សារដូចទឹកបាក់ទំនប់គាំទ្រលោកហ៊ុន ម៉ាណែត ជាបេក្ខភាពនាយករដ្ឋមន្ត្រីបន្ត តែអ្នកវិភាគថាអាស្រ័យលើអ្នកបោះឆ្នោត
ភ្លាមៗបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសថាកូនប្រុសច្បងរបស់លោកគឺ លោក ហ៊ុន ម៉ាណែត នឹងធ្វើជានាយករដ្ឋមន្ត្រីបន្តពីលោក តែត្រូវឆ្លងកាត់ការបោះឆ្នោត ស្ថាប័នសាធារណៈ មន្ត្រីរាជការ កងកម្លាំងប្រដាប់អាវុធ សកម្មជនដែលស្រលាញ់គណបក្សកាន់អំណាចបានបង្ហោះសារព្រោងព្រាធ តាមបណ្តាញសង្គម និងតាមប្រព័ន្ធផ្សព្វផ្សាយ គាំទ្រការប្រកាសរបស់លោក ហ៊ុន សែន។ អ្នកវិភាគ និងអង្គការសង្គមស៊ីវិលទទួលស្គាល់ថា វាជារឿងធម្មតា និងជាគោលការណ៍ផ្ទៃក្នុងគណបក្ស ដែលមេដឹកនាំកាន់ ត្រូវតែត្រួសត្រាយផ្លូវសម្រាប់អ្នកជំនាន់ក្រោយ ខណៈការសម្រេចចុងក្រោយស្ថិតនៅលើការជ្រើសរើសរបស់ប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០៣:០០
សារគាំទ្រលោកឧត្តមសេនីយ៍ឯក ហ៊ុន ម៉ាណែត ដែលបច្ចុប្បន្នជាអគ្គមេបញ្ជាការរង និងជាមេបញ្ជាការកងទ័ពជើងគោក បានរំលេចនូវខ្លឹមសារដូចៗគ្នាផង និងខ្លឹមសារផ្សេងៗគ្នាផង នៅក្នុងន័យរួមថា ជាការប្រកាសគាំទ្រលោក ហ៊ុន ម៉ាណែត ធ្វើជាបេក្ខភាពនាយករដ្ឋមន្រ្តីនាពេលអនាគត។
អ្នកគាំទ្របក្សកាន់អំណាចបញ្ជាក់ថា លោក ហ៊ុន ម៉ាណែត គឺជាយុវជន និងជាឥស្សរជនថ្នាក់ដឹកនាំខ្មែរដ៏ឆ្នើមមួយរូបពោរពេញដោយសមត្ថភាព និងទេពកោសល្យខ្ពស់ ព្រមទាំងមានគុណធម៌ និងសីលធម៌ល្អ ដែលទទួលបានការកោតសរសើរ ការគោរព ស្រឡាញ់ពីសំណាក់ប្រជាជនទូទៅ មន្រ្តីរាជការ និងកងកម្លាំងប្រដាប់អាវុធ ព្រមទាំងមានជំនឿយ៉ាងមុតមាំថា លោក ហ៊ុន ម៉ាណែត ពិតជាឥស្សរជនដែលសក្តិសមជាអនាគតនាយករដ្ឋមន្រ្តីនៃកម្ពុជា។
នៅក្នុងក្រសែភ្នែកអ្នកតាមដានសង្គម-នយោបាយ និងក្រុមអង្គការសង្គមស៊ីវិលវិញ គឺគ្មានអ្វីដែលគួរឲ្យភ្ញាក់ផ្អើលចំពោះការប្រកាសជាសាធារណៈរបស់លោកនាយករដ្ឋមន្ត្រី ហ៊ុន សែន ដែលគាំទ្រកូនប្រុសច្បងរបស់លោក ជាបេក្ខជននាយករដ្ឋមន្ត្រីបន្តពីលោកនោះទេ។ នេះជាការលើកឡើងតាមបណ្តាញហ្វេសប៊ុករបស់លោកបណ្ឌិត ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា។
លោកបណ្ឌិត ប៉ា ច័ន្ទរឿន លើកហេតុផល២ចំណុចគឺទី១ លោកនាយករដ្ឋមន្ត្រីបានគិតគូរ និងធ្វើកិច្ចការជាច្រើន ដើម្បីត្រួសត្រាយផ្លូវឲ្យអ្នកបន្តវេនរបស់ខ្លួន។ ទី២ គឺជាគោលការណ៍ គណបក្សនីមួយៗត្រូវជ្រើសរើសបេក្ខជននយោបាយសម្រាប់មុខតំណែងកំពូល ដូចជាបេក្ខជននាយករដ្ឋមន្ត្រី។ គណបក្សប្រជាជន ក៏មានគោលនយោបាយផ្ទៃក្នុងរបស់ខ្លួនក្នុងការជ្រើសរើសបេក្ខជននាយករដ្ឋមន្ត្រី។ ប៉ុន្តែទោះជា យ៉ាងណា កត្តាសម្រេចចុងក្រោយអាស្រ័យលើការជ្រើសរើសរបស់ប្រជាពលរដ្ឋខ្មែរ នៅក្នុងការបោះឆ្នោតខាងមុខ។ នេះបើតាម លោក ប៉ា ច័ន្ទរឿន។
លោកបណ្ឌិត ឡៅ ម៉ុងហៃ អ្នកវិភាគនយោបាយមួយរូប ក៏បានសរសេរនៅលើហ្វេសប៊ុករបស់លោកដែរថា របបប្រជាធិបតេយ្យសេរីពហុបក្សកំណត់ក្នុងរដ្ឋធម្មនុញ្ញ អាចក្លាយឲ្យទៅជារបបយោធាតត្រកូលជាក់ស្តែង ដូចរបបយោធាតត្រកូលហ្សូហ្គន់(Shogunate) ដែលគ្រប់គ្រងដឹកនាំប្រទេសជប៉ុននៅសតវត្សទី១៧ដល់ទី១៩។ លោកថា វប្បធម៌នយោបាយបច្ចុប្បន្ន ស្ថាប័នរដ្ឋ និងដំណើរការប្រព្រឹត្តទៅជាក់ស្តែងនៃស្ថាប័នទាំងនេះ អំណោយផលណាស់ ដល់ការកកើតនៃរបបយោធាតត្រកូល និងដំណើរប្រព្រឹត្តទៅនៃរបបនយោបាយបែបនេះ។
ទោះយ៉ាងណា ការប្រកាសរបស់លោកនាយករដ្ឋមន្ត្រីពីបេក្ខភាពលោក ហ៊ុន ម៉ាណែត ដែលធ្លាប់ទទួលបានការសិក្សានៅប្រទេសប្រជាធិបតេយ្យ ត្រូវអ្នកវិភាគភាគច្រើនមើលឃើញថា គុណសម្បត្តិ និងលក្ខណៈសម្បត្តិលោក ហ៊ុន ម៉ាណែត ធៀបទៅនឹងជំនាន់ក្រោយរបស់គណបក្សកាន់អំណាចផ្សេងទៀត អាចទទួលយកបានជាទូទៅ ព្រមទាំងជឿជាក់ថា ទស្សនវិស័យ និងការដឹកនាំរបស់លោក ហ៊ុន ម៉ាណែត ទំនងជានឹងមិនចម្លងតាមឳពុករបស់លោកទាំងស្រុងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ