ក្រសួងអប់រំ៖ ការប្រឡងសញ្ញបត្រមធ្យមសិក្សាទុតិយភូមិ ត្រូវលើកពីថ្ងៃទី ០៦ ធ្នូ ទៅថ្ងៃទី២៧ ធ្នូ ឆ្នាំ២០២១វិញ
ក្រសួងអប់រំកាលពីថ្ងៃទី ០៥ វិច្ឆិកា បានប្រកាសសម្រេចផ្លាស់ប្តូរកាលបរិច្ឆេទនៃការប្រឡងសញ្ញបត្រមធ្យមសិក្សាទុតិយភូមិ ពីថ្ងៃទី ០៥វិច្ឆិកា ទៅថ្ងៃទី ២៧ ខែធ្នូ ឆ្នាំ២០២១វិញ។ ការផ្លាស់ប្តូរកាលបរិច្ឆេទប្រឡងនេះ ត្រូវបានលោក រស់ សុវាចា អ្នកនាំពាក្យក្រសួងអប់រំ បានបញ្ជាក់ប្រាប់វិទ្យុបារាំងអន្ដរជាតិ RFI ថា គឺដើម្បីទុកពេលឱ្យសិស្សអាចមានពេលវេលាសិក្សាស្រាវជ្រាវ និងពង្រឹងសមត្ថភាពបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:២៣
ក្រសួងអប់រំ បានបញ្ជាក់នៅលើគេហទំព័រផ្លូវការរបស់ខ្លួន កាលពីល្ងាចថ្ងៃទី ០៥ វិច្ឆិកាថា ការប្រឡងសញ្ញបត្រមធ្យមសិក្សាទុតិយភូមិក្នុងឆ្នាំនេះ នឹងត្រូវកំណត់យកថ្ងៃទី២៧ ធ្នូ ឆ្នាំ២០២១ ជាថ្ងៃបើកដំណើរការប្រឡងនៅទូទាំងប្រទេស ក្រោយរំកិលពីកាលបរិច្ឆេទចាស់។ កាលបរិច្ឆេទចាស់នៃការប្រឡងដែលគ្រោងរៀបចំនៅថ្ងៃទី ០៦ ធ្នូ ឆ្នាំ២០២១។
លោក រស់ សុវាចា អ្នកនាំពាក្យក្រសួងអប់រំ បានបញ្ជាក់ប្រាប់វិទ្យុបារាំងអន្តរជាតិថា មូលហេតុដែលក្រសួងអប់រំសម្រេចលើកពេលប្រឡងរបស់សិស្សថ្នាក់ទី១២នេះ គឺដើម្បីទុកឱកាសឱ្យសិស្សអាចមានពេលវេលាគ្រប់គ្រាន់សម្រាប់ត្រៀមខ្លួន និងពង្រឹងសមត្ថភាពបន្ថែមទៀតចំពោះការប្រឡងនាពេលខាងមុខ។
បើតាម លោក រស់ សុវាចា ការប្រឡងសញ្ញាបត្រមធ្យមសិក្សាទុតិយភូមិក្នុងបរិបទជំងឺកូវីដ១៩នេះ គឺមិនខុសពីការប្រឡងនាបណ្តាឆ្នាំកន្លងមកនោះទេ ពោលគឺត្រូវគោរពតាមស្តង់ដារប្រឡងឱ្យបានម៉ឺងម៉ាត់ និងត្រូវបន្តអនុវត្តគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ឱ្យស្របតាមវិធានការស្តង់ដារសុវត្ថិភាព SOP។
ជាការកត់សម្គាល់ ចំពោះការប្រឡងបាក់ឌុបនេះ ក្រុមសិស្សថ្នាក់ទី១២មួយចំនួនធ្លាប់បានចេញមកស្នើឱ្យរដ្ឋាភិបាល ជាពិសេសក្រសួងអប់រំ សម្រេចឱ្យពួកគេជាប់ដោយស្វ័យប្រវត្តិក្នុងឆ្នាំ២០២១នេះ។ ចង់ជាប់ដោយស្វ័យប្រវត្តិ ដោយពួកគេលើកឡើងហេតុផលថា សិស្សភាគច្រើនមិនបានរៀនដិតដល់ ខ្វះខាតសម្ភារៈសិក្សាក្នុងអំឡុងពេលរៀនតាមប្រព័ន្ធអនឡាញ និងរៀនមិនសូវទាន់ជាដើម។
ចំណែកក្រុមសិស្សថ្នាក់ទី១២មួយក្រុមផ្សេងទៀត ក៏បានចេញមកស្នើដល់ក្រសួងអប់រំដូចគ្នាផងដែរ។ ប៉ុន្តែសំណើរបស់ពួកគេ គឺចង់ឱ្យក្រសួងអប់រំរៀបចំការប្រឡងតាមកាលបរិច្ឆេទដើម ដោយពុំចាំបាច់ពន្យារពេលនៃការប្រឡងរបស់ពួកគេទេ។ សម្រាប់យុវសិស្សថ្នាក់ទី១២មួយក្រុមនេះ ការពន្យារពេលប្រឡង នឹងធ្វើឱ្យប៉ះពាល់ដល់ផ្លូវអារម្មណ៍ ជាពិសេសបង្កើតភាពស្មុគស្មាញជាច្រើនដល់ពួកគេ។
ប៉ុន្តែបើតាមក្រសួងអប់រំ ដំណើរការប្រឡងសញ្ញបត្រមធ្យមសិក្សាទុតិយភូមិក្នុងឆ្នាំនេះ នឹងនៅតែបន្តរៀបចំឡើងក្រោមស្តង់ដារចាស់ដដែល ដោយគ្រាន់តែពង្រឹងទៅលើវិធានសុខាភិបាលនិងសុវត្ថិភាពប៉ុណ្ណោះ។
លោកនាយករដ្ឋមន្ដ្រី ហ៊ុន សែន កាលពីថ្ងៃទី០១ វិច្ឆិកា បានបញ្ជាក់ថា ការប្រឡងសញ្ញបត្រមធ្យមសិក្សាទុតិយភូមិក្នុងឆ្នាំនេះ មិនអនុញ្ញាតឱ្យមានការប្រឡងជាប់ដោយស្វ័យប្រវតិ្តដូចឆ្នាំកន្លងទៅនោះទេ។ លោកនាយករដ្ឋមន្ត្រីបន្តថា ប្រសិនបើនៅតែបន្តឱ្យសិស្សប្រឡងជាប់ដោយស្វ័យប្រវត្តិបន្ថែមទៀត នោះប្រៀបបានទៅនឹងការសាងសង់ផ្ទះដែលគ្មានគ្រឹះ និងសសរជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ