លោក ហ៊ុន សែន ជម្រុញឲ្យបន្តពង្រឹងទំនាក់ទំនងអាស៊ាន-ចិន និងផ្តល់តម្លៃខ្ពស់នៃការចរចាក្រមប្រតិបត្តិសមុទ្រចិនខាងត្បូង
លោកនាយករដ្ឋមន្ត្រី ហ៊ុន សែន ឲ្យដឹងថាបញ្ហាការឆ្លើយតបនឹងជំងឺកូវីដ-១៩ ការបន្តពង្រឹងការតភា្ជប់ក្នុងតំបន់តាមសេចក្តីថ្លែងការណ៍រួមអាស៊ាន-ចិន ការលើកកម្ពស់ដៃគូយុទ្ធសាស្ត្រគ្រប់ជ្រុងជ្រោយ បញ្ហាប្រព័ន្ធពហុភាគីនិយម ដែលរួមបញ្ចូលបញ្ហាសមុទ្រចិនខាងត្បូងដែរនោះ សុទ្ធសឹងជាបញ្ហាដែលត្រូវពង្រឹងបន្ថែមនៃទំនាក់ទំនងអាស៊ាន-ចិន។ ការលើកឡើងរបស់លោក ហ៊ុន សែន ទាំងអស់នេះគឺធ្វើឡើងតាមរយៈ កិច្ចប្រជុំកំពូលពិសេសអាស៊ាន-ចិនតាមអនឡាញនាព្រឹកថ្ងៃចន្ទនេះដើម្បីអបអរខួប៣០ឆ្នាំ នៃការបង្កើតទំនាក់ទំនងដៃគូសន្ទនារវាងអាស៊ាន និងចិន។
ចុះផ្សាយនៅថ្ងៃ៖
ស្តាប់ - ០២:១២
ក្រៅពីការលើកទឹកចិត្តឲ្យចិនបន្តផ្តល់ជំនួយដល់អាស៊ាន ជាពិសេសផ្តល់ការគាំទ្រចំពោះ ក្របខណ្ឌស្តារឡើងវិញគ្រប់ជ្រុងជ្រោយរបស់អាស៊ាន និងគំនិតផ្តួចផ្តើមនានាក្នុងការឆ្លើយតបជំងឺកូវីដ-១៩ លោកនាយករដ្ឋមន្ត្រី ហ៊ុន សែន បានលើកទឹកចិត្តឲ្យអាស៊ាន-ចិន ពង្រឹងការតភា្ជប់ក្នុងតំបន់ស្របតាមស្មារតីនៃសេចក្តីថ្លែងការណ៍រួមអាស៊ាន-ចិន ស្តីពីការរួមផ្សុំផែនការមេតភ្ជាប់អាស៊ានឆ្នាំ ២០២៥ និងគំនិតផ្តួចផ្តើមខ្សែរក្រវាត់ និងផ្លូវ(BRI) ដើម្បីបង្កើនប្រិសិទ្ធភាពលំហូរទំនិញ សេវាកម្ម និងចលនាប្រជាជន។
សុន្ទរកថាខ្លីរបស់លោក ហ៊ុន សែន ទៅកាន់មេដឹកនាំអាស៊ាន-ចិន ឲ្យដឹងទៀតថា ប្រទេសកម្ពុជាគាំទ្រចំពោះការលើកកម្ពស់ទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយ និងការអនុម័តសេចក្តីថ្លែងការណ៍រួមស្តីពីកិច្ចប្រជុំកំពូលអាស៊ាន-ចិន ដើម្បីរំលឹកខួបអនុស្សាវរីយ៍លើទី៣០ នៃទំនាក់ទំនងដៃគូសន្ទនាអាស៊ាន-ចិន។
លោកនាយករដ្ឋមន្ត្រី បន្តថា កម្ពុជាក៏ស្វាគមន៍ផងដែរនូវគំនិតផ្តួចផ្តើមការអភិវឌ្ឍសកលរបស់លោកប្រធានាធិបតីចិន ស៊ី ជីនពីង ដែលនឹងក្លាយជាកម្លាំងគាំទ្រដ៏សំខាន់សម្រាប់បណ្តាប្រទេសកំពុងអភិវឌ្ឍន៍ នៅក្នុងការស្តារសង្គម-សេដ្ឋកិច្ចឡើងវិញ ក្រោយវិបត្តិជំងឺកូវីដ-១៩ និងក្នុងការលើកស្ទួយសិទ្ធិមនុស្ស តាមរយៈការអភិវឌ្ឍប្រកបដោយចីរភាព និងការកាត់បន្ថយភាពក្រីក្រ។
ជាមួយគ្នានេះ អាស៊ានគប្បីបន្តប្រកាន់យកប្រព័ន្ធពហុនិយម ដើម្បីជម្រុញកិច្ចសហប្រតិបត្តិការលើគ្រប់វិស័យ និងដើម្បីដោះស្រាយនូវរាល់បញ្ហាប្រឈមរួម ក្នុងតំបន់ និងសកលលោកដោយសន្តិវិធី។ នេះបើតាមលោក ហ៊ុន សែន។ លោកបន្តថា ប្រទេសកម្ពុជាក៏សូមគាំទ្រគំនិតផ្តួចផ្តើមប្រារព្ធខួប២០ឆ្នាំ នៃការចុះហត្ថលេខាលើសេចក្តីថ្លែងការណ៍ស្តីពីការប្រតិបត្តិរបស់បណ្តាភាគី នៅសមុទ្រចិនខាងត្បូង ក្នុងឆ្នាំ ២០២២ ហើយប្រធានអាស៊ានឆ្នាំ២០២២នេះ ក៏បានវាយតម្លៃខ្ពស់លើវឌ្ឍនភាពនៃការចរចាឆ្ពោះទៅរកការបញ្ចប់ក្រមប្រតិបត្តិនៅសមុទ្រចិនខាងត្បូង ដែលប្រកបដោយខ្លឹមសារពេញលេញ និងប្រសិទ្ធភាពខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ