បុគ្គលិកណាហ្គាវើលធ្វើកូដកម្ម ទាមទារឲ្យក្រុមហ៊ុនទទួលយកបុគ្គលិកចូលធ្វើការវិញ
ដូចការគ្រោងទុក កូដកម្មរបស់បុគ្គលិកក្រុមហ៊ុនណាហ្គាវើល បានចាប់ផ្តើមហើយ នៅព្រឹកថ្ងៃសៅរ៍ទី១៨ខែធ្នូនេះ ដោយមានមនុស្សចូលរួមរាប់រយនាក់ នៅចំពីមុខកាស៊ីណូដ៏ធំជាងគេនៅទីក្រុងភ្នំពេញ។ កូដកម្មរបស់ក្រុមបុគ្គលិកកាស៊ីណូណាហ្គាវើល ធ្វើឡើងបន្ទាប់ពីការប្រជុំត្រីភាគីដែលសម្របសម្រួលដោយក្រសួងការងារកាលពីថ្ងៃទី១៤ធ្នូ ទទួលបរាជ័យ ដោយសារតែជំហរសហជីព នៅតែទទូចឲ្យក្រុមហ៊ុនទទួលយកបុគ្គលិកចូលធ្វើការវិញ តែភាគីថៅកែនៅតែបន្តបដិសេធ។
ចុះផ្សាយនៅថ្ងៃ៖
ស្តាប់ - ០២:១១
នៅលើសួនច្បារផ្កាចម្រុះពណ៌ ចំពីមុខអគារដ៏ទំនើបនៃកាស៊ីណូល្បែងស៊ីសងធំជាងគេក្នុងទីក្រុងភ្នំពេញ មនុស្សរាប់រយនាក់ ក្នុងសំលៀកបំពាក់ពណ៌ក្រហមឆ្អៅ អ្នកខ្លះដៃកាន់បដា អ្នកខ្លះបាំងឆ័ត្រពណ៌ខៀវ អ្នកខ្លះស្រែកបន្ទរតាមបុរសជាអ្នកដឹកនាំកូដកម្មដែលកាន់ក្បាលមេក្រូ។ នេះគឺជាកូដកម្មដែលធ្វើឡើងតាមការគ្រោងទុករបស់សហជីពប្រចាំក្រុមហ៊ុនណាហ្គាវើល។ អ្នកចូលរួមកូដកម្មនេះ មិនមែនមានតែបុគ្គលិកដែលត្រូវបានបញ្ឈប់ពីការងារនោះទេ។ ក៏មានដែរ បុគ្គលិកដែលកំពុងធ្វើការងារនៅក្រុមហ៊ុនណាហ្គាវើល។
កូដកម្មនេះគឺភាគីសហជីពនៅតែទទួចឲ្យថៅកែក្រុមហ៊ុនទទួលយកបុគ្គលិកចំនួន៣៦៥នាក់ចូលធ្វើការវិញ បន្ទាប់ពីក្រុមហ៊ុនបានបញ្ឈប់អស់រយៈពេលជាង៨ខែមកនោះ នៅក្រោមហេតុផលវិបត្តិកូវីដ១៩។
នៅក្នុងចំណោមបុគ្គលដែលមានឈ្មោះត្រូវបញ្ឈប់ពីការងារជាង១៣០០នាក់ មានជាច្រើននាក់គឺជាថ្នាក់ដឹកនាំសហជីព និងសកម្មជនសហជីពដែលតែងតែចេញមុខតវ៉ាប្រឆាំងនឹងការរំលោភសិទ្ធិការងារនៅក្នុងក្រុមហ៊ុន។ ប៉ុន្តែក្នុងចំណោមបុគ្គលទាំងជាង១៣០០នាក់ គឺមានជាង៩០០នាក់ បានបង្ខំចិត្តទទួលយកសំណង តាមអ្វីដែលក្រុមហ៊ុនផ្តល់ឲ្យ ខណៈបុគ្គលិកចំនួន៣៦៥នាក់ទៀត នៅរក្សាជំហរសុំចូលធ្វើការងារវិញ ពីព្រោះតែពួកគេធ្លាប់ធ្វើការនៅទីនេះ ខ្លះជាង២០ឆ្នាំមកហើយ ហើយដែលមានវ័យកាន់តែច្រើន ពិបាករកការងារថ្មី។ នេះបើតាមកញ្ញា ឈឹម សុខន អគ្គលេខាធិការសហជីពទ្រទ្រង់សិទ្ធិការងាររបស់បុគ្គលិកខ្មែរ នៅកាស៊ីណូណាហ្គាវើល។
តំណាងសហជីពរូបនេះបានអះអាងថា នៅថ្ងៃដំបូងនេះ កូដកម្មគឺធ្វើឡើងដោយភាពស្ងៀមស្ងាត់ ប៉ុន្តែបើនៅតែគ្មានដំណោះស្រាយទេ កូដកម្មនេះនឹងបន្តស្រែកតាមឧបករណ៍បំពងសំឡេង ខណៈភាគីក្រុមហ៊ុនបានព្រមានតាមមេក្រូ ដោយប្រកាសពីដីការក្សាការពារដែលចេញដោយតុលាការ។
សូមបញ្ជាក់ថា កូដកម្មរបស់ក្រុមបុគ្គលិកកាស៊ីណូណាហ្គាវើលនេះ កើតឡើងបន្ទាប់ពីការប្រជុំត្រីភាគីដែលសម្របសម្រួលដោយក្រសួងការងារ កាលពីថ្ងៃទី១៤ធ្នូ ទទួលបរាជ័យ ដោយសារតែជំហរសហជីពនៅតែទទូចឲ្យក្រុមហ៊ុនទទួលយកបុគ្គលិកចូលធ្វើការវិញ តែភាគីថៅកែនៅតែបន្តបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ