រដ្ឋនិងក្រុមហ៊ុនឯកជន សម្រេចបញ្ចុះតម្លៃចំពោះការប្តូរចង្កូតរថយន្តពីស្តាំមកឆ្វេង របស់ម្ចាស់រថយន្តស្លាកលេខ(ខ.ម)
កងទ័ពជើងគោក និងវិស័យឯកជនកាលពីពេលថ្មីៗនេះ បានសហការគ្នាពិនិត្យលទ្ធភាពបញ្ចុះតម្លៃទៅលើការកែចង្កូតរថយន្តពីសាំ្តមកឆ្វេង ចំពោះម្ចាស់រថយន្តដែលកំពុងប្រើប្រាស់ផ្លាកលេខកងយោធពលខេមរភូមិន្ទ។ ការសហការបញ្ចុះតម្លៃនេះ ធ្វើឡើងក្រោយរដ្ឋាភិបាលប្រកាសរឹតបន្តឹងការបង់ពន្ធ អាករនាំចូល និងឱ្យស្របទៅតាមច្បាប់ក្នុងការធ្វើចរាចរណ៍ក្នុងប្រទេសកម្ពុជា ដើម្បីធានាបាននូវការប្រើប្រាស់រថយន្តនៅលើដងផ្លូវប្រកបដោយសុវត្ថិភាព។
ចុះផ្សាយនៅថ្ងៃ៖
ស្តាប់ - ០២:៤២
លោកឧកញ៉ា តែ តាំងប៉ះ អគ្គនាយកក្រុមហ៊ុន S.T.P International Cambodia Public ដែលប្រតិបត្តិការទៅលើការជួសជុលរថយន្ត និងកែឆ្នៃចង្កូតរថយន្តបានបញ្ជាក់ប្រាប់វិទ្យុបារាំងអន្តរជាតិនាព្រឹកថ្ងៃទី២២ វិច្ឆិកានេះថា ដើម្បីជួយសម្រួលដល់បន្ទុកយោធិនមួយចំនួនដែលកំពុងប្រើប្រាស់រថយន្តចង្កូតស្តាំ ក្រោមផ្លាកលេខកងយោធពលខេមរភូមិន្ទ ដែលត្រូវធ្វើការកែតម្រូវមកជាចង្កូតឆ្វេង និងបង់ពន្ធ អាករនាំចូលឱ្យស្របតាមបទបញ្ជារបស់រដ្ឋាភិបាល លោកឧកញ៉ា សម្រេចបញ្ចុះតម្លៃដល់ការប្តូរចង្កូតរថយន្តពីស្តាំមកឆ្វេងចំពោះស្លាកលេខរថយន្ត(ខ.ម)នៅទូទាំងប្រទេស ជាពិសេសយោធិនដែលមានជីវភាពក្សត់ខ្សោយ។
ការសម្រេចបញ្ចុះតម្លៃបែបនេះ ក្រោយរដ្ឋាភិបាលកាលពីថ្ងៃទី០៨ តុលាកន្លងទៅបានប្រកាស ប្តេជ្ញាបញ្ចប់បញ្ហារថយន្តមិនបង់ពន្ធ អាករនាំចូល និងរថយន្តចង្កូតស្តាំខុសច្បាប់ ដែលជាបញ្ហាច្រំដែលចាប់ពីថ្ងៃទី០១ កក្កដា ឆ្នាំ២០២១។
បើតាមលោកឧកញ៉ា តែ តាំងប៉ះ ការបញ្ចុះតម្លៃពិសេសលើថ្លៃប្តូរចង្កូតរថយន្តសម្រាប់យោធិននៃកងយោធពលខេមរភូមិន្ទនឹងអនុវត្តទៅតាមប្រភេទ និងឆ្នាំផលិត ដោយធានាលើគុណភាពសម្ភារៈ លក្ខណៈបច្ចេកទេស និងស្តង់ដារសុវត្ថិភាពរថយន្ត។ ការអនុវត្តបែបនេះ គឺដើម្បីធានាបាននូវសុវត្ថិភាពលើដងផ្លូវ និងស្របតាមច្បាប់ចរាចរណ៍ផ្លូវគោករបស់កម្ពុជា ក៏ដូចជាចូលរួមដោះស្រាយជីវភាពរបស់យោធិនដែលមានបញ្ហាជីវភាពជាដើម។
ជាការបញ្ជាក់បន្ថែមពីអគ្គនាយកក្រុមហ៊ុន S.T.P ក្រៅតែពី រថយន្តចង្កូតស្តាំរបស់យោធិននៃកងយោធពលខេមរភូមិន្ទ លោកឧកញ៉ា ក៏នឹងធ្វើការបញ្ចុះតម្លៃទៅលើរថយន្តរបស់កងរាជអាវុធហត្ថ ប៉ូលីស និងពលរដ្ឋផងដែរ។ ប៉ុន្តែ សម្រាប់តម្លៃបញ្ចុះទៅលើរថយន្តចង្កូតស្តាំក្រៅតែពីផ្លាកលេខ(ខ.ម) គឺត្រូវផ្អែកទៅលើលទ្ធភាពជាក់ស្តែងដូចជាតម្លៃបញ្ចុះជាដើម ខណៈគ្រឿងបន្លាស់ និងបច្ចេកទេសសម្រាប់ផ្លាស់ប្តូរទាំងអស់ត្រូវនាំចូលពីបរទេស ដូច្នេះតម្លៃអាចនឹងខុសគ្នាបន្តិចបន្តូច។
សូមរំលឹកថារថយន្តអត់ពន្ធ ដែលជ្រកក្រោមផ្លាកលេខផ្សេងៗទាំងចង្កូតឆ្វេង និងចង្កូតស្តាំត្រូវបានស្ថាប័នគយ និងរដ្ឋករប៉ាន់ប្រមាណថា មានរហូតជិត១ម៉ឺនគ្រឿង ដែលភាគច្រើនជារថយន្តឯកជនពាក់ផ្លាកលេខកងទ័ព ឬ(ខ.ម)។ កាលពីថ្ងៃទី១០ ខែកញ្ញា ស្ថាប័នគយ និងរដ្ឋករ បានចាប់ផ្តើមយុទ្ធនាការឲ្យម្ចាស់រថយន្តគ្មានពន្ធ ជ្រកក្រោមផ្លាកលេខផ្សេងៗ ចូលទៅបង់ពន្ធ ដោយមានការអនុគ្រោះពន្ធ១០% រហូតដល់ចុងខែធ្នូខាងមុខនេះ ខណៈ យុទ្ធនាការនេះនឹងមានសុពលភាពដល់ថ្ងៃទី៣០ ខែមិថុនា ឆ្នាំ២០២២។
ជាការបញ្ជាក់បន្ថែម ស្ថាប័នគយនិងរដ្ឋករ នឹងអនុវត្តការបង្ក្រាបយ៉ាងសកម្ម និងម៉ឺងម៉ាត់ ចំពោះរថយន្តគ្មានពន្ធ ហើយមិនបានចូលទៅបង់ពន្ធ ដោយមិនមានការលើកលែង ឬពន្យាពេល រួមទាំងការពិន័យផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ