អ្នកវិភាគ៖ វៀតណាមនឹងគាំទ្រកម្ពុជា ខណៈកម្ពុជាជួបរឿងធំៗពេលធ្វើជាប្រធានអាស៊ានឆ្នាំ២០២២
តបតាមការអញ្ជើញរបស់ ព្រះមហាក្សត្រកម្ពុជា លោក ង្វៀង ស៊ួនហ្វុក ប្រធានាធិបតីនៃប្រទេសសង្គមនិយមវៀតណាម នឹងមកបំពេញទស្សនកិច្ចជាផ្លូវរដ្ឋ នៅកម្ពុជារយៈពេលពីរថ្ងៃ គឺថ្ងៃទី២១ និង២២ ខែធ្នូ ឆ្នាំ២០២១។ ទស្សនកិច្ចរបស់ប្រមុខរដ្ឋវៀតណាមពេលនេះ ត្រូវអ្នកជំនាញខាងកិច្ចការតំបន់ និងទំនាក់ទំនងអន្តរជាតិមើលឃើញថា ជាការឲ្យតម្លៃរបស់ប្រទេសវៀតណាមដល់ទំនាក់ទំនងទ្វេភាគីដល់កម្ពុជា បើទោះណាជាប្រទេសទាំងពីរធ្លាប់មានការថ្នាំងថ្នាក់គ្នារឿងសមុទ្រចិនខាងត្បូងក៏ដោយ។
ចុះផ្សាយនៅថ្ងៃ៖
ស្តាប់ - ០១:៥៩
តាមកម្មវិធីដែលបានគ្រោងទុក លោកប្រធានាធិបតីវៀតណាម ង្វៀន ស៊ួនហ្វុក នឹងមកដល់កម្ពុជានៅព្រឹកថ្ងៃអង្គារ ទី២១ ខែធ្នូស្អែកនេះ។ អំឡុងបំពេញទស្សនកិច្ចផ្លូវរដ្ឋនេះ លោក ង្វៀន ស៊ួនហ្វ៊ុក នឹងចូលក្រាបថ្វាយបង្គំគាល់ព្រះមហាក្សត្រកម្ពុជា និងមានជួបជាមួយមេដឹកនាំកំពូលៗរបស់កម្ពុជាផងដែរ រួមមានលោកនាយករដ្ឋមន្ត្រី ហ៊ុន សែន លោក សាយ ឈុំ ប្រធានព្រឹទ្ធសភា និងលោក ហេង សំរិន ប្រធានរដ្ឋសភា។
បន្ថែមពីនេះ លោកប្រធានាធិបតីវៀតណាម អតីតនាយករដ្ឋមន្ត្រី ដែលត្រូវបានរដ្ឋសភាវៀតណាម បោះឆ្នោតតែងតាំង ជាប្រធានាធិបតីជំនួសលោក ង្វៀន ភូជុង កាលពីខែមេសា ឆ្នាំ២០២១នោះ នឹងធ្វើជាអធិបតីជាមួយលោក ហេង សំរិន នៅក្នុងពិធីបញ្ចុះបឋមសិលាសាងសង់អគាររដ្ឋបាលថ្មីនៅវិមានរដ្ឋសភា ដែលជាជំនួយរបស់រដ្ឋាភិបាលវៀតណាមក្នុងទឹកប្រាក់ប្រមាណ ២៥លានដុល្លារ។
ជុំវិញទស្សនកិច្ចរបស់ប្រមុខរដ្ឋវៀតណាមនៅកម្ពុជាពេលនេះ លោកបណ្ឌិត ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី(AVI)មើលឃើញថា ជាដំណើរទស្សនកិច្ចមួយដែលនឹងផ្តល់តម្លៃដល់ទំនាក់ទំនងទ្វេភាគី តាមរយៈការដឹកនាំប្រតិភូមកជាមួយសុទ្ធសឹងជាមនុស្សសំខាន់របស់វៀតណាម រួមនឹងការជួយគាំទ្រកម្ពុជា ទាំងបញ្ហាក្នុងស្រុក បញ្ហាតំបន់ និងអន្តរជាតិ ដែលកម្ពុជាត្រូវធ្វើជាប្រធានអាស៊ានឆ្នាំ២០២២ ផងដែរ។
សូមបញ្ជាក់ថា លោក ង្វៀន ស៊ួនហ្វុក គឺជាមេដឹកនាំអាស៊ានទី៤ហើយ ដែលមកបំពេញទស្សនកិច្ចនៅកម្ពុជាបន្ទាប់ពីនាយករដ្ឋមន្ត្រីឡាវ រដ្ឋមន្ត្រីការបរទេសឥណ្ឌូនេស៊ី និងរដ្ឋមន្ត្រីការបរទេសថៃ។ ជាទស្សនកិច្ច ដែលអ្នកវិភាគសន្និដ្ឋានថា ផ្តល់សារៈសំខាន់ដល់កម្ពុជា មុនកម្ពុជាឡើងធ្វើជាប្រធានអាស៊ានឆ្នាំ២០២២ និងត្រូវរ៉ាប់រងរឿងធំៗមួយចំនួន ដូចជាបញ្ហាភូមា បញ្ហាសមុទ្រចិនខាងត្បូង និងបញ្ហាកូវីដជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ