ករណីផ្ទះបណ្ដែតទឹក៖ អ្នករាយការណ៍ពិសេសរបស់UN ស្នើឲ្យកម្ពុជាបង្ហាញពីមូលដ្ឋានគតិយុត្តិ
អ្នកជំនាញសិទ្ធិមនុស្សរបស់អង្គការសហប្រជាជាតិចំនួនប្រាំរូប ស្នើឲ្យរដ្ឋាភិបាលកម្ពុជា បង្ហាញអំពីមូលដ្ឋានគតិយុត្តិសម្រាប់ការរុះរើផ្ទះបណ្តែតទឹករបស់ជនជាតិខ្មែរ និងជនជាតិវៀតណាមប្រមាណ៧០០គ្រួសារ នាពេលកន្លងទៅនេះ។ ការបញ្ចេញលិខិតបែបនេះ ជាសាធារណៈរបស់អ្នករាយការណ៏ពិសេសសិទ្ធិមនុស្សប្រចាំកម្ពុជា គឺ ក្រោយពីអាជ្ញាធរកម្ពុជា មិនបានឆ្លើយតបនឹងសំណើនេះអស់រយៈពេល៦០ថ្ងៃមកហើយ។ ប៉ុន្តែសម្រាប់អ្នកនាំពាក្យគណៈកម្មការសិទ្ធិមនុស្សកម្ពុជា អះអាងថា កម្ពុជាគ្មានកាតព្វកិច្ចឆ្លើយតបនឹងសំណើនេះឡើយ។
ចុះផ្សាយនៅថ្ងៃ៖
អ្នកជំនាញរបស់អង្គការសហប្រជាជាតិបានសាកសួរ ជាពិសេសអំពីមូលដ្ឋានគតិយុត្តិនៃការបញ្ជាឲ្យរុះរើផ្ទះបណ្តែតទឹករបស់ជនជាតិខ្មែរ និងជនជាតិវៀតណាមប្រមាណ៧០០គ្រួសារ ដែលត្រូវបានរុញច្រានឲ្យចាកចេញពីផ្ទៃទឹកនៅទីក្រុងភ្នំពេញ និងខេត្តកណ្តាល។ អ្នកជំនាញសិទ្ធិមនុស្សរបស់អង្គការសហប្រជាជាតិចំនួនប្រាំរូបក៏បានផ្តោតផងដែរ អំពីការគាំទ្រ និងជំនួយអ្វីខ្លះដែលត្រូវបានផ្តល់ជូនដល់គ្រួសារ ដែលភាគច្រើនត្រូវបានទុកចោលដោយគ្មានផ្ទះសម្បែង បន្ទាប់ពីមានការវាយកម្ទេច និងរុះរើ។ នេះបើតាមសេចក្តីប្រកាសរបស់អ្នករាយការណ៍ពិសេសសិទ្ធិមនុស្សប្រចាំនៅកម្ពុជា។
កាលពី ៦០ថ្ងៃកន្លងទៅ អ្នកជំនាញអង្គការសហប្រជាជាតិបានស្នើរដល់រដ្ឋាភិបាលកម្ពុជា បង្ហាញមូលដ្ឋានគតិយុត្តិនៃការបញ្ជាឲ្យរុះរើផ្ទះបណ្តែត នៅភ្នំពេញ និងខេត្តកណ្តាល តាមរយៈលិខិតមួយ ដែលត្រូវបានផ្សព្វផ្សាយជាសាធារណៈនៅថ្ងៃទី២៦វិច្ឆិកា។ គឺជាការផ្សព្វផ្សាយក្រោយពីគ្មានការឆ្លើយតបណាមួយពីអាជ្ញាធរកម្ពុជា។
ប៉ុន្តែលោក កត្តា អ៊ន អ្នកនាំពាក្យគណៈកម្មាធិការសិទ្ធិមនុស្សកម្ពុជា បានអះអាងថា រដ្ឋាភិបាលកម្ពុជាគ្មានកាតព្វកិច្ចឆ្លើយតបនឹងសំណើរបស់ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិទាំងនោះឡើយ។ ទោះជាយ៉ាងណា លោកពន្យល់ថា វិធានការរបស់អាជ្ញាធរកម្ពុជា ក្នុងការរុះរើផ្ទះបណ្តែតទឹករបស់ជនអន្តោប្រវេសន៍ខុសច្បាប់ទាំងនោះ គឺជារឿងសមស្រប ពីព្រោះតែពួកគេរស់នៅធ្វើខូចបរិស្ថាន និងទឹកប្រើប្រាស់។
សម្រាប់ អ្នកជំនាញរបស់អង្គការសហប្រជាជាតិ បានសំដែងការព្រួយបារម្ភអំពីកង្វះ នៃការពិគ្រោះយោបល់ជាមួយប្រជាពលរដ្ឋ ការជូនដំណឹងសមស្រប ការផ្តល់នូវជម្រើសនៃការស្នាក់នៅ ឬដំណោះស្រាយដែលមានប្រសិទ្ធភាព ដែលសំដៅទៅលើ កាតព្វកិច្ចសិទ្ធិមនុស្ស ដើម្បីការពារ ជនជាតិដើមភាគតិច និងសិទ្ធិរបស់មនុស្សគ្រប់រូប ក្នុងការទទួលបានលំនៅឋានសមរម្យ អាហារគ្រប់គ្រាន់ និងសុភាព។
បើតាម លោក កត្តា អ៊ន មានប្រជាជនខ្លះក្នុងចំណោមនោះ តែងតែវិលមករស់នៅលើទឹកវិញ បើទោះបីជាអាជ្ញាធរបានផ្តល់ជាសំណងឲ្យរស់នៅលើដីគោកក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ