អ្នកនយោបាយអតីតបក្សប្រឆាំង២រូបទៀតទទួលបានសិទ្ធិធ្វើនយោបាយឡើងវិញ
អ្នកនយោបាយរបស់អតីតគណបក្សសង្គ្រោះជាតិចំនួន២រូបទៀត បានទទួលសិទ្ធិធ្វើនយោបាយឡើងវិញ តាមរយៈព្រះរាជក្រឹត្យរបស់ព្រះមហាក្សត្រចុះថ្ងៃទី១០ ខែធ្នូ ឆ្នាំ២០២១។ គិតមកដល់ពេលនេះ មានអតីតមន្ត្រីគណបក្សសង្គ្រោះជាតិចំនួន ២៦ រូបក្នុងចំណោម ១១៨ រូប ដែលជាប់បម្រាមធ្វើនយោបាយរយៈពេល ៥ ឆ្នាំ នោះ បានស្នើសុំសិទ្ធិធ្វើនយោបាយឡើងវិញ។
ចុះផ្សាយនៅថ្ងៃ៖
អ្នកនយោបាយ២រូបរបស់អតីតគណបក្សសង្គ្រោះជាតិដែលត្រូវបានព្រះមហាក្សត្រផ្តល់នីតិសម្បទាឲ្យមានសិទ្ធិធ្វើនយោបាយឡើងវិញនោះ គឺមាន លោក ស៊ុន ចន្ធី ជាអតីតប្រធានគណៈកម្មការប្រតិបត្តិនៃអតីតគណបក្សសង្គ្រោះជាតិខេត្តកំពង់ធំ និងលោក មុត មល្លា គឺជាអតីតប្រធានគណៈកម្មការប្រតិបត្តិខេត្តសៀមរាប។
គេនៅមិនទាន់ដឹងថាតើអ្នកនយោបាយទាំង២រូបនេះទៅធ្វើនយោបាយតាមរយៈការបង្កើតគណបក្សថ្មី ឬទៅចូលរួមជីវភាពនយោបាយជាមួយគណបក្សណាមួយនៅឡើយ។ ប៉ុន្តែសម្រាប់អ្នកនយោបាយរបស់អតីតបក្សប្រឆាំងនេះដែលទទួលបានសិទ្ធិធ្វើនយោបាយឡើងវិញ ភាគច្រើនគឺពួកគេចេញទៅបង្កើតគណបក្សនយោបាយថ្មី។
អ្នកដែលចេញទៅបង្កើតបក្សថ្មីរួមមាន លោក អ៊ូ ច័ន្ទរ័ត្ន ទៅបង្កើតគណបក្ស«កែទម្រង់កម្ពុជា» ដែលមានការចូលរួមពី លោក ប៉ុល ហំម ដែលអ្នកទាំងពីរត្រូវបានគេមើលឃើញថា ជាមនុស្សស្និទនឹងលោក កឹម សុខា។ ក៏មានដែរ លោក ជីវ កត្តា និងលោក កង គឺមហាក់ ទៅបង្កើតបក្សថ្មីដាក់ឈ្មោះថា «ខ្មែរស្រឡាញ់ជាតិ» ខណៈ លោក យ៉ែម ប៉ុញ្ញាឬទ្ធិ អតីតមនុស្សស្និទនឹង លោក កឹម សុខា ទៅបង្កើតបក្សថ្មីដាក់ឈ្មោះថា »កម្ពុជានិយម»។
ចំណែកមនុស្សមួយចំនួន ដែលគេដឹងថាស្និទនឹង លោក សម រង្ស៊ី ដូចជា លោក ថាច់ សេដ្ឋា ទទួលបានសិទ្ធិធ្វើនយោបាយឡើងវិញ ហើយទៅដឹកនាំគណបក្ស«ភ្លើងទៀន» ជាអតីតគណបក្ស «សម រង្ស៊ី» ខណៈ លោក សៀម ភ្លុក ដែលត្រូវគេអះអាងថាជាមនុស្សរបស់ លោក សម រង្ស៊ី ទៅបង្កើតគណបក្ស « បេះដូងជាតិ» តែត្រូវបានក្រសួងមហាផ្ទៃបដិសេធ។ ជាមួយគ្នានោះ លោក ជូង ជូងី ដែលជាមេធាវីការពារក្តីលោក សម រង្ស៊ី មិនទទួលបានសិទ្ធិធ្វើនយោបាយឡើងវិញឡើយ បើទោះបីជាលោកបានដាក់ពាក្យស្នើសុំក៏ដោយ។
ចំណែក លោក គង់ គាំ ជាអតីតទីប្រឹក្សាគណបក្សសង្គ្រោះជាតិ ទៅធ្វើជាទីប្រឹក្សាឲ្យគណបក្សឆន្ទៈខ្មែររបស់កូនប្រុសគាត់ គឺលោក គង់ ម៉ូនីកា ខណៈលោក គង់ បូរ៉ា ជាកូនប្រុសម្នាក់ទៀត ទៅចុះចូលជាមួយគណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ