ASEM 13៖ អ្នកទទួលថ្នាំបង្ការកូវីដ នៅតែអតុល្យភាព រវាងប្រទេសធំនិងប្រទេសក្រីក្រ
កិច្ចប្រជុំកំពូលអាស៊ី-អឺរ៉ុប លើកទី១៣ ដែល កម្ពុជាធ្វើជាម្ចាស់ផ្ទះ នៅថ្ងៃទី២៥-២៦ ខែវិច្ឆិកា បានចប់ហើយនៅយប់ម្សិលមិញ។ នៅថ្ងៃចុងក្រោយនៃអង្គប្រជុំឆ្នាំនេះ គឺមានសេចក្តីថ្លែងការណ៍រួម ចំនួនបី។ ទី១ សេចក្តីថ្លែងការណ៍របស់ប្រធានអង្គប្រជុំ។ ទី២ សេចក្តីថ្លែងការណ៍ក្រុងភ្នំពេញ ស្តីពីការស្តារឡើងវិញ ទាំងសង្គមនិងសេដ្ឋកិច្ច ក្រោយជំងឺកូវីដ ហើយទី៣ គឺស្តីពីសកម្មភាពអនាគតរបស់អង្គវេទិកាប្រជុំកំពូលអាស៊ី-អឺរ៉ុប។
ចុះផ្សាយនៅថ្ងៃ៖
ស្តាប់ - ០២:២៣
ក្នុងប្រជុំកំពូលអាស៊ី-អឺរ៉ុប ប្រធានក្រុមប្រឹក្សាអឺរ៉ុប លោក សាល មីស៊ែល (Charles Michel) បានថ្លែង សរសើរកម្ពុជា និងបញ្ជាក់ពីភាពត្រូវការគ្នាទៅវិញទៅមក រវាងអាស៊ីនិងអឺរ៉ុប ដើម្បីចូលរួមដោះស្រាយនិងស្តារសេដ្ឋកិច្ចពាណិជ្ជកម្ម ក្រោយរងគ្រោះពីវិបត្តិកូវីដ១៩។ ការចាក់វ៉ាក់សាំង ប្រឆាំងនឹងកូវីដ ត្រូវថ្នាក់ដឹកនាំ ASEM យល់ថា ជាមធ្យោបាយដ៏សំខាន់ ដើម្បីចាកចេញពីវិបត្តិ។ ប៉ុន្តែ បើទោះបីជា ប្រទេសជាច្រើន នៅក្នុងទាំងទ្វីបពីរ អាស៊ីអឺរ៉ុប កំពុងតែជំរុញការផ្តល់ថ្នាំបង្ការកូវីដក្តី តែ អតុល្យភាពភាព ក្នុងចំណោមពលរដ្ឋទទួលថ្នាំបង្ការរួច គឺមាននៅគម្លាតគ្នាឆ្ងាយ រវាងប្រទេសធំៗ មានៗ និងនៅតាមប្រទេសក្រីក្រ។
ដោយឡែក នៅក្នុងកិច្ចប្រជុំចង្អៀត ថ្ងៃទី២ មានប្រធាបទក្តៅៗ គួរឲ្យទាក់ចិត្ត គឺថ្នាក់ដឹកនាំ ASEM មួយចំនួនរបស់ ASEM លើកឡើង ពីសំណុំរឿងសមុទ្រចិនខាងត្បូង និងរឿងភូមា ដែលជៀសមិននិយាយមិនបាន។ លោក លុយ ដាវីត រដ្ឋលេខាធិការក្រសួងការបរទេសខ្មែរ និងជាប្រធានលេខាធិការដ្ឋានជាតិរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ មានប្រសាសន៍ថា សំណុំរឿងនុយក្លេអ៊ែរកូរ៉េខាងជើង គឺថ្នាក់ដឹកនាំASEMនៅតែជំរុញចង់ឲ្យភាគីកូរ៉េខាងជើងចូលតុចរចា។ ចំណែកវិបត្តិអាហ្វហ្គានីស្ថាន, អាស៊ី-អឺរ៉ុប កោតសរសើរស្មារតីជួយយកចិត្តទុកដាក់ដល់ជនភៀសខ្លួន។
គួរជ្រាបដែរ ក្នុងអង្គប្រជុំ ប្រធានក្រុមប្រឹក្សាអឺរ៉ុប លោក សាល មីស៊ែល បានរំលឹកប្រាប់វេទិកាកំពូលនេះ ពីជំហរសហភាពអឺរ៉ុប គឺនៅតែប្រកាន់យ៉ាងមុតមាំពីការគោរពគោលការណ៍សិទ្ធិមនុស្ស លទ្ធិប្រជាធិតេយ្យ និងសេរីភាពជាមូលដ្ឋាន។ ការរំលឹកនេះ ពុំមែនជារឿងចៃដន្យនោះទេ ខណៈដែលប្រជាជាតិច្រើននៅតំបន់អាស៊ីនិងអឺរ៉ុប កំពុងតែប្រឈមរឿងរំលោបបំពានសិទ្ធិពលរដ្ឋ ពិសេសក្នុងដំណាក់កាលប្រឆាំងនឹងព័ត៌មានក្លែងក្លាយ និងប្រយុទ្ធប្រឆាំងការរាតត្បាតមេរោគកូវីដ។ ក៏ប៉ុន្តែ លោក លុយ ដាវីដ មន្ត្រីជាន់ខ្ពស់ខ្មែរ ដែលតាមដានដិតដល់ក្នុងអង្គប្រជុំ បានបញ្ជាក់ថា ប្រសាសន៍របស់ ប្រធានក្រុមប្រឹក្សាអឺរ៉ុប គឺស្តីពីគោលការណ៍សិទ្ធមនុស្ស និងសេរីភាពទូទៅ ដែលជាសសរស្តម្ភរបស់សហភាពអឺរ៉ុបតែប៉ុណ្ណោះ ហើយមិនសំដៅប្រទេសណាមួយ ក្នុងអង្គប្រជុំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ