សង្គមស៊ីវិលសង្ឃឹមថានឹងមានការដោះលែងសកម្មជននយោបាយ និងបរិស្ថានបន្ថែមទៀត
រាប់ចាប់តាំងពីចុងខែតុលារហូតមកដល់ដើមខែវិច្ឆិកានេះ មានសកម្មជនបរិស្ថាន និងនយោបាយ៧នាក់ហើយ ដែលត្រូវបានដោះលែងចេញពីពន្ធនាគារនៅក្នុងសំណុំរឿងញុះញង់។ មន្ត្រីសង្គមស៊ីវិលឃ្លាំមើលដំណើរការនេះ មានសង្ឃឹមថា នៅថ្ងៃចន្ទទី៨វិច្ឆិកាខាងមុខនេះ ពោលគឺនៅមុនមួយថ្ងៃនៃការប្រារព្ធបុណ្យឯករាជ្យជាតិ៩វិច្ឆិកា តុលាការនឹងដោះលែងសកម្មជនបរិស្ថាន និងនយោបាយបន្ថែមទៀតក្នុងចំនួនមួយដ៏ច្រើន បន្ទាប់ពីពួកគេអនុវត្តទោសចប់សព្វគ្រប់។
ចុះផ្សាយនៅថ្ងៃ៖
ស្តាប់ - ០២:៥៥
តាមគម្រោង កូនប្រុសសកម្មជនអតីតគណបក្សប្រឆាំង គឺយុវជន កាក់ សុវណ្ណច្ឆ័យ អាយុ១៧ឆ្នាំ នឹងត្រូវបានដោះលែងចេញពីពន្ធនាគារ នៅថ្ងៃទី៨វិច្ឆិកាខាងមុខនេះ។ បើតាមសេចក្តីជូនដំណឹងរបស់អ្នកនាំពាក្យសាលាដំបូងរាជធានីភ្នំពេញនាពេលថ្មីៗនេះ យុវជន សុវណ្ណច្ឆ័យ ត្រូវបានដាក់ពន្ធនាគារកំណត់ទណ្ឌកម្មត្រឹមពាក់កណ្តាលនៃទោសដែលច្បាប់បានកំណត់ចំពោះអនីតិជន។ ទោសនេះត្រូវអនុវត្តក្នុងពន្ធនាគារតែមួយផ្នែកប៉ុណ្ណោះ។ ចំណែកទោសនៅសល់ត្រូវព្យួរសាកល្បង ដោយតម្រូវឱ្យទណ្ឌិតគោរពវិធានការត្រួតពិនិត្យមួយចំនួន។ សុវណ្ណច្ឆ័យ ត្រូវផ្តន្ទាទោសអោយចាប់ពន្ធនាគារ៨ខែ ក្រោមបទ «ញុះញង់បង្កផលប៉ះពាល់ដល់ស្ថិរភាពសង្គម» និង បទ«ជេរប្រមាថមន្រ្តីថ្នាក់ដឹកនាំប្រទេសជាសាធារណៈ»។
ក្រៅពីកុមារា កាក់ សុវណ្ណច្ឆ័យ មន្ត្រីសិទ្ធិមនុស្សនិងមេធាវីក៏សង្ឃឹមផងដែរថា នៅថ្ងៃចន្ទដដែលនោះ ក៏នឹងមានការដោះលែងជាបន្ទាប់ សកម្មជននយោបាយនិងបរិស្ថាន ជាពិសេសសកម្មជនមាតាធម្មតាបីនាក់ គឺលោក ថុន រដ្ឋា កញ្ញា ឡុង គន្ធា និងកញ្ញា ភួង កែវរស្មី បន្ទាប់ពីក្រុមប្រឹក្សាជំនុំជម្រះសាលាឧទ្ធរណ៍បានប្រកាសសាលដីកានៅព្រឹកថ្ងៃទី៥ វិច្ឆិកា។ ជាសាលដីកាដែលសម្រេចព្យួរទោសសកម្មជនបរិស្ថាន លោក ថុន រដ្ឋា ចំនួន៦ខែដែលនៅសល់ ហើយកញ្ញា ឡុង គន្ធា និងកញ្ញា ភួន កែវរស្មី ត្រូវព្យួរទោសចំនួន៤ខែដែលនៅសល់។
មេធាវីការពារក្ដីអ្នកទាំងបីលោក សំ ចំរើន បានប្រាប់វិទ្យុបារាំងអន្តរជាតិនៅថ្ងៃសៅរ៍ទី០៦វិច្ឆិកានេះថា ត្បិតថា ពួកគេអនុវត្តទោសក្នុងសំណុំរឿងញុះញង់រយៈពេល១៤ខែចប់សព្វគ្រប់ក៏ពិតមែន តែពួកគេនៅប្រឈមនឹងសំណុំរឿងរួមគំនិតក្បត់មួយករណីទៀត ដែលជាហេតុផលធ្វើឲ្យលោកមេធាវីមិនអាចនិយាយមុនបានទេថា កូនក្ដីរបស់លោកនឹងត្រូវបានដោះលែង ឬយ៉ាងណានោះ។ តែចំពោះបទចោទញុះញង់ ផ្អែកតាមនីតិវិធី បើគ្មានបណ្ដឹងតំណាងអយ្យការរារាំងសេចក្ដីសម្រេចរបស់ក្រុមប្រឹក្សាជំនុំជម្រះនោះទេ តុលាការត្រូវដោះលែងកូនក្ដីរបស់លោកឱ្យមានសេរីភាពវិញ។
លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូបន្តអំពាវនាវឲ្យតុលាការដោះលែងសកម្មជននយោបាយនិងបរិស្ថានទាំងអម្បាលមាណចេញពីពន្ធនាគារឲ្យអស់ មុនកម្ពុជាត្រូវធ្វើជាប្រធានប្ដូរវេនអាស៊ាននៅឆ្នាំក្រោយ។ បើតាមមន្ត្រីសិទ្ធិមនុស្សរូបនេះ តិចឬច្រើន ការដោះលែងពួកគេ អាចរួមចំណែកស្ដារលំហសិទ្ធិមនុស្សរបស់កម្ពុជាបានមួយផ្នែកធំ។
តែយ៉ាងណាមិញ អ្នកនាំពាក្យក្រសួងយុត្តិធម៌លោក ជិន ម៉ាលីន បន្តអះអាងថា ការដោះលែងសកម្មជនបរិស្ថាននយោបាយ ឬសកម្មជនបរិស្ថាន ធ្វើឡើងក្រោមហេតុផលច្បាប់ដែលពួកគេអនុវត្តទោសចប់សព្វគ្រប់ មិនមានពាក់ព័ន្ធនឹងបញ្ហាផ្សេងនោះទេ។ ម្យ៉ាង សំណុំរឿងរបស់ពួកគេស្ថិតនៅក្នុងគោលការណ៍អនុគ្រោះរបស់ក្រសួងយុត្តិធម៌នៃសំណុំរឿងព្រហ្មទណ្ឌ។
គួរជម្រាបជូនថា ថ្មីៗនេះ នៅក្នុងសំណុំរឿងញុះញង់ អ្នកស្រី សាត ផា ត្រូវបានដោះលែងកាលពីថ្ងៃទី២៨តុលា។ អ្នកស្រី សាត ផា ជាសកម្មជនម្នាក់ក្នុងចំណោមសកម្មជន១០នាក់ផ្សេងទៀត ដែលត្រូវបានចាប់ខ្លួន បន្ទាប់ពីនាំគ្នាទៅតវ៉ានៅមុខស្ថានទូតចិន កាលពីថ្ងៃទី២៣ ខែតុលា ឆ្នាំ២០២០។ ចំណែកនៅថ្ងៃទី០៥ ខែវិច្ឆិកានេះ សកម្មជនសង្គម និងអតីតគណបក្សប្រឆាំង ចំនួន៥នាក់ ត្រូវបានដោះលែងឲ្យមានសេរីភាពវិញ បន្ទាប់ពីជាប់ពន្ធនាគារជាង១ឆ្នាំ។ អ្នកដែលត្រូវបានដោះលែង គឺអតីតព្រះសង្ឃ កើត សារ៉ាយ, លោក ថា ឡាវី ដែលជាសមាជិករបស់ក្រុមខ្មែរថាវរៈ និង លោក មាន ព្រហ្មមុនី ជាប្រធានសមាគមសម្ព័ន្ធនិស្សិតបញ្ញវន្តខ្មែរ រួមនឹងសកម្មជនអតីតគណបក្សសង្គ្រោះជាតិ២នាក់ទៀត គឺលោក ជុំ ពុទ្ធី និងលោក ឈួរ ផេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ