រយៈពេល១១ខែ៖ ខេមបូចារកឃើញករណីយាយីអ្នកកាសែតមានចំនួន៤០ករណី
សម្ព័ន្ធអ្នកសារព័ត៌មានកម្ពុជា ឬហៅថា ខេមបូចា បានរកឃើញថានៅរយៈពេល១១ខែនៅឆ្នាំ២០២១នេះ មានករណីយាយីអ្នកកាសែតចំនួន៤០ករណី បានកើតមានក្នុងប្រទេសកម្ពុជា។ ចំនួននេះមានការកើនឡើង៥ករណី បើធៀបនឹងទៅរបាយការណ៍កាលពីឆ្នាំ២០២០របស់សម្ព័ន្ធអ្នកសារព័ត៌មានកម្ពុជា។
ចុះផ្សាយនៅថ្ងៃ៖
ស្តាប់ - ០១:៥២
គឺនៅក្នុងសិក្ខាសាលាស្តីពី «ការអនុវត្តវិជ្ជាជីវៈនិងសេរីភាពសារព័ត៌មានក្នុងក្របខ័ណ្ឌច្បាប់នៃព្រះរាជាណាចក្រកម្ពុជា» ដែលរៀបចំឡើងដោយក្រសួងព័ត៌មាននៅថ្ងៃអង្គារនេះ លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា បានអះអាងថា ក្នុងចំណោម៤០ករណីនោះ មានអ្នកកាសែតចំនួន៨៤នាក់បានរងការយាយី ដោយគិតពីខែមករាដល់ខែវិច្ឆិកាឆ្នាំ២០២១នេះ។
ករណីយាយីអ្នកកាសែតទាំង៨៤នាក់នោះ មានជាអាទិ៍ ករណីចាត់វិធានការផ្លូវច្បាប់៧ករណីកើតមានលើអ្នកកាសែតចំនួន៨នាក់ ករណីអំពើហិង្សា៥ករណីកើតមានលើអ្នកកាសែតចំនួន២០នាក់ ករណីគំរាមកំហែង១៣ករណីកើតមានលើអ្នកកាសែតចំនួន១៧នាក់ ករណីបង្ខាំងទុក២ករណីកើតមានលើអ្នកកាសែតចំនួន៥នាក់ ករណីជាប់ឃុំឃាំង១២ករណីកើតមានលើអ្នកកាសែតចំនួន៣៣នាក់ និងករណីបៀតបៀនផ្លូវភេទមាន១ករណី។ ករណីបៀតបៀនផ្លូវភេទ ដែលលោកណុប វី កត់សម្គាល់ថាជារឿងមួយថ្មីដែលពុំធ្លាប់កើតមាន។
យ៉ាងណាមិញតួលេខដែលរកឃើញនេះ គឺមានការកើនឡើងចំនួន៥ករណី បើធៀបទៅនឹងឆ្នាំ២០២០កន្លងទៅ។ ឆ្នាំ២០២០ដែលមានករណីយាយីអ្នកកាសែតចំនួន៣៥ករណី ឬចំនួន៨៤នាក់។ ជាការកត់សម្គាល់ ការកើនឡើងករណីយាយីអ្នកកាសែតនេះកើតមានស្របពេលដែលអាជ្ញាធរអនុវត្តវិធានការតឹងរឹងនៅអំឡុងពេលទប់ស្កាត់ការរាលដាលជំងឺកូវី១៩ ដែលមានការរឹតត្បិតផ្នែកសេរីភាព ខណៈដែលស្ថាប័នសារព័ត៌មានយ៉ាងហោចណាស់៧ត្រូវបានដកហូតអាជ្ញាប័ណ្ណ។
បើតាមលោកណុប វី ភាគីពាក់ព័ន្ធទាំងអស់គួរតែពង្រីកការយល់ដឹងពីការអនុវត្តវិជ្ជាជីវៈរបស់អ្នកសារព័ត៌មាននិងអាជ្ញាធរ ដើម្បីធ្វើយ៉ាងណាកាត់បន្ថយហានិភ័យណាមួយដែលអាចកើតមានតាមផ្លូវច្បាប់។ ហើយសម្រាប់នាយកប្រតិបត្តិសម្ព័ន្ធអ្នកសារព័ត៌មានកម្ពុជារូបនេះ អាជ្ញាធរគួរតែបញ្ឈប់ការប្រើប្រាស់បទល្មើសញុះញង់នៃក្រមព្រហ្មទណ្ឌ ដើម្បីដាក់បន្ទុកលើអ្នកសារព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ