របាយការណ៍៖ ជនជាតិដើមភាគតិចនៅកម្ពុជាកំពុងប្រែប្រួលទៅរកស្ថានភាពប្រជាសាស្ត្ររបស់ប្រជាជនកម្ពុជាទូទៅ
គិតមកត្រឹមឆ្នាំ២០១៣ ជនជាតិដើមភាគតិចនៅក្នុងប្រទេសកម្ពុជាមានចំនួនជាង១៨ម៉ឺននាក់ ស្មើនឹង ១,២៥% នៃប្រជាជនកម្ពុជាសរុប ដែលរួមមាន២២អំបូរ និងរស់នៅច្រើនជាងគេរហូតដល់ជាង៩០% នៅក្នុងខេត្តចំនួន៦ ភាគឦសានត និងកំពង់ធំ។ ការកំណត់ចំនួនជនជាតិដើមជាក់លាក់ដូច្នេះ គឺធ្វើឡើងនៅក្នុងពិធីផ្សព្វផ្សាយរបាយការណ៍ដំបូង នាព្រឹកថ្ងៃព្រហស្បតិ៍នេះ ស្តីពីស្ថានភាពប្រជាសាស្ត្រ និងសង្គម-សេដ្ឋកិច្ច របស់ជនជាតិដើមភាគតិចនៅកម្ពុជានៅរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០៣:១២
លោក ឆាយ ថន រដ្ឋមន្ត្រីក្រសួងផែនការ បានលើកឡើងថា ការកំណត់ជនជាតិដើមភាគតិចនៅកម្ពុជា ត្រូវបានកំណត់តាមរយៈការប្រើភាសានិយាយពីដើមកំណើត។ ជនជាតិដើមភាគតិចនៅកម្ពុជា មានចំនួន ២២អំបូរ ដែលមានប្រជាជនសរុប ១៧៩ ១៩៣នាក់ ស្មើនឹង១,៣៤% នៃប្រជាជនកម្ពុជាសរុបនៅឆ្នាំ២០០៨ និងមានចំនួន១៨៣ ៨៣១នាក់ ស្មើនឹង១,២៥% នៃប្រជាជនកម្ពុជាសរុប នៅឆ្នាំ២០១៣(អត្រាកំណើនមានត្រឹម ០,៥១% ក្នុងមួយឆ្នាំ)។
តាមរបាយការណ៍លោករដ្ឋមន្ត្រី ក្នុងចំណោមអំបូរទាំង២២ ជនជាតិដើមភាគតិចដែលមានចំនួនច្រើនជាង១ម៉ឺននាក់ មានតែ៦អំបូរប៉ុណ្ណោះ គឺទំពួន ព្នង គ្រឹង កួយ ចារាយ និងព្រៅ ដែលសរុបមានចំនួនស្មើនឹង ៨៨% នៃប្រជាជនជនជាតិដើមភាគតិចទាំង២២អំបូរ។ ភាគច្រើននៃជនជាតិដើមភាគតិចទាំងនោះរស់នៅក្នុងខេត្តចំនួន៦ប៉ុណ្ណោះ គឺខេត្តរតនគីរី មណ្ឌលគីរី ក្រចេះ ស្ទឹងត្រែង កំពង់ធំ និងខេត្តព្រះវិហារ ដែលមានចំនួន ៩២,៤% នៃជនជាតិដើមភាគតិចរស់ទាំងអស់ នៅឆ្នាំ២០១៣។
ទាក់ទងទៅនឹងការសិក្សាអប់រំ ជនជាតិដើមភាគតិចទទួលបានការអប់រំតិច គឺប្រហែល១ភាគ៣ នៃជនជាតិដើមភាគតិចចេះអាន និងចេះសរសេរភាសាខ្មែរ ក្នុងនោះកុមារជិត៥០%មិនបានរៀនសោះ។ ក្នុងចំណោមជនជាតិដើមភាគតិចអាយុ១៥ឆ្នាំឡើងជិត៦៦% មិនបានរៀន ឬបញ្ចប់កម្រិតសិក្សាអ្វីទាំងអស់ រីឯ២៤,១% ទៀត បានរៀនត្រឹមបឋមសិក្សា ខណៈ១០%បានរៀនដល់មធ្យមសិក្សាបឋមភូមិ និង៤%រៀនបានមធ្យមសិក្សាទុតិយភូមិ។
ចំពោះស្ថានភាពសេដ្ឋកិច្ច និងការងារវិញ ជនជាតិដើមភាគតិចចាប់ពីអាយុ១៥ឆ្នាំឡើងទៅ ដែលមានការងារធ្វើ ប្រកបរបរក្នុងវិស័យកសិកម្មគឺមានសរុបចំនួន ៩៣,៣% មានតិចតួចគឺ១,៦% ធ្វើការក្នុងវិស័យឧស្សាហកម្ម និង៥,១% បានបំរើការងារក្នុងវិស័យសេវាកម្ម។
ជាមួយគ្នានេះ របាយការណ៍ស្តីពីស្ថានភាពជនជាតិដើមភាគតិចក៏បានលើកឡើងផងដែរពីបញ្ហាសុខភាព និងអនាម័យ ពោលគឺជនជាតិដើមភាគតិច៥៣% ច្រើនសម្រាលកូនតាមផ្ទះ និង៣៨%ទៅមន្ទីរពេទ្យ ខណៈ៦% នៅមណ្ឌលសុខភាព។ ជាទូទៅជនជាតិដើមភាគតិច ៩៥% ឆ្នាំ២០១៣ មានលំនៅឋានខ្លួនឯង
ដោយពួកគេនៅបន្តប្រើប្រាស់ចង្កៀងប្រេងកាត និងអាគុយជាប្រភពភ្លើងបំភ្លឺ ខណៈអ្នកប្រើអគ្គិសនី ឬម៉ាស៊ីនភ្លើងផ្ទាល់ខ្លួនមានចំនួន២០,៦%។ ក្រៅពីនេះ ៩៥%នៃជនជាតិដើមភាគតិចនៅបន្តប្រើប្រាស់អុសជាថាមពលចម្អិន ហើយ១ភាគ៣នៃគ្រួសារពួកគេមានទូរទស្សន៍ប្រើ។ ដោយឡែកសម្ភារៈសម្រាប់ធ្វើដំណើរវិញ គ្រួសារជនជាតិដើមភាគតិចជាង៧៦% មានម៉ូតូប្រើ ២,២% មានរថយន្ត ជាង៩%មានគោយន្ត ៧,៨%មានទូក និងជាង៣៧%ប្រើកង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ