រយៈពេល ២ខែកន្លះ មានរថយន្តអត់ពន្ធចូលទៅបង់ពន្ធចំនួន១៦៤០គ្រឿង មានចំណូលជាង១៧លានដុល្លារ
រយៈពេលប្រមាណ៦០ថ្ងៃ នៃថ្ងៃធ្វើការ អគ្គនាយកដ្ឋានគយ និងរដ្ឋករ បានទទួលម្ចាស់រថយន្តអត់ពន្ធ ទាំងចង្កូតស្តាំ និងចង្កូតឆ្វេង ដែលជ្រកក្រោមផ្លាកលេខផ្សេងៗចំនួន ១ ៦៤០គ្រឿង ចូលទៅបង់ពន្ធ និងប្រកាសបង់ពន្ធអាករ។ ការនាំយករថយន្តគ្មានពន្ធ ទៅបង់ពន្ធពេលនេះ ធ្វើឡើងក្រោយពីគយ និងរដ្ឋករ បានផ្តល់ការអនុគ្រោះពន្ធចំនួន១០% រហូតដល់ថ្ងៃទី៣១ ខែធ្នូ ឆ្នាំ២០២១នេះ និងនៅសល់ពេលប្រមាណជា៧ខែទៀតប៉ុណ្ណោះ ដែលអង្គភាពគយ និងរដ្ឋករ នឹងចាត់វិធានការបង្ក្រាបយ៉ាងម៉ឺងម៉ាត់ ទៅលើរថយន្តដែលគ្មានពន្ធ។
ចុះផ្សាយនៅថ្ងៃ៖
ស្តាប់ - ០២:៤២
គិតចាប់តាំពីរដ្ឋាភិបាលបើកភ្លើងខៀវកាលពីខែកញ្ញា ឲ្យអង្គភាពគយ និងរដ្ឋករចាត់វិធានការប្រមូលរថយន្តគ្មានពន្ធ ដែលជ្រកក្រោមផ្លាកលេខផ្សេងៗ ដូចជាផ្លាកលេខកងទ័ព(ខម) ផ្លាកលេខនគរបាល(នប) ឬផ្លាកលេខស្ថាប័ន្ធរដ្ឋផ្សេងៗទៀត ឲ្យមកបង់ពន្ធ រហូតមកទល់ថ្ងៃទី២៥ ខែវិច្ឆិកាម្សិលមិញនេះ មានរថយន្តចំនួន១ ៦៤០គ្រឿងហើយ បានចូលមកបង់ពន្ធ និងប្រកាសបង់ពន្ធអាករ។
ក្នុងចំណោមរថយន្តដែលម្ចាស់នាំយកមកបង់ពន្ធ និងប្រកាសតំកល់ប្រាក់ពន្ធទាំង១ ៦៤០គ្រឿងនេះ មានរថយន្តចង្កូតឆ្វេងចំនួន ៨០៨គ្រឿង និងរថយន្តចង្កូតស្តាំចំនួន៨៣២គ្រឿង ក្នុងនោះ៨៥គ្រឿងបានកែចង្កូតពីស្តាំមកឆ្វេងរួចហើយ។ ដោយឡែក ប្រាក់ពន្ធ និងអាករ ដែលប្រមូលបានពីការបង់ពន្ធនៃរថយន្តទាំងចង្កូតឆ្វេង និងចង្កូតស្តាំនេះ មានចំនួនសរុប ១៧,៣លានដុល្លារ។
លោក គុណ ញឹម រដ្ឋមន្ត្រីប្រតិភូរដ្ឋាភិបាលទទួលបន្ទុកអគ្គនាយកនៃអគ្គនាយដ្ឋានគយ និងរដ្ឋករ បានថ្លែងនៅក្នុងសន្និសីទសារព័ត៌មាននាព្រឹកថ្ងៃសុក្រនេះថា និន្នាការនៃការចូលទៅបង់ពន្ធរបស់ម្ចាស់រថយន្តអត់ពន្ធមានវឌ្ឍនភាពល្អប្រសើរ ដែលនេះគឺជាលទ្ធផលដ៏ប្រសើរមួយ បើគិតជាមធ្យមមានរថយន្តជិត៣០គ្រឿង ត្រូវម្ចាស់នាំយកមកបង់ពន្ធក្នុងមួយថ្ងៃ។ លោកកត់សម្គាល់ថាមួយរយៈចុងក្រោយនេះ ចំនួនរថយន្តចង្កូតស្តាំ ដែលម្ចាស់ចូលទៅតំកល់ប្រាក់ពន្ធមានការកើនឡើង។
តាមការឲ្យដឹងពីអង្គភាពគយ និងរដ្ឋករ មានរថយន្តអត់ពន្ធទាំងចង្កូតស្តាំ និងចង្កូតឆ្វេងដែលជ្រកក្រោមផ្លាកលេខផ្សេងៗ មានរហូតដល់ទៅជិត១ម៉ឺនគ្រឿងឯណោះ ខណៈឱសានវាទនឹងផុតកំណត់នៅចុងខែមិថុនាឆ្នាំ២០២២។ ទោះយ៉ាងណា លោក គុណ ញឹម មានសុទិដ្ឋិនិយមថាម្ចាស់រថយន្តខុសច្បាប់ នឹងនាំយករថយន្តរបស់ពួកគេទៅបង់ពន្ធ បំពេញភាពស្របច្បាប់បានច្រើនគ្នា ដោយសារពេលវេលានៅច្រើនបន្ថែមទៀត។
សូមរំលឹកថា រថយន្តដែលគ្មានពន្ធ ត្រូវបានស្ថាប័ន្ធគយ និងរដ្ឋករ អនុគ្រោះពន្ធឲ្យ១០% ដែលនឹងបញ្ជប់នៅថ្ងៃទី៣១ ខែធ្នូឆ្នាំ២០២១នេះ។ ចាប់ពីថ្ងៃទី១ ខែមករា ឆ្នាំ២០២២ទៅ រថយន្តដែលគ្មានពន្ធ នឹងត្រូវបង់ពន្ធពេញ។ លើសពីនេះ រថយន្តគ្មានពន្ធទាំងអស់ នឹងរងនូវការបង្ក្រាប និងពិន័យយ៉ាងតឹងតែង ដោយមិនមានការលើកលែង ចាប់ពីចុងខែមិថុនា ឆ្នាំ២០២២ទៅ ប្រសិនបើម្ចាស់មិននាំយកទៅបង់ពន្ធឲ្យទាន់កាលកំណត់ចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ