អង្គការជាតិ និងអន្តរជាតិអំពាវនាវឱ្យអាជ្ញាធរកម្ពុជាធានាសន្តិសុខ សុវត្ថិភាព និងការពារអ្នកកាសែត
ថ្ងៃទី២ ខែវិច្ឆិកា ឆ្នាំ២០២១នេះ គឺជាទិវាអន្តរជាតិបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។ នៅថ្ងៃនេះ ក្រុមអង្គការសង្គមស៊ីវិលជាតិ និងអន្តរជាតិចំនួន១០ បានរួមគ្នាសម្តែងការព្រួយបារម្ភពីចំណាត់ការមិនមានប្រសិទ្ធភាពរបស់រដ្ឋាភិបាលក្នុងការចាប់អ្នកប្រព្រឹត្តល្មើសលើអ្នកសារព័ត៌មានមកផ្តន្ទាទោសតាមច្បាប់។ ដូច្នេះហើយ ជាថ្មីម្តងទៀត ក្រុមអង្គការទាំងនេះអំពាវនាវឱ្យអាជ្ញាធរកម្ពុជាធានាពីសន្តិសុខ សុវត្ថិភាព និងការពារអ្នកសារព័ត៌មានគំរាមកំហែង និងការយាយីផ្សេងៗ។
ចុះផ្សាយនៅថ្ងៃ៖
ស្តាប់ - ០២:២៦
ក្រុមអង្គការសង្គមស៊ីវិលចំនួន៩ បានរួមគ្នាចេញមុខសម្តែងការព្រួយបារម្ភពីការបរាជ័យរបស់រដ្ឋាភិបាលកម្ពុជាក្នុងការចាប់ខ្លួនអ្នកប្រព្រឹត្តបទល្មើសឧក្រិដ្ឋកម្មលើអ្នកសារព័ត៌មានយកមកផ្តន្ទាទោសតាមច្បាប់។ ក្រុមអង្គការសង្គមស៊ីវិលទាំងនេះ មានជាអាទិ៍ សមាគមសម្ព័ន្ធអ្នកសារព័ត៌មានកម្ពុជា(ខេមបូចា) មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ សហព័ន្ធអ្នកសារព័ត៌មានអន្តរជាតិ សមាគមកម្ពុជា ដើម្បីការពារអ្នកកាសែត មជ្ឈមណ្ឌលសិទ្ធិមនុស្សកម្ពុជា និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្សជាដើម។
បើតាមអង្គការទាំងអស់នេះ គឺចាប់តាំងពីឆ្នាំ១៩៩៤មក មានអ្នកសារព័ត៌មានចំនួនប្រមាណ១៧នាក់ត្រូវបានសម្លាប់ និងស្លាប់នៅក្នុងប្រទេសកម្ពុជា។ ក្នុងចំណោម១៧នាក់នេះ មាន១២នាក់ ត្រូវបានសម្លាប់ក្នុងពេលពួកគេរាយការណ៍ពីព័ត៌មានរសើប ហើយអ្នកប្រព្រឹត្តបទល្មើសមិនត្រូវបាននាំយកមកផ្តន្ទាទោសទេ។ ដោយឡែក ក្នុងរយៈពេល១០ខែចុងក្រោយនេះវិញ សមាគមសម្ព័ន្ធអ្នកសារព័ត៌មានកម្ពុជាបានបញ្ជាក់ពីការរកឃើញអ្នកសារព័ត៌មាន៨១នាក់ បានទទួលរងនូវការធ្វើទុក្ខបុកម្នេញក្នុងរូបភាពផ្សេងៗ។ ក្នុងនោះ អ្នកសារព័ត៌មានចំនួន៣១នាក់ត្រូវបានចាប់ខ្លួន ២០នាក់រងអំពើសិង្សា ១៦នាក់រងការគំរាមកំហែង ៨នាក់រងពាក្យបណ្តឹងពីតុលាការ ៥នាក់រងការឃាត់សួរចម្លើយ និងអ្នកសារព័ត៌មានស្ត្រីម្នាក់រងការបៀតបៀនផ្លូវភេទ។
អាស្រ័យហេតុដូច្នេះហើយ ទាំងខេមបូចា និងអង្គការចំនួន៨ទៀត បានអំពាវនាវដល់រដ្ឋាភិបាលកម្ពុជាឱ្យចាត់វិធានការជាក់ស្តែង ដើម្បីធានាថា ការស៊ើបអង្កេតប្រកបដោយប្រសិទ្ធភាព ឯករាជ្យ និងតម្លាភាពនាំយកជនល្មើសមកផ្តន្ទាទោស។ ចំណែក អង្គការយូណេស្កូវិញ ក៏បានអំពាវនាវឱ្យមានការយកចិត្តទុកដាក់ជាបន្ទាន់លើការស៊ើបអង្កេត និងកាត់ទោស ការគំរាមកំហែង មិនថាតាមរយៈអនឡាញ ឬលើរាងកាយ ដើម្បីការពារអ្នកសារព័ត៌មាន។ ដូចនេះដែរ ក្រុមអង្គការទាំង៩បានស្នើឱ្យរដ្ឋាភិបាលកម្ពុជាចាត់វិធានការបន្ទាន់ ដើម្បីធានាសុវត្ថិភាព និងសន្តិសុខដល់អ្នកសារព័ត៌មាន។
សម្រាប់អង្គការរទាំងអស់នេះ គឺថា នៅពេលដែលរដ្ឋាភិបាលកម្ពុជាខកខានក្នុងការស៊ើបអង្កេតយ៉ាងត្រឹមត្រូវ និងដាក់ទណ្ឌកម្មចំពោះអំពើហិង្សាលើអ្នកសារព័ត៌មាន បែបនេះជាសារបង្ហាញថា ឧក្រិដ្ឋកម្មប្រឆាំងអ្នកសារព័ត៌មាននៅកម្ពុជា គឺត្រូវបានអនុញ្ញាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ