រូបថតលោក ហ៊ុន សែន ត្រូវជាន់ឈ្លី និងដុតចោល ព្រោះតែសំណុំរឿងដំណើរទស្សនកិច្ចនៅភូមា
ជាបន្តបន្តាប់ ប្រជាពលរដ្ឋភូមា ផ្ទុះកំហឹងខឹង នឹងប្រមុខរដ្ឋាភិបាលខ្មែរ ដែលប្រកាសទៅធ្វើទស្សនកិច្ច នៅស្រុកភូមា ដើមខែមករា។ ពីម្សិលមិញនេះ រូបថតលោក ហ៊ុន សែន និងថ្នាក់ដឹកនាំភូមា ត្រូវជាន់ឈ្លី និងដុតចោល។ ក្រុមបាតុករប្រឆាំងនឹងដំណើរទស្សនកិច្ចនេះ មានទាំងយុវជន និស្សិត និងពលរដ្ឋភូមា ក្នុងនិងក្រៅប្រទេសផង។ គួររំឮក ថ្មីៗនេះ មន្ត្រីទូតភូមា មកស្រុកខ្មែរ ដើម្បីពិគ្រោះគ្នា ក្រោយលោកនាយករដ្ឋមន្ត្រីកម្ពុជា ប្រកាសថានឹងអញ្ជើញទៅទស្សនកិច្ចនៅភូមា នាដើម ឆ្នាំ២០២២ ខ្វះតែពីរសប្តាហ៍ទៀត។
ចុះផ្សាយនៅថ្ងៃ៖
ស្តាប់ - ០២:០៥
តាមកាសែតអនឡាញភូមា ឈ្មោះ Khit Thit Media គឺគេឃើញមាន រូបថតមួយសន្លឹក របស់លោក ហ៊ុន សែន ពាក់វ៉ែនតា ទឹកមុខញញឹម ត្រូវផ្តិតមួយផ្ទាំងធំ។ រូបភាពនេះ ត្រូវអមដោយជើងមនុស្សផ្សេងៗគ្នា ជាន់ជុំវិញ និង ជាន់លើក្បាល ជាន់ត្រចៀក និងស្មាផង។ កាសែត The Cambodia Daily បានរាយការណ៍ ថ្ងៃទី២១ធ្នូ ថា « និស្សិតភូមា នៅសាកលវិទ្យាល័យ Yadanar Pon បាននាំគ្នាយករូបលោក ហ៊ុន សែន ទៅជាន់ឈ្លី និងដុតចោលតាមទីសាធារណៈ»។ ទន្ទឹមនឹងគ្នានេះ ហ្វេសបុក «ក្រុមអ្នកប្រយុទ្ធ CNRP» បានផ្សព្វផ្សាយ នៅថ្ងៃទី២០ធ្នូ ថា «ប្រជាពលរដ្ឋភូមា យល់ឃើញថា ដំណើររបស់ ហ៊ុន សែន ទៅប្រទេសរបស់ខ្លួន គឺដើម្បីគាំទ្ររបបសឹក មីង អ៊ុងឡាំង ដែលជា មេដឹកនាំផ្ដាច់ការដូចគ្នា។»
ជុំវិញសំណុំរឿងអន្តរជាតិដ៏ចម្រូងចម្រាស់នេះ លោកនាយករដ្ឋមន្ត្រីកម្ពុជា ហ៊ុន សែន បានប្រកាសជាថ្មីពីជំហររបស់ខ្លួន កាលពីសប្តាហ៍មុននេះ ថា «សូមកុំទាន់វាយតម្លៃជាមុន ហើយរង់ចាំមើលសិន» ពោលគឺលោក ហ៊ុន សែន ចង់ឲ្យអ្នករិះគន់ទុកពេលវេលាឲ្យរូបលោក និងក្រុមការងារ ធ្វើការងារ និង ចាត់ចែងកិច្ចការជាមួយថ្នាក់ដឹកនាំភូមា។
ចំពោះសហគមអន្តរជាតិ ស្ថានការណ៍ ស្រុកខ្មែរ គឺ ស្រដៀងគ្នានឹងនយោបាយភូមាដែរ ត្រង់ថា សំឡេងប្រឆាំងត្រូវរឹតត្បិត។ រដ្ឋាភិបាលស៊ីវិលដឹកនាំដោយ ប្រមុខសំឡេងប្រឆាំងនៅភូមា លោកស្រី អ៊ុង សានស៊ូជី គឺត្រូវក្រុមយោធា ធ្វើរដ្ឋប្រហារទម្លាក់ចេញពីតំណែង កាលពី ខែកុម្ភៈដើមឆ្នាំនេះ។ សហគមន៍អន្តរជាតិ ពិសេសប្រទេសកាន់លទ្ធិប្រជាធិបតេ្យ បាន រិះគន់ ចង្អុរមុខ ថ្កោលទោស របបសឹក ភូមា ជាហូរហែ។ ប៉ុន្មានសប្តាហ៍មុននេះ លោកស្រី អ៊ុង សានស៊ូជី និមិត្តរូបនៃសេរីភាពភូមា ត្រូវតុលាការ ក្រោមអំណាចរបបសឹក បានសម្រេចកាត់ទោសដាក់ពន្ធនាគារ ចំនួនបួនឆ្នាំ ពីបទល្មើសញុះញ៉ុង់ឲ្យបំពានវិធានការប្រឆាំងកូវីដ និងពីបទល្មើសបំផ្លាញសណ្តាប់ធ្នាប់សាធារណៈ។
តាមកាសែត Le journal de Montréal, លោកស្រី អ៊ុង សានស៊ូជី អាចនឹងត្រូវឋិតនៅក្នុងការឃុំឃាំងក្នុងផ្ទះ ច្រើនឆ្នាំតទៅទៀត ប្រសិនបើគ្មានអ្វីផ្លាស់ប្តូទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ