តុលាការកំពូលនៃសាលាក្ដីខ្មែរក្រហម បដិសេធសំណើសុំបញ្ជូនសំណុំរឿង០០៣ ទៅជំនុំជម្រះ
តុលាការកំពូលនៃសាលាក្ដីខ្មែរក្រហម នៅថ្ងៃទី១៧ខែធ្នូម្សិលមិញ បានសម្រេចប្រកាសបដិសេធសំណើរបស់សហព្រះរាជអាជ្ញាអន្ដរជាតិ សុំបញ្ជូនសំណុំរឿង០០៣ ប្រឆាំងនឹង មាស មុត ទៅជំនុំជម្រះ។ តាមរយៈការសម្រេចនេះ សំណុំរឿង០០៣ ប្រឆាំងនឹង មាស មុត ត្រូវបិទបញ្ចប់ ដោយគ្មានការបញ្ជូនសំណុំរឿងនេះទៅជំនុំជម្រះទេ។
ចុះផ្សាយនៅថ្ងៃ៖
ស្តាប់ - ០២:៤៥
សំណើរបស់សហព្រះរាជអាជ្ញាអន្ដរជាតិ សុំបញ្ជូនសំណុំរឿង០០៣ ប្រឆាំងនឹង មាស មុត ទៅជំនុំជម្រះ ត្រូវអង្គជំនុំជម្រះតុលាការកំពូលនៃសាលាក្ដីខ្មែរក្រហម បដិសេធចោល។ នៅក្នុងសេចក្ដីប្រកាសព័ត៌មានចុះថ្ងៃទី១៧ខែធ្នូ អង្គជំនុំជម្រះបានសម្រេចថា «បណ្ដឹងសារទុក្ខរបស់សហព្រះរាជអាជ្ញាអន្ដរជាតិ ស្ដីពីការខកខានរបស់អង្គបុរេជំនុំជម្រះ ក្នុងការបញ្ជូនសំណុំរឿង០០៣ ទៅជំនុំជម្រះ» មិនអាចទទួលយកបាន ដោយសំឡេងភាគច្រើន ៦សំឡេង ទល់នឹង១សំឡេង។
អង្គជំនុំជម្រះតុលាការកំពូលបញ្ជាក់ថា សំឡេងភាគច្រើនបានបដិសេធការយល់ឃើញដែលថា អង្គបុរេជំនុំជម្រះ បានតម្កល់ជាឯកច្ឆ័ន្ទនូវសុពលភាពនៃដីកាបញ្ជូនរឿងទៅជំនុំជម្រះ ប្រឆាំងនឹង មាស មុត ក្នុងសេចក្ដីពិចារណាលើបណ្ដឹងឧទ្ធរណ៍ប្រឆាំងនឹងដីកាដំណោះស្រាយរបស់ខ្លួន។ សម្រាប់អង្គជំនុំជម្រះ សំណុំរឿង០០៣ បានបញ្ចប់ នៅពេលអង្គជំនុំជម្រះចេញសេចក្ដីពិចារណារបស់ខ្លួន ដោយសារគ្មានដីកាបញ្ជូនរឿងទៅជំនុំជម្រះស្ថាពរ និងដែលអាចអនុវត្តបាន។
លោកស្រីចៅក្រម Maureen Harding Clark សន្និដ្ឋាននៅក្នុងមតិជំទាស់របស់លោកស្រីថា «សេចក្ដីសម្រេចរបស់អង្គបុរេជំនុំជម្រះ ត្រូវតែបដិសេធចោល ហើយសំណុំរឿង០០៣ ប្រឆាំងនឹង មាស មុត គប្បីបញ្ចប់»។
សូមជម្រាបថា លោក មាស មុត ត្រូវបានសហចៅក្រមស៊ើបអង្កេតអន្តរជាតិ ចោទប្រកាន់នៅថ្ងៃទី៣ ខែមីនា ឆ្នាំ២០១៥ ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានធ្ងន់ធ្ងរលើអនុសញ្ញាទីក្រុងហ្សឺណែវ និងការរំលោភបំពានក្រមព្រហ្មទណ្ឌឆ្នាំ១៩៥៦។ មានស្រុកកំណើតនៅស្រុកឈូក ខេត្តកំពត ជនជាប់ចោទអាយុ៨៣ឆ្នាំរូបនេះ ធ្លាប់ជាកម្មាភិបាលជាន់ខ្ពស់ក្នុងរបបខ្មែរក្រហម ដោយមានតួនាទីជាសមាជិកគណៈមជ្ឈិមបក្ស និងជាមេបញ្ជាការកងទ័ពជើងទឹក១៦៤ ប្រចាំការនៅកំពង់សោម។
នៅចុងឆ្នាំ២០១៨ សហចៅក្រមស៊ើបអង្កេតអន្តរជាតិ បានសម្រេចបញ្ជូនសំណុំរឿងរបស់លោក មាស មុត ទៅជំនុំជម្រះដោយអះអាងថា មានភស្តុតាងគ្រប់គ្រាន់បញ្ជាក់ថា លោក មាស មុត ស្ថិតក្នុងចំណោមជនដែលទទួលខុសត្រូវខ្ពស់បំផុត ក្នុងរបបខ្មែរក្រហម។ ប៉ុន្តែសហចៅក្រមស៊ើបអង្កេតជាតិវិញ បានជំទាស់ ដោយយល់ថា លោក មាស មុត មិនស្ថិតនៅក្នុងចំណោមជនត្រូវចោទនិងអ្នកទទួលខុសត្រូវខ្ពស់បំផុតនៃរបបខ្មែរក្រហមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ