អាមេរិកចង់ឃើញកម្ពុជានិងអាស៊ានដោះស្រាយវិបត្តិភូមា ដោយឈរលើគោលការណ៍ទាំងប្រាំចំណុច
ទីប្រឹក្សាក្រសួងការបរទេសអាមេរិក លោក Derek Chollet បានមកបំពេញទស្សកិច្ចនៅកម្ពុជានិងឥណ្ឌូនេស៊ី ចំនួន៥ថ្ងៃ ដើម្បីពិភាក្សាពីវិបត្តិនយោបាយភូមា។ នៅកម្ពុជា លោកDerek Chollet បានជួបមន្ត្រីជាន់ខ្ពស់ ដោយលើកឡើងពីអ្វីដែលសហរដ្ឋអាមេរិក ចង់ឃើញនោះ គឺកម្ពុជាដោះស្រាយវិបត្តិនៅភូមា ដោយឈរលើគោលការណ៍ទាំងប្រាំចំណុច ដែលអាស៊ានបានដាក់ចេញកន្លងមក។
ចុះផ្សាយនៅថ្ងៃ៖
តាមរយៈទំព័រទ្វីតធ័ររបស់ខ្លួន នៅថ្ងៃទី១០ធ្នូ លោក Derek Chollet បានបញ្ជាក់ពីជំនួបរបស់លោកជាមួយមន្ត្រីជាន់ខ្ពស់កម្ពុជាចំនួន២រូបផ្សេងគ្នា។ ក្នុងនោះជំនួបជាមួយប្រមុខការទូតកម្ពុជា លោកប្រាក់ សុខុន លោក Derek Chollet បានអះអាងថា ភាគីទាំងសងខាងបានជជែកគ្នាដោយផ្លែផ្កា អំពីការចូលរួមរបស់អាមេរិកនៅក្នុងតំបន់អាស៊ីអាគ្នេយ៍ ការវិវត្តិនៃវិបត្តិនយោបាយក្នុងប្រទេសភូមា និងការដើរតួនាទីរបស់កម្ពុជាជាប្រធានអាស៊ាននៅឆ្នាំក្រោយ។
ដោយឡែកក្នុងជំនួបជាមួយលោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី លោក Derek Chollet បានជជែកគ្នាពីផែនការជាប្រធានអាស៊ានរបស់កម្ពុជានៅឆ្នាំក្រោយដូចគ្នា។ ក៏ប៉ុន្តែបើតាមទីប្រឹក្សាក្រសួងការបរទេសអាមេរិករូបនេះ អាមេរិកឲ្យតម្លៃលើភាពជាដៃគូដ៏រឹងមាំរបស់ខ្លួនជាមួយអាស៊ាន ហើយជំរុញឲ្យសមាជិករបស់អាស៊ានបន្តដាក់សម្ពាធលើរបបភូមាឲ្យអនុវត្តការឯកភាពទាំងប្រាំចំណុចរបស់អាស៊ាន។
គោលការណ៍ទាំងប្រាំចំណុចនោះរួមមាន ការបញ្ឈប់ជាបន្ទាន់នូវអំពើហិង្សានៅក្នុងប្រទេសភូមា ការបង្កើតកិច្ចសន្ទនាដោយសន្តិវិធីរវាងភាគីពាក់ព័ន្ធក្នុងន័យរក្សាផលប្រយោជន៍ប្រជាពលរដ្ឋ ការតែងតាំងបេសកជនពិសេសដើម្បីជួយសម្របសម្រួល ការផ្តល់នូវជំនួយមនុស្សធម៌ និងការបំពេញទស្សកិច្ចពីបណ្តាប្រទេសនានាទៅកាន់ភូមា។ ទាំងនេះជាគោលការណ៍ប្រាំចំណុច ដែលថ្នាក់ដឹកនាំក្នុងតំបន់អាស៊ាន បានឯកភាព កាលពីថ្ងៃទី២៤មេសា ដើម្បីដោះស្រាយវិបត្តិនយោបាយនៅភូមា ក្រោយមានរដ្ឋប្រហារកាលពីថ្ងៃទី០១កុម្ភៈ។
ទោះជាយ៉ាងណា វិទ្យុបារាំងអន្តរជាតិ មិនអាចសុំការបញ្ជាក់បន្ថែមពីលទ្ធផលនៃជំនួបរវាងទីប្រឹក្សាក្រសួងការបរទេសអាមេរិកជាមួយមន្ត្រីជាន់ខ្ពស់រដ្ឋាភិបាល ពីក្រសួងការបរទេសកម្ពុជាបាននៅឡើយនោះទេ។ ដោយលោក កុយ គួង អ្នកនាំពាក្យក្រសួងការបរទេសកម្ពុជា ស្នើឲ្យរង់ចាំសេចក្តីប្រកាសព័ត៌មានជាផ្លូវការតែម្តង។
ក៏ប៉ុន្តែ ពីខាងអ្នកឃ្លាំមើលសិទ្ធិមនុស្សអន្តរជាតិ លោក Phil Robertson បានសរសេរលើទំព័រទ្វីតធ័ររបស់ខ្លួនថា គ្មានការសង្ស័យអ្វីនោះទេគឺ ទីប្រឹក្សាក្រសួងការបរទេសអាមេរិក នឹងលើកយកបញ្ហាកំពុងកើតនៅភូមា ជាពិសេសទៅលើបញ្ហសិទ្ធិមនុស្ស។
ជុំវិញបញ្ហានៅភូមា ប្រមុខរដ្ឋាភិបាលកម្ពុជា លោក ហ៊ុន សែន ក៏បានប្រកាសពីដំណើរទស្សកិច្ចរបស់ខ្លួនទៅកាន់ប្រទេសភូមានៅខែមករាឆ្នាំ២០២២។ បើតាមលោកហ៊ុន សែន ការធ្វើបែបនេះគឺដើម្បីដោះស្រាយវិបត្តិដែលជាប់គាំងនៅភូមា ខណៈដែលកម្ពុជានឹងធ្វើជាប្រធានអាស៊ាននៅឆ្នាំក្រោយនោះ។ នៅទន្ទឹមនេះវៀតណាមជាប្រទេសក្បែរខាង ក៏បានប្រកាសគាំទ្រកម្ពុជា ក្នុងការអញ្ជើញមេដឹកនាំយោធាភូមា ចូលរួមក្នុងការកិច្ចប្រជុំកំពូលអាស៊ាន នៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ