មេធាវី៖ លោក កឹម សុខា នឹងចូលរួមក្នុងសវនាការពេលខាងមុខព្រោះលោកចង់លាងជម្រះខ្លួនពីការចោទប្រកាន់
សាលាដំបូងរាជធានីភ្នំពេញ នឹងបន្តបើកសវនាការឡើងវិញ លើសំណុំរឿង លោក កឹម សុខា នៅដើមឆ្នាំក្រោយនេះ បន្ទាប់ពីបានផ្អឹបទុកសំណុំរឿងនេះជាងមួយឆ្នាំ។ បើតាមមេធាវីការពារក្តី លោក កឹម សុខា នឹងបង្ហាញវត្តមាននៅក្នុងសវនាការនោះ ដូចពេលកន្លងមកដែរ ពីព្រោះលោកចង់ទៅបកស្រាយពីភាពស្អាតស្អំរបស់លោក និងលាងជម្រះនូវការចោទប្រកាន់របស់តុលាការ។ គឺជាការប្រកាន់ថា ឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០១:៤២
ចំពោះអ្វីដែលជាបទចោទរបស់តុលាការក្រោមបទ«សន្និដ្ឋិភាពជាមួយបរទេស» ឬឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជានោះ គឺគ្រាន់តែជាការចោទប្រកាន់ប៉ុណ្ណោះ ប៉ុន្តែតុលាការនូវមិនមានភស្តុតាងអ្វីរឹងម៉ាំបន្ថែមឡើយ។ នេះបើតាមលោក ផែង ហេង សហមេធាវីការពារក្តី លោក កឹម សុខា។
បើតាមមេធាវីរូបនេះ ដើម្បីលាងជម្រះនូវការចោទប្រកាន់នេះ លោក កឹម សុខា នឹងបង្ហាញវត្តមាននៅក្នុងសវនាការនានៅថ្ងៃទី២២មករាខាងមុខ ដូចពេលកន្លងមកដែរ ពីព្រោះលោកចង់ទៅបកស្រាយពីភាពស្អាតស្អំរបស់លោក។
សូមបញ្ជាក់ថា សំណុំរឿង លោក កឹម សុខា ប្រធានអតីតគណបក្សសង្គ្រោះជាតិ ត្រូវបានផ្អឹបទុកអស់រយៈពេលជាងមួយឆ្នាំ ក្រោមហេតុផលការឆ្លងរីករាលដាលជំងឺកូវីដ-១៩ចូលក្នុងសហគមន៍។ តែជាការកត់សំគាល់ ការប្រកាសបន្តសវនាការឡើងវិញនៅថ្ងៃទី២២មករាខាងមុខ គឺក្រោយពីលោក កឹម សុខា បានប្រកាសហាមប្រាមមិនឲ្យលោក សម រង្ស៊ី យកឈ្មោះ និងរូបថតរបស់លោក ទៅប្រើប្រាស់ភ្ជាប់ជាមួយនឹងសកម្មភាពនានា ដែលពុំមានការអនុញ្ញាត ឬគាំទ្រពីលោក ដែលមានន័យថា សម រង្ស៊ី និងកឹម សុខា លែងជាមួយមនុស្សតែមួយហើយ។
សម្រាប់អ្នកវិភាគស្ថានការណ៍នយោបាយនៅកម្ពុជា ការប្រកាសបន្តសវនាការឡើងវិញលើសំណុំរឿងរបស់មេបក្សប្រឆាំងនេះ គឺស្របពេលដែលកម្ពុជាត្រូវធ្វើជាប្រធានអាស៊ាននៅឆ្នាំ២០២២ និងក្រោយពីសម្ព័ន្ធភាពរវាង លោក សម រង្ស៊ី និងលោក កឹម សុខា ទំនងជាដើរដល់ផ្លូវបំបែក។
ទោះជាយ៉ាងណាក៏ដោយ ក្រុមអ្នកវិភាគ យល់ថា ការបន្តសវនាការឡើងវិញនេះ គឺជាសញ្ញាវិជ្ជមាន ហើយពួកគេចង់ឲ្យអ្នកនយោបាយខ្មែរបញ្ចប់រឿងនេះដោយការចរចាគ្នាដើម្បីផលប្រយោជន៍រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ