កម្ពុជាអញ្ជើញមន្ដ្រីជាន់ខ្ពស់នៃប្រទេសជិតខាងមកទស្សនកិច្ចបន្តគ្នា មុនខ្លួនធ្វើជាប្រធានអាស៊ាននៅឆ្នាំក្រោយ
មន្ដ្រីជាន់ខ្ពស់នៃប្រទេសចំនួនពីរក្នុងតំបន់អាស៊ាននឹងមកធ្វើទស្សនកិច្ចជាផ្លូវការនៅកម្ពុជា ចាប់ពីថ្ងៃទី២៩វិច្ឆិការហូតដល់ថ្ងៃទី១ធ្នូ តបតាមការអញ្ជើញរបស់ប្រមុខការទូតកម្ពុជា។ ទស្សនកិច្ចបន្តបន្ទាប់គ្នានៃមន្ដ្រីជាន់ខ្ពស់នៃបណ្តាប្រទេសក្នុងតំបន់អាស៊ានពេលនេះ ត្រូវបានអ្នកជំនាញផ្នែកអន្តរជាតិមើលឃើញថា ជាការស្វែងយល់ពីគ្នាបន្ថែមទៀត ដើម្បីឈានទៅរកដំណោះស្រាយលើបញ្ហាតំបន់ ជាពិសេសវិបត្តិនយោបាយនៅភូមា ខណៈដែលកម្ពុជានឹងធ្វើជាប្រធានអាស៊ាននៅឆ្នាំក្រោយ។
ចុះផ្សាយនៅថ្ងៃ៖
ស្តាប់ - ០២:៣៦
នៅក្នុងសេចក្តីប្រកាសព័ត៌មានពីរដាច់ដោយឡែកពីគ្នា ក្រសួងការបរទេសកម្ពុជាបានបញ្ជាក់ថា មន្ដ្រីការទូតជាន់ខ្ពស់នៃប្រទេសក្នុងតំបន់អាស៊ានចំនួន២ រួមមាន សាធារណរដ្ឋប្រជាធិបតេយ្យប្រជាមានិតឡាវ និងសាធារណរដ្ឋឥណ្ឌូនេស៊ី នឹងមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី២៩វិច្ឆិការហូតដល់ថ្ងៃទី១ធ្នូ។
សាធារណរដ្ឋប្រជាធិបតេយ្យប្រជាមានិតឡាវ ដោយមានវត្តមានរបស់នាយករដ្ឋមន្ត្រី ផនខាំ វីផាវ៉ាន់ នឹងមកបំពេញទស្សនកិច្ចនៅកម្ពុជាចំនួនពីរថ្ងៃ គឺចាប់ពីថ្ងៃទី២៩និង៣០ខែវិច្ឆិកានេះ។ បើតាមសេចក្តីប្រកាសព័ត៌មាន ប្រមុខរដ្ឋាភិបាលឡាវរូបនេះ នឹងចូលក្រាបថ្វាយបង្គំគាល់ព្រះបរមនាថ នរោត្តម សីហមុនី។ បន្ទាប់មកទៀតលោកនាយករដ្ឋមន្ត្រី ផនខាំ វីផាវ៉ាន់ នឹងមានជំនួបជាមួយថ្នាក់ដឹកនាំកំពូលកម្ពុជា ដូចជាលោកនាយករដ្ឋមន្ត្រីហ៊ុន សែន លោកសាយ ឈុំ ប្រធានព្រឹទ្ធសភា និងលោកហេង សំរិន ប្រធានរដ្ឋសភា។
ក្រសួងការបរទេសកម្ពុជាបញ្ជាក់ថា ដំណើរទស្សកិច្ចនេះធ្វើឡើងដើម្បីពង្រឹងចំណងមិត្តភាព និងភាពជាដៃគូយុទ្ធសាស្រ្តនៃប្រទេសទាំងពីរ ក្នុងក្របខណ្ឌជាអ្នកជិតខាង និងក្នុងតំបន់អាស៊ាន។
ចំណែកឯសាធារណរដ្ឋឥណ្ឌូនេស៊ីវិញ លោកស្រីរ៉េតណូ អិល ភី ម៉ារស៊ូឌី រដ្ឋមន្ត្រីការបរទេសឥណ្ឌូនេស៊ី នឹងមកបំពេញទស្សកិច្ចពីរថ្ងៃដូចគ្នា ពីថ្ងៃទី៣០ដល់ថ្ងៃទី១ខែធ្នូ។ បើតាមក្រសួងការបទេសកម្ពុជា ប្រមុខការទូតឥណ្ឌូនេស៊ីជាស្ត្រីរូបនេះ នឹងលើកយកទិដ្ឋភាពមួយចំនួនមកពិភាក្សាជាមួយលោកនាយករដ្ឋមន្ត្រីហ៊ុន សែន រួមនឹងលោកប្រាក់ សុខុន ប្រមុខការទូតកម្ពុជា ដើម្បីស្វែងរកផលប្រយោជន៍រួម ខណៈដែលកម្ពុជានឹងធ្វើជាប្រធានប្តូរវេនអាស៊ាន ឆ្នាំ២០២២។
លោកកុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃអាទិត្យទី២៨វិច្ឆិកានេះថា ដំណើរទស្សកិច្ចផ្លូវការនៃប្រទេសទាំងពីរនេះ ធ្វើឡើងដើម្បីពង្រឹងនិងពង្រីកទំនាក់ទំនង ក៏ដូចជាកិច្ចសហប្រតិបត្តិការ ក្នុងក្របខណ្ឌទ្វេភាគីផង និងអាស៊ានផង។
ក៏ប៉ុន្តែយ៉ាងណា សម្រាប់អ្នកជំនាញផ្នែកអន្តរជាតិ យល់ថា លើសពីកិច្ចសហប្រតិបត្តិការរវាងគ្នា ដំណើរទស្សកិច្ចនៃថ្នាក់ដឹកនាំក្នុងតំបន់អាស៊ាននៅកម្ពុជានាពេលនេះ ធ្វើឡើងក្នុងគោលបំណងស្វែងយល់គ្នាបន្ថែមទៀត ហើយជារឿងមួយដែលសំខាន់សម្រាប់កម្ពុជា ក្នុងនាមជាប្រធានអាស៊ាននៅឆ្នាំក្រោយ។ លោកបណ្ឌិត ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី យល់ឃើញថា ការស្វែងយល់គ្នាទៅវិញទៅមកពេលនេះ នឹងអាចឈានទៅរកការសម្រេចរួមក្នុងការដោះស្រាយបញ្ហាប្រកួតប្រជែងអំណាចក្នុងតំបន់ បញ្ហាជាប់គាំងនៃវិបត្តិនយោបាយភូមា និងការស្តារឡើងវិញនូវសេដ្ឋកិច្ចអាស៊ាន ក្រោយវិបត្តិកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ