំ និងអាណាព្យាបាលសិស្សមួយចំនួន ទំនងជានៅមានក្តីបារម្ភពីសិស្សដែលអាចនឹងជួបជុំពពាក់ពពូនគ្នា នៅពេលពិនិត្យមើលឈ្មោះ និងនៅថ្ងៃប្រឡង នាដើមសប្តាហ៍ខាងមុខ។
ចុះផ្សាយនៅថ្ងៃ៖
ស្តាប់ - ០២:៣៣
នេះ ខុសពីឆ្នាំមុន។ ឆ្នាំមុន ព្រោះតែមេរោគកូវីដ បេក្ខជនដែលត្រូវប្រឡងបញ្ចប់ថ្នាក់ទី១២ បានជាប់ដោយស្វ័យប្រវត្តិ។ ឆ្នាំនេះ បេក្ខជនចុះឈ្មោះប្រឡងសរុប ចំនួនជាង១១ម៉ឺន៤ពាន់នាក់។ ក្នុងនោះ ថ្នាក់វិទ្យាសាស្រ្ត ប្រមាណ៤ម៉ឺននាក់ ក្រៅពីនោះ ថ្នាក់សង្គម។ ពួកគេត្រូវប្រឡងទាំងក្នុងដំណាក់កាលកូវីដនិងកូវីដបំប្លែងខ្លួនច្រើនប្រភេទ កំពុងបន្តរាតត្បាត។
ប្រធានសមាគមគ្រូបង្រៀនកម្ពុជាឯករាជ្យ អ្នកគ្រូ អ៊ុក ឆាយាវី សម្តែងក្តីបារម្ភប្រាប់វិទ្យុបារាំង RFI ថា «អ្នកស្រីព្រួយខ្លាំងបំផុត ពីការឆ្លងមេរោគ គឺនៅពេលសិស្សដែលត្រូវទៅពិនិត្យមើលឈ្មោះ។ ព្រួយខ្លាំងព្រោះ ពួកគេទំនងជាច្បាស់ជានឹងពពាក់ពពូនគ្នា។ នៅក្នុងពេលប្រឡង នាថ្ងៃច័ន្ទទៀត ក៏ដូច្នោះដែរ លែងអីនឹងជួបប្រាស្រ័យទាក់ទងគ្នា និងសប្បាយនឹងជួបជុំ បន្ទាប់ពីអាក់ខានយូរហើយ»។
ចំពោះវិធានការសុវត្ថិភាពសុខភាព សម្រាប់យកសញ្ញាបត្រមធ្យមសិក្សាទុតិយភូមិ ចំណេះទូទៅ និងសញ្ញាបត្របំពេញវិជ្ជា គឺក្រសួងអប់រំបានសរសេរលម្អិតសេចក្តីប្រកាស១១ទំព័រ ដើម្បីពន្យល់ពីចំណាត់ការ តាំងពីមុនពេល ក្នុងពេល និងក្រោយពេលប្រឡង។ ពោលគឺថាត្រូវរឹតបន្តឹងវិធានការឲ្យម៉ត់ចត់ តាំងពីអនាម័យទូទៅរបស់បេក្ខជន និងមណ្ឌលប្រឡង, ត្រូវរំងាប់មេរោគលើតុ កៅអី និងបន្ទប់ប្រឡង ហើយមានការវាស់កម្តៅខ្លួន និងសម្អាតដៃ ជាដើម ដើម្បីទប់ស្កាត់ការរីករាលដាលនៃជំងឺកូវីដ-១៩។ រដ្ឋមន្ត្រីក្រសួងសិក្សាធិការជាតិខ្មែរ លោក ហង់ជួន ណារ៉ុន បានចេញលិខិតបញ្ជាក់ថា «បេក្ខជនមានផ្ទុកមេរោគកូវីដ មិនអនុញ្ញាតឲ្យចូលប្រឡងឡើយ»។
បើទោះបីជាការប្រឡងនេះ រៀបចំធ្វើនៅក្នុងបរិបទកូវីដ១៩ក៏ដោយ តែរដ្ឋមន្ដ្រីក្រសួងអប់រំ យុវជន និងកីឡា បានសង្កត់ធ្ងន់ថា «ដំណើរការរៀបចំការប្រឡង នៅតែឈរលើគោលការណ៍ច្បាប់ យុត្តិធម៌ តម្លាភាព និងលទ្ធផលដែលអាចទទួលយកបាន»។
ចំពោះការប្រឡងបញ្ចប់ថ្នាក់វិទ្យាល័យ នៅដើមសប្តាហ៍ខាងមុខនេះ ក្រសួងអប់រំ យុវជន និងកីឡា បានបញ្ជូនវិញ្ញាសាប្រឡង ទៅកាន់បណ្ដាខេត្តឆ្ងាយៗ រួចហើយ។ អង្គភាពប្រឆាំងអំពើពុករលួយ ដែលបានអង្គេតពីដំណើរការបញ្ចូនប្រធានវិញ្ញាសាប្រឡង ពីរាជធានីទៅខេត្ត បានវាយតម្លៃយ៉ាងវិជ្ជមាន។ អង្គភាពប្រឆាំងអំពើពុករលួយ អះអាងថាវិញ្ញាសាទាំង៨៧៣ហឹប បានបិតជិតយ៉ាងគត់មុខ។ មានការរក្សាធានាសុវត្ថិភាពត្រឹមក្នុងការដឹកជញ្ជូន ហើយពេលទៅដល់គោលដៅនៅមណ្ឌលប្រឡង គឺមានក្រុមយាមកាម២៤ម៉ោង/២៤ម៉ោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ