កម្ពុជាអនុញ្ញាតឲ្យប្រើប្រាស់វ៉ាក់សាំង COVAXIN ផលិតនៅឥណ្ឌា ក្នុងលក្ខខណ្ឌបន្ទាន់
ក្រសួងសុខាភិបាលនៅថ្ងៃទី៥វិច្ឆិកា បានប្រកាសឲ្យប្រើប្រាស់វ៉ាក់សាំងប្រឆាំងកូវីដ១៩ ប្រភេទ COVAXIN (កូវ៉ាសាំង)ដែលផលិតនៅប្រទេសឥណ្ឌា ក្នុងលក្ខខណ្ឌបន្ទាន់។ ការប្រកាសយ៉ាងដូច្នេះរបស់ក្រសួងសុខាភិបាល គឺធ្វើឡើង២ថ្ងៃក្រោយពីអង្គការសុខភាពពិភពលោក ទើបតែបានប្រកាសទទួលស្គាល់វ៉ាក់សាំងទី៨នេះ សម្រាប់ប្រយុទ្ធប្រឆាំងនឹងជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០១:៣៨
គឺជាថ្នាំបង្ការប្រឆាំងកូវីដ១៩ Covaxin (កូវ៉ាសាំង) ត្រូវបានរកឃើញដោយមន្ទីរពិសោធន៍ឥណ្ឌា ឈ្មោះ Bharat Biotech (ភារ៉ាត ប៊ីយូតិច)។ គណៈកម្មការពិគ្រោះបច្ចេកទេសរបស់អង្គការសុខភាពពិភពលោក បានចាត់ទុកវ៉ាក់សាំងរបស់ក្រុមហ៊ុនឱសថឥណ្ឌានេះថាជាថ្នាំមានប្រសិទ្ធភាពពិតប្រាកដ ដែលអាចយកទៅប្រើប្រាស់នៅទូទាំងពិភពលោកបាន។
នៅក្នុងសេចក្តីថ្លែងការណ៍ អង្គការសុខភាពពិភពលោកបានលម្អិតថា Covaxin អាចប្រើលើជំពូកមនុស្សចាប់ពី អាយុ ១៨ឆ្នាំ ឡើងទៅ និងត្រូវចាក់ចំនួន ២ដូស ដែលមានគម្លាត បួនសប្តាហ៍ ពីដូសទីមួយទៅដូសទីពីរ។ ថ្នាំបង្ការឥណ្ឌា អាចមានប្រសិទ្ធភាពលើស ៧៨% នៅពីរសប្តាហ៍ក្រោយចាក់បានគ្រប់ដូស (ដូសទីពីរ)។ ដោយឡែក គេពុំទាន់មានទិន្នន័យគ្រប់គ្រាន់បញ្ជាក់អំពីប្រសិទ្ធភាពនៃវ៉ាក់សាំងចំពោះស្ត្រីមានផ្ទៃពោះទេ។ អ្នកស្រាវជ្រាវត្រូវការបន្តសិក្សាថែមទៀតសិន។
ប៉ុន្តែ Covaxin ជាថ្នាំបង្ការ ដែលមានលក្ខណៈសមស្របបំផុត សម្រាប់បណ្តាប្រទេសក្រីក្រ និងមានចំណូលមធ្យម ព្រោះជាថ្នាំដែលងាយទុកដាក់ និងស្តុកទុក។ នេះបើតាមការអះអាងរបស់អង្គការសុខភាពពិភពលោក ដោយរំពឹងថា ការទទួលស្គាល់វ៉ាក់សាំង Covaxin មួយបន្ថែមទៀតនេះ នឹងជួយសម្រួលការទទួលស្គាល់ពីសហគមន៍អន្តរជាតិផង ភ្នាក់ងាររបស់អង្គការសហប្រជាជាតិផង និងជាពិសេសជួយប្រព័ន្ធ Covax។
គួរឲ្យដឹងថា ក្រសួងសុខាភិបាល កាលពីថ្ងៃទី២៩ តុលា ក៏បានប្រកាសអនុញ្ញាតឲ្យប្រើប្រាស់នូវប្រភេទវ៉ាក់សាំងដែលផលិតដោយប្រទេសរុស្ស៊ីចំនួន៤ប្រភេទ ក្នុងលក្ខខណ្ឌប្រើប្រាស់បន្ទាន់ដែរ។ ក្រសួងសុខាភិបាលក៏បានបញ្ជាក់ទៀតថា លក្ខខណ្ឌនៃការប្រើប្រាស់ គឺប្រើតែក្នុងអំឡុងគ្រោះអាសន្នសុខភាពសាធារណៈនៃជំងឺកូវីដ១៩ដែលកំពុងកើតមានតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ