អាជ្ញាធរតាមខេត្តជាប់បឹងទន្លេសាប មានចំណាត់ការផ្សេងៗគ្នាចំពោះពលរដ្ឋដែលរំលោភកាប់ទន្ទ្រានព្រៃលិចទឹក
នៅទន្លេសាប យុទ្ធនាការបង្ក្រាបបទល្មើសនៅតំបន់ព្រៃលិចទឹក កំពុងតែធ្វើឡើងយ៉ាងក្តៅគគុក។ នៅខេត្តមួយចំនួន អាជ្ញាធរប្រើធម៌ក្តៅ ចាប់ឃាត់ខ្លួនមនុស្ស និងបញ្ចូនទៅតុលាការ ព្រោះតែបានប្រព្រឹត្តបទល្មើសជាក់ស្តែង ក្នុងការកាប់ទន្ទ្រានដីព្រៃលិចទឹក។ នៅខេត្តខ្លះទៀត អាជ្ញាធរនិងអ្នកតំណាងរាស្ត្រ ប្រើធម៌ត្រជាក់ ចុះសម្របសម្រួល ស្តាប់សំណូមពរ និងធ្វើកិច្ចសន្យាព្រមព្រៀងជាលាយលក្ខណ៍អក្សរ។
ចុះផ្សាយនៅថ្ងៃ៖
ស្តាប់ - ០២:៤១
ក្រោយចេញបញ្ជាខ្លាំងៗពីនាយករដ្ឋមន្ត្រីខ្មែរ, ក្រុមការងារអន្តរក្រសួង បានចុះការស្រាវជ្រាវកាប់ទន្ទ្រានដីព្រៃលិចទឹកនៅបឹងទន្លេសាប។ ទន្លេសាបដែលស្ថិតក្នុងខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។ នៅខេត្តបាត់ដំបង លោកចៅហ្វាយខេត្ត បានប្រាប់វិទ្យុបារាំងRFI ថា អាជ្ញាធរជំនាញ បានចាប់ខ្លួនពលរដ្ឋចំនួន៧នាក់ ដែលកំពុងតែប្រព្រឹត្តបទល្មើសជាក់ស្តែង ទន្ទ្រានដីព្រៃលិចទឹក នៅថ្ងៃទី២៩វិច្ឆិកា ថ្មីៗនេះ។ អមជាមួយវត្ថុតាង ជនល្មើសទាំង៧នាក់ បានត្រូវបញ្ចូនទៅតុលាការ ដែល ព្រះរាជអាជ្ញាខេត្ត កំពុងបន្តនីតិវិធី។ នេះបើតាមលោកអភិបាលខេត្ត សុខ លូ។
ចំពោះខេត្តសៀមរាប មន្ត្រីជំនាញខេត្តបានក្តាប់កិច្ចការបទល្មើសនេះ តាំងពីយូរយារ គឺតាំងពីមុនពេលចង្អុរបង្ហាញរបស់ប្រមុខរដ្ឋាភិបាលទៅទៀត។ ជាសរុប ចាប់ពីឆ្នាំ ២០១៤ រហូតដល់២០២១នេះ ខេត្តសៀមរាប រកឃើញបទល្មើសទន្ទ្រានដីព្រៃលិចទឹក ចំនួនជាង១៣០ករណី ហើយជាង៤០ករណី គឺជនល្មើសត្រូវតុលាការកាត់ទោស ដាក់ពន្ធនាគារ និងអ្នកខ្លះក៏រួចចេញពីមន្ទីរឃុំខ្លួនខ្លះទៅហើយ។ នេះបើតាមការបំភ្លឺរបស់លោកចៅហ្វាយខេត្ត ទៀ សីហា ដែលបន្តបញ្ជាក់ថា ពេលនេះក្រុមការងារជំនាញ នៅជួបការលំបាកក្នុងការវាស់វែងខ្លះៗ ព្រោះតែទឹកទន្លេនៅមិនទាន់ស្រកស្រួលបួលនៅឡើយ។ គេត្រូវរង់ចាំទឹកស្រកសិន ទើបងាយស្រួលវាយតម្លៃជាថ្មី។
ចំពោះខេត្តកំពង់ឆ្នាំង អាជ្ញាធរខេត្ត និងអ្នកតំណាងរាស្ត្រម្នាក់របស់ខេត្តកំពង់ឆ្នាំង បានជួបពលរដ្ឋ៥០គ្រួសារ ក្នុងស្រុកកំពង់លែង ដើម្បីស្តាប់សំណុំពរ និងរកផ្លូវដោះស្រាយ។ តំណាងពលរដ្ឋ ៤ភូមិ នៅស្រុកកំពង់លែង ស្នើសុំបន្តអាស្រ័យផលមួយរយៈទៀត លើផ្ទៃដីស្រែក្នុងតំបន់៣ ដែលបានសាបព្រោះស្រូវដំណាំរួចហើយ។ ដើម្បីជួយបន្ធូរភាពលំបាករបស់អ្នកស្រែក្រីក្រ អាជ្ញាធរខេត្តកំពង់ឆ្នាំ អនុញ្ញាតឲ្យពួកគេ មើលថែទាំដំណាំស្រូវរហូតដល់ច្រូតកាត់រួច ហើយធ្វើកិច្ចសន្យាបញ្ឈប់ការចូលទៅអាស្រ័យផលក្នុងទីតាំងនោះទៀត។ នេះបើតាមការឲ្យដឹងពីអភិបាលខេត្តកំពង់ឆ្នាំង លោក ស៊ុន សុវណ្ណារិទ្ធិ កាលពីថ្ងៃសៅរ៍ ទី៤ធ្នូ។
តាមក្រុមស្រាវជ្រាវនៃរាជ្យបណ្ឌិតសភាកម្ពុជា, ការទន្ទ្រានព្រៃលិចទឹក គឺធ្វើឲ្យខូចខាតដល់ប្រព័ន្ធជីវចម្រុះ បំផ្លាញព្រៃលិចទឹកជាជម្រមច្ឆាជាតិ ខូចធ្លាទឹក ផ្លូវទឹក និង បាត់ពូជត្រីកម្រ ជាដើម។ ក សុខមច្ឆាជាតិាកក្នុងការវាស់វសនេះជាជារឿងឈឺចាប់ក្នុងនាមជាខ្មែរ។ នេះបើតាមប្រសាសន៍បណ្ឌិត សុខ ទូច ដែលលើកឡើងនៅវិទ្យុបារាំងRFI ទៀតថា នៅពេលបែកចេញសម័យខ្មែរក្រហមភ្លាមៗ នរណាក៏ទទួលស្គាល់ថា ត្រីក្នុងបឹងទន្លេសាបសម្បូរសម្បើមណាស់ និងធំៗទៀត។ ពេលនេះ បែរជាខ្មែរស្ទើរខ្វះត្រីទៅវិញ។
សូមរំឮកថា ជំនាន់សម័យបារាំង និងជំនាន់សង្គមរាស្ត្រនិយម ត្រីខ្មែរ ត្រូវនាំចេញទៅលើលក់ក្នុងតំបន់អាស៊ី លក់ដល់ សិង្ហបុរី និង ហុងកុង។
ទន្លេសាប ជាបេះដូង នៃស្រុកខ្មែរ និងជាបឹងទឹកសាប ដ៏ធំជាងគេនៅតំបន់អាស៊ីអាគ្នេយ៍។ បើតាមអាជ្ញាធរទន្លេសាប, បឹងនេះ បណ្ដោយប្រមាណ ១១៦ គ.ម ហើយទទឹង ប្រមាណពី ៣គ.ម ទៅ៣៣ គ.ម និងមានឆ្នេរប្រវែងប្រមាណ ៤៨២ គ.ម នៅរដូវប្រាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ