នាយកAVI ៖ ការបិទព្រំដែនទាំងកម្ពុជា និងសិង្ហបុរី លែងមានប្រសិទ្ធភាព ហើយងាកមកគ្រប់គ្រងសហគមន៍ក្នុងស្រុកវិញ
កម្ពុជាក៏ដូចជាសិង្ហបុរី និងបណ្តាប្រទេសក្នុងតំបន់ដែរ បានប្រកាសបើកប្រទេសឡើងវិញកាលពីថ្ងៃទី១ ខែវិច្ឆិកានេះ ដើម្បីធ្វើឲ្យសេដ្ឋកិច្ច និងវិស័យផ្សេងៗទៀត ដែលរងការវាយប្រហារយ៉ាងធ្ងន់ធ្ងរដោយកូវីដ-១៩ បានដំណើរការឡើងវិញ។ ជាការកត់សម្គាល់ ការឆ្លងជំងឺកូវីដ-១៩ នៅសិង្ហបុរី បានរើបឡើងវិញរហូតដល់រាប់ពាន់នាក់ក្នុងមួយថ្ងៃៗ ក្រោយប្រទេសនេះ បានបន្ធូរបន្ថយលក្ខខណ្ឌនៃការធ្វើដំណើរមកពីប្រទេសជាច្រើនកាលពីខែតុលាកន្លងទៅ។ បទពិសោធន៍របស់សិង្ហបុរីពេលនេះ អាចជាមេរៀនមួយសម្រាប់កម្ពុជាផងដែរ។ លោកបណ្ឌិត ឈាង វណ្ណារិទ្ធ នាយកវិទ្យាស្ថានចក្ខុវិស័យអាស៊ី(AVI) បានប្រាប់វិទ្យុបារាំងRFI ពីសិង្ហបុរីមកថា ការបើកសេដ្ឋកិច្ចឡើងវិញនៅក្នុងតំបន់ គឺជាការបើកដោយប្រយ័ត្នប្រយែង ខុសពីអឺរ៉ុប ពោលគឺទាំងកម្ពុជា និងសិង្ហបុរី ត្រូវតែមានការបន្ធូរបន្ថយការឆ្លងដែន ខណៈជំងឺកូវីដ-១៩ បានស្ថិតនៅក្នុងសហគមន៍រួចទៅហើយ។
ចុះផ្សាយនៅថ្ងៃ៖
សូមស្តាប់ការលើកឡើងពីលោក ឈាង វណ្ណរិទ្ធ៖
សូមបញ្ជាក់ថា កម្ពុជានិងសិង្ហបុរី គឺជាប្រទេសដែលបាននាំមុខគេក្នុងការចាក់វ៉ាក់សាំងដល់ប្រជាពលរដ្ឋ នៅក្នុងតំបន់ ក៏ដូចជានៅលើពិភពលោក។ ក៏ប៉ុន្តែក្រោយបើកប្រទេសឡើងវិញ សិង្ហបុរី ដែលមួយថ្ងៃៗមានអ្នកឆ្លង និងស្លាប់ដោយសារកូវីដ-១៩ តិចតួច បានងើបឡើងវិញរហូតដល់រាប់ពាន់នាក់ និងមានអ្នកស្លាប់កើនឡើងជាង១០នាក់ ក្នុងមួយថ្ងៃ។ ដោយឡែកកម្ពុជា ក្រោយបើកដំណើរការប្រទេសឡើងវិញ ចំនួនអ្នកឆ្លងមានការថយចុះមកក្រោម១០០នាក់(តេស្តPCR) និងស្លាប់ក្រោម១០នាក់ក្នុង១ថ្ងៃ។ រីឯចំនួនអ្នកឆ្លង និងស្លាប់ដោយកូវីដ-១៩ នៅឡាវក៏មានការកើនឡើងដែរ ខណៈថៃ និងវៀតណាមកំពុងស្ថិតក្នុងស្ថានភាពឆ្លង និងស្លាប់ច្រើននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ